Bwagi bwa bantu.
6
1 Gitide bantu mu kisi nu babutile bakinga, 2 bana ba Kalaga bamonine ku babo bakinga buno babezaga mbangilwa, nu batolile bakikulu bamozi anga bubasombwede. 3 Yehowa atendile bunee: “Muuza wane tagukalwana na bantu ku milyalya, kubuno beli mubili. Bindi byabo bikaba myaka lukama nu makumi mabili.” 4 Mapuka mabezaga mu kisi mu bindi bibyo, nu kumbusa bana ba Kalaga basombwede bakinga ba bantu, nu bababutide bana. Babo bana babezaga mapuka nu bo mu bindi bya wakalazi, nu baganwinwe. 5 Yehowa amonine buno bwagi bwa bantu bwabezaga bunene nunse mu kisi nu makengelo mabo mabezaga mabi tugu mu bindi binsania. 6 Yehowa eiyanizie buno abumbile bantu mu kisi, nu abezaga na kabebe mu mutima wage. 7 Yehowa atendile bunee: “Nkuzikya bantu banabumbile mu kisi, bantu bansania, nu nyama nu bibyo bikugelegeta nu tuzoni twa mu mpelela, kubuno niyania buno nabibumbile.” 8 Tondo Noa amonine mponga ku meiso ma Yehowa.
9 Bibino u bibuti bya Noa: Noa abezaga muntu wisanana nu uteli na kabalibango ku bantu banyage ku nkungu zage, nu Noa atabangile na Kalaga. 10 Noa abutile bana basatu bamulume: Semu, Hamu nu Yafeti. 11 Kalaga amonine buno kisi kyabiga lwabusio lwage nu kiyala na nsake. 12 Kalaga amonine buno kisi kyabiga kubuno bantu bansania ba kisi babigizie nkita zabo.
13 Kalaga abwide Noa bunee: “Nkazikya bantu, kubuno beizazizie kisi na nsake zabo. Ububo nabazikye gamozi na kisi. 14 Iyobakile bwato bunene na mbavu za muti wa goferi. Kita masio munda mwabo, nu nti watila aliga munda nu kumbuga. 15 Bukite anga bubuno: Bulazi bwabo bwabe mabusu nkama isatu, nu bungulu mabusu makumi matano, nu kusakama mabusu makumi masatu. 16 Kita kampiengenge ibusu limozi kunsi kwa kantamba, nu kita lwibi ku ntungo zakyo. Bukite na mpilili isatu: za gansi, z'ibili nu z'isatu gantata. 17 Kubuno nalusie mwiyalo munene ga kisi, kuzikya binsania bili na muuza wa kalamo, nu binsania bili ga kisi byazikibwe. 18 Tondo nakita idagano lyane nobe. Mwingile mu bwato, uwe nu mukazi wobe nu bana bobe nu bakikulu babo. 19 Wingizie mu bwato gamozi nobe lukita na lukita lwa binsania bili na kalamo buno tabikue. Ubingizie bibili bibili, mulume nu ibuti, buno ubilange tabikue, 20 bya nkita insania za tuzoni nu nyama nu bikugelegeta ga kisi, bikavwa kuguli mu bwato buno ubilange. 21 Ukatola idia lya lukita na lukita nu kulilanga libe idia lyakuka kumuli nu ku bingo binsania bili na kalamo bili gamozi n'inyu.” 22 Noa anzile nu akitile binsania anga bwamukakizizie Kalaga.