Kuzinda kwa mwiyalo.
8
1 Kalaga akengede Noa nu nyama insania nu bituganwa binsania byabezaga nabyo mu bwato, nu Kalaga asingile lumpumpu kutinga ga kisi, nu mwiyalo wakokokile. 2 Tunuabalongo twa mazi twakandilwe nu ikokobula ly'igulu lyasilile, nu mbula tazalokile lingo kutuka kwigulu. 3 Mazi malingile kukokoka bukebuke, nu kumbusa kwa bindi lukama nu makumi matano, mazi makokokile. 4 Ku kindi ky'ikumi nu mutubakamo kya mwezi wa mutubakamo, bwato bwikede gantata mwiduko wa Ararati. 5 Mazi makokokile aaba nu ku mwezi w'ikumi. Ku kindi kitangi kya mwezi wozo, ntonga za miduko zamonekile ko. 6 Kuzinda kwa bindi makumi manazi, Noa eigwide kampiengenge ka bwato bwakitile, 7 nu Noa abasizie kibombobombo, nu kyalengile na ko na ko aaba nu gakamine mazi ga kisi. 8 Kumbusa abasizie nkulimba buno amone ndi mazi makama ga kisi, 9 tondo nkulimba tazamonine kiziki kya kwemana. Ububo zasubizie lingo ku Noa mu bwato, kubuno mazi mabezaga tamekama ga kisi. Noa alambizie kuboko nu kuzitola, kuzisubya mu bwato. 10 Alindide lingo bindi mutubakamo, nu abasizie lingo zezo nkulimba mu bwato. 11 Nkulimba zavule mwigolo na lusamba luto lwa muti gukumanwa muzeituni ku milomo zazo, nu Noa amenyine buno mazi makokoka ga kisi. 12 Noa alindide bingo bindi mutubakamo, nu abasizie lingo zezo nkulimba, tugu tazasubizie lingo kweli.
13 Nu bwabede ku kindi kitangi kya mwezi mutangi wa mwaka wa nkama mutuba nu umozi wa Noa, buno mazi makamine ga kisi, nu Noa atikizye kisusu kya bwato. Alolile kunsania nu amonine buno kisi kyakama. 14 Ku kindi kya makumi mabili nu mutubakamo kya mwezi w'ibili kisi kyakamine nunsania.
15 Kalaga abwide Noa bunee: 16 “Basa mu bwato, uwe nu mukikulu wobe nu bana bobe nu bakikulu babo. 17 Basia bibumbwa binsania bikulama: tuzoni nu nyama nu kinsania kikugelegeta ga kisi buno bibutane ga kisi nu kuba byingi nu kwitila mu kisi.”
18 Ububo Noa abasile mu bwato nu mukazi wage nu bana bage nu bakazi babo. 19 Nu nyama insania nu binsania bikugelegeta nu tuzoni tunsania byabasile gamozi, na lukita na lukita, mu bwato.
Noa akita kisansa.
20 Noa obakide Mukota kasenga ka kisansa. Atolile ku bituganwa byaswaga nu ku tuzoni twaswaga, nu abikitile kisansa ga kasenga nu kubigisia. 21 Yehowa ongule ku nsunu nsoga, nu atendile mu mutima wage bunee: “Nsikasungia lingo kisi ku kabamba ka bantu, kubuno makengelo ma mitima za bantu meli mabi kutukila bwana bwabo, aba nsikeita lingo binsania bili na kalamo anga bunakitile.
22 Ku bindi binsania byasigala ku kisi buno kikili go,
nkungu za kuyika nu za kutubula,
nkungu za mpego nu za muzuzo,
nkungu za kilimo nu za nzogo,
nkungu za nindunindu nu z'igolo,
musi nu kindi tazikasila nunse.”