Idagano lya Kalaga na Noa.
9
1 Kalaga akasile mponga ku Noa gamozi na bana bage. Ababwide bunee: “Butanazi, mwitile nu mwizazie lingo kisi. 2 Binsania bili mu kisi bikamukua boba, nyama insania nu tuzoni nu bikutamba ga kisi nu byena, nu binsania byabikwa mu maboko meinyu. 3 Anga bunamukasile bisugu, ububo namukasa misuna za binsania bikulama buno zibe idia lyeinyu. 4 Tamulie nyama zikili na kalamo, u mikila zazo, muzo. 5 Ububo nkabuzia mikila ku bantu nu ku nyama: Muntu na muntu ukeita ungo, nti eitwe. 6 Unsania ukakubula mikila za muntu, mikila zage zikakubulwa na muntu, kubuno Kalaga abumbile muntu ku kisusania kyage. 7 Nu inyuwe mwitile, mube beingi mu kisi kinsania nu kubutana mukyo.” 8 Kalaga abwide lingo Noa gamozi na bana bage bunee: 9 “Ungwililazi, nakita idagano lyane n'inyu, gamozi n'ibuta lyeinyu linsania, 10 nu na bibumbwa binsania bikulamaga bili n'inyu, u tuzoni, bituganwa nu binsania byatukile n'inyu mu bwato, u nyama insania za ga kisi. 11 Nakita idagano lyane n'inyu, gamozi na binsania bili na kalamo, buno nsikabizikya lingo na mwiyalo, aba takukaba lingo ungo mwiyalo kuzikya kisi kinsania.”
12 Kalaga atendile bunee: “Kakano keli kakengelezio k'idagano lyane kanabika ganisamba n'inyu nu na bibuti binsania bikavwa. 13 Nabika mumpilinga wane kwigulu, nugo gukaba kakengelezio k'idagano ganisamba na kisi. 14 Bukaba buno ganagezye bimpa mu kisi nti mumpilinga wamoneke ko mwigulu. 15 Nu nne nkakengela idagano lyane lili ganisamba n'inyu nu binsania bili na kalamo buno mwiyalo tagukazikya lingo bikulama ga kisi. 16 Gankamona wozo mumpilinga kwigulu, nkagulola nu kukengela idagano lyane lya milyalya ganisamba na binsania bili na kalamo mu kisi.”
17 Kalaga abwide Noa bunee: “Kakano keli kakengelezio k'idagano linabika ganisamba na bibumbwa binsania bili na kalamo mu kisi.”
Noa nu bana bage.
18 Babano u bana ba Noa batukile mu bwato: Semu, Hamu nu Yafeti. Hamu abezaga isi wa Kanana. 19 Babano basatu babezaga bana ba Noa, mubeli u mwatukile bantu beizazizie lingo kisi.
20 Noa abede mulimi nu alingile kuyika isoa lya biguma. 21 Gaanune maku, alebilwe nu abede mundulu mu numba zage za hema. 22 Hamu, isi wa Kanana, akangile isi, nu asambalide mibuto zage ibili zabezaga kumbuga. 23 Tondo Semu nu Yafeti bakatile nsulu nu bazekile ga matuli mabo. Bendile lumbusambusa nu bakukide mundulu w'isibo, nu meiso mabo malolile kubatukaga buno tabakange isibo. 24 Noa ayukile mu bulebi bwage. Gaamenyine bubo bwamukitide malibilo mage, 25 atendile bunee:
“Kanana aswililwe. Akaba mukobe wa bakobe ku mibuto zage.”
26 Nu atendile bunee:
“Yehowa aganunwe, Kalaga wa Semu,
nu Kanana abe mukobe wage.
27 Kalaga atalikile Yafeti, nu eikale mu numba za hema za Semu,
nu Kanana abe mukobe wage.”