Kibuti kya Adamu.
5
1 Wono guli mukanda wa kibuti kya Adamu. Gaabumbile muntu, Kalaga amubumbile ku kisusania kyage. 2 Ababumbile wamulume nu mukikulu. Abakasile mponga, nu abeinikile Bantu mu busi bubo bwababumbile. 3 Gabezaga Adamu na myaka lukama nu makumi masatu, abutile mwana wamulume mu kisusania kyage, nu amwinikile Seti. 4 Bindi bya Adamu, kumbusa kwa kubutwa kwa Seti, byabezaga myaka nkama kinana, nu abutile bango bana, bamulume nu bamukazi. 5 Bindi binsania bya Adamu byabezaga myaka nkama mubula nu makumi masatu, nu akule.
6 Seti abezaga na myaka lukama nu itano gaabutile Enosi. 7 Kumbusa kwa kubuta Enosi, Seti akukizie engo myaka nkama kinana nu mutubakamo. Abutile bango bana, bamulume nu bamukazi. 8 Bindi binsania bya Seti byabezaga myaka nkama mubula, ikumi nu ibili, nu akule.
9 Gabezaga Enosi na myaka makumi mubula, abutile Kenani. 10 Kumbusa kwa kubuta Kenani, Enosi akukizie engo myaka nkama kinana nu ikumi. Abutile bango bana, bamulume nu bamukazi. 11 Bindi binsania bya Enosi byabezaga myaka nkama mubula nu itano, nu akule.
12 Gabezaga Kenani na myaka makumi mutubakamo, abutile Mahalaleli, 13 Kumbusa kwa kubuta Mahalaleli, Kenani akukizie engo myaka nkama kinana nu makumi manazi. Abutile bango bana bamulume nu bamukazi. 14 Bindi binsania bya Kenani byabezaga myaka nkama mubula nu ikumi, nu akule.
15 Gabezaga Mahalaleli na myaka makumi mutuba nu itano, abutile Yaredi. 16 Kumbusa kwa kubuta Yaredi, Mahalaleli akukizie engo myaka nkama kinana nu makumi masatu. Abutile bango bana, bamulume nu bamukazi. 17 Bindi binsania bya Mahalaleli byabezaga myaka nkama kinana, makumi mubula nu itano, nu akule.
18 Gabezaga Yaredi na myaka lukama makumi mutuba nu ibili, abutile Enoke. 19 Kumbusa kwa kubuta Enoke, Yaredi akukizie engo myaka nkama kinana. Abutile bango bana, bamulume nu bamukazi. 20 Bindi binsania bya Yaredi byabezaga myaka nkama mubula, makumi mutuba nu ibili, nu akule.
21 Gabezaga Enoke na myaka makumi mutuba nu itano, abutile Metusela. 22 Kumbusa kwa kubuta Metusela, Enoke atabangile na Kalaga myaka nkama isatu. Abutile bango bana, bamulume nu bamukazi. 23 Bindi binsania bya Enoke byabezaga myaka nkama isatu, makumi mutuba nu itano. 24 Enoke atabangile na Kalaga, nu ntamonekile ko lingo, kubuno Kalaga amutolile.
25 Gabezaga Metusela na myaka lukama, makumi kinana nu mutubakamo, abutile Lameki. 26 Kumbusa kwa kubuta Lameki, Metusela akukizie myaka nkama mutubakamo, makumi kinana nu ibili. Abutile bango bana, bamulume nu bamukazi. 27 Bindi binsania bya Metusela byabezaga myaka nkama mubula, makumi mutuba nu mubula, nu akule.
28 Gabezaga Lameki na myaka lukama makumi kinana nu ibili, abutile mwana wamulume, 29 nu amwinikile Noa. Atendile bunee: “Wono akatuumuzia ku mulimo nu ku mbabazio zeitu, kubuno kisi kyaswilidwe na Yehowa.” 30 Kumbusa kwa kubuta Noa, Lameki akukizie myaka nkama itano, makumi mubula nu itano. Abutile bango bana, bamulume nu bamukazi. 31 Bindi binsania bya Lameki byabezaga myaka nkama mutubakamo, makumi mutubakamo nu mutubakamo, nu akule.
32 Gabezaga Noa na myaka nkama itano, abutile Semu, Hamu nu Yafeti.