Kalaga amana Musa.
3
1 Musa alangaga lusumba lwa mikoko z'isibyala Yetoro, u sankoga wa kisi kya Midiani. Alisondelezizie kumbusa kwa kalula, nu abasile ku mwiduko wa Kalaga, u Horebu. 2 Mwanzelo wa Yehowa wamubaside mu ngulumina za keiya mu muti. Musa alolile bwaguluminaga muti tondo tawagiaga. 3 Musa atendile bunee: “Nagaluka kano kaluma buno nimone iganogano lilino, kubuno muti tagukugia.”
4 Gamonine Yehowa buno agaluka kulola, amumanine kutuka mu muti. Atendile bunee: “Musa. Musa.”
Eitabide bunee: “Nne wono.”
5 Kalaga amubwide bunee: “Ntusigelele gano. Tikya bisalapata byobe ku magulu, kubuno kiziki kiwemanina go kyasililila.” 6 Lingo atendile bunee: “Nne nili Kalaga wa basoinyuwe, u Abrahamu, Isaka nu Yakobo.” Nu Musa abisile meiso mage, kubuno akule boba kulola ku Kalaga.
7 Yehowa amubwide bunee: “Lebelebe namonine ku mbabazio za bantu bane beli mu Misri, nu nungule idilo lyabo ku kabamba ka bukobe bwabo. Ee, nizi tubebe twabo. 8 Nakumba kubatikya mu maboko ma baMisri. Nabatikye mu kisi kikyo nu kubenzia ku kisi kisoga nu kinene, u kisi kiyala na mabele nu buuki. Kili kiziki kya baKanana nu baHiti nu baAmori, baPerizi, baHivi nu baYebusi. 9 Nungule ku idilo lya baIsraeli, nu namonine ku mbabazio zabababazizie baMisri. 10 Ububo kano kaluma nkukusinga kuli Farao buno utikye bantu bane, u baIsraeli, mu Misri.”
11 Tondo Musa akwide Kalaga bunee: “Nne u nazi buno nende ku Farao nu kutikya baIsraeli mu Misri?”
12 Kalaga amwakwide bunee: “Lebelebe, Nne nabe gamozi nobe, nu kakano kabe kalolesio kuguli buno nakusingile: gawasile kutikya bantu babo mu Misri, nti mwakumbamine Kalaga ga wono mwiduko.”
13 Musa abuzizie Kalaga bunee: “Ganende ku baIsraeli nu kubabula bunee: ‘Kalaga wa basoinyuwe ansingile kumuli,’ nu bambuzie bunee: ‘Izina lyage nazi,’ nti nababule buni?”
14 Kalaga akwide Musa bunee: “Nili Bunili. Bubuno u buwabule baIsraeli bunee: ‘Nne Nili u wansingile kumuli.”’
15 Kalaga amubwide lingo bunee: “Bubo u buwabule baIsraeli bunee: ‘Yehowa, Kalaga wa basoinyuwe, u Kalaga wa Abrahamu nu Isaka nu Yakobo, ansingile ku muli.’ Lilino lili izina lyane ku milyalya, nu lili izina linakengelwe nalyo mu bibuti binsania. 16 Enda ukundamanie bakulu ba baIsraeli. Babule bunee: ‘Kalaga wa basoinyuwe, u Kalaga wa Abrahamu nu wa Isaka nu wa Yakobo, ambaside, 17 nu antendile bunee: “Lebelebe navule nu namonine buni bwamukitide baMisri. Nasombwede kumutikya mu kisi kya mbabazio nu kabebe keinyu nu kumubasia ku kisi kya mabele nu buuki, u kisi kya baKanana, baHiti, baAmori, baPerizi, baHivi nu baYebusi.”’ 18 Bongwe iyuki lyobe. Enda na bakulu ba baIsraeli ku mukota wa Misri nu mwamubule bunee: ‘Yehowa, Kalaga wa baIsraeli akulumenne n'iswe. Tukusega kano kaluma bwangato bwa lugendo lwa bindi bisatu buno twende mu kalula kukasana kayulo ku Yehowa, Kalaga weitu.’ 19 Nizi buno mukota wa baMisri ntazige mwenda ndi nsyamutikya ku kisi na magala mane manene. 20 Nalambye kuboko kwane kusungia Misri na miganogano zane zinsania zinakite munkatini mwabo, nu kumbusa azige buno mwende. 21 Nu Nne nakase baIsraeli mponga buno baMisri bakwile baIsraeli kyombo nu kubakasa bikulo byingi. 22 Na mukikulu na wasege munyage nu ku wozo wikalaga mu numba zage, bintu bya feza nu bya olo nu nsulu, nu mwavwalikye bana beinyu. Nu bubo mwanyage baMisri.”