Mwiyalo munene.
7
1 Yehowa abwide Noa bunee: “Ingila mu bwato, uwe nu kikanga kyobe, kubuno namona buno uwe tugu u wisanana lwabusio lwane munkatini mwa bantu ba zeno nkungu. 2 Ku nyama insania zili zaswaga, tola mutubakamo mutubakamo, mulume nu ibuti. Nu nyama zitaswaga, ibili ibili, mulume nu ibuti. 3 Tola lingo tuzoni twa mu mpelela mutubakamo mutubakamo, mulume nu ibuti, buno bilame kunsania mu kisi, 4 kubuno kumbusa kwa bindi mutubakamo, nalokye mbula ga kisi bindi makumi manazi, musi nu kindi, nu binsania bili na kalamo binakitile nabizikye ga kisi.” 5 Noa akitile bunsania bwamukakizizie Yehowa. 6 Noa abezaga na myaka nkama mutuba gavule mwiyalo ga kisi. 7 Noa eingide mu bwato, we nu mukazi wage nu bana bage nu bakikulu ba bana bage, kwiyonia ku mwiyalo. 8 Nu ku nyama insania zaswaga nu zitaswaga nu tuzoni nu binsania bikugelegeta ga kisi. 9 Bingide mu bwato mwabezaga Noa, bibili bibili, mulume nu ibuti, anga bwakakizizie Kalaga ku Noa. 10 Kumbusa kwa bindi mutubakamo, mwiyalo wavule ga kisi.
11 Gabezaga Noa na myaka nkama mutuba, ku kindi ky'ikumi nu mutubakamo kya mwezi w'ibili, mu bubo busi tunuabalongo tunsania twa bitatenge twabasizie mazi mengi nu ikokobula lyabasile. 12 Ikokovula lyalokile ga kisi bindi makumi manazi, musi nu kindi.
13 Mu busi bubo, Noa eingide mu bwato, we nu Semu nu Hamu nu Yafeti bana bage, gamozi na bakikulu babo, mukikulu wa Noa nu babo ba bana bage basatu. 14 Nu beingizizie gamozi nabo lukita na lukita lwa nyama nu lwa bituganwa nu lwa binsania bikugelegeta ga kisi nu lwa tuzoni twa nkita insania zikulengaga. 15 Bibili bibili, mulume nu ibuti, binsania bili na kalamo bingide mu bwato mwabezaga Noa, 16 Mwingide mulume nu ibuti ku nyama insania zili na kalamo anga bwakakizizie Kalaga. Nu Yehowa amwigalide lwibi.
17 Mwiyalo wabede ga kisi bindi makumi manazi, nu mu kwitila mazanzwide bwato kutuka ga kisi. 18 Mazi mitide nunse ga kisi nu bwato bwatambiletambile gantata ga mazi. 19 Mazi mitide ga kisi nu miduko milazi insania zili kunsi kw'igulu zakokile nunse. 20 Mazi matingile gantata miduko mabusu ikumi nu matano. 21 Binsania byabezaga na kalamo nu bikwitengia byazikile ga kisi, tuzoni nu bituganwa nu nyama nu binsania bikugelegeta, nu bantu bansania. 22 Bibyo binsania bikwiza na mwembe bya ga kisi byakule. 23 Bubo u bwazikizibwe binsania bili na kalamo ga kisi, bantu nu nyama nu bikugelegeta nu tuzoni twa mpelela. Tugu Noa asigede gamozi na babo babezaga nage mu bwato. 24 Mwiyalo wabede ga kisi bindi lukama nu makumi matano.