Tulolesio ku Musa.
4
1 Musa akwide Kalaga bunee: “Tondo nizi tabankatizie nu tabongwilile iyuki lyane. Bantende bunee: ‘Ntwamonine ku Kalaga.”’ 2 Nu Yehowa amubuzizie bunee: “Kikizi kikyo ku kuboko kwobe?”
Akwide bunee: “Musumbo wane.”
3 Nu amukakizizie bunee: “Wise gansi.” Musa awisile gansi nu wagalukile nzoka, nu Musa azitinine. 4 Tondo Yehowa amubwide bunee: “Lambya kuboko kobe nu kuzikata ku mukila.” Ububo Musa alambizie kuboko nu azikatile ku mukila, nu zabede musumbo wage ku kuboko kwage.
5 Kalaga amubwide lingo bunee: “Kita bubo, buno bakatizie buno Yehowa, Kalaga wa beisibo, u Kalaga wa Abrahamu nu Isaka nu Yakobo, eidolesizie kuguli.” 6 Nu Yehowa abwide Musa lingo bunee: “Bika kuboko kobe ku bukuba bwobe.” Akubikile ku bukuba bwage. Nkungu zakutikizye, kwelile na bibali.
7 Atendile bunee: “Bika kuboko kobe ku bukuba bwobe lingo.” Akubikile ko lingo, nu nkungu zakutikizye, kwagalukile anga bukwabezaga.
8 Yehowa abwide lingo bunee: “Ndi tabakukatizia nu kungwilila iyuki lyobe ku kabamba ka kalolesio katangi, nti bakatizie kalolesio ka tubili. 9 Ndi tabakatizie kalolesio ka tubili, aba kungwilila iyuki lyobe, nti wataga mazi nu kumakubula gansi, nu mazi magaluke mikila.”
10 Musa akwide Yehowa bunee: “Mukota wane, nsili muntu wa kukalikania kutukila wa kalazi, aaba nu kano kaluma gokutendana na nne, kubuno nkutetumaga.”
11 Yehowa amwakwide bunee: “Nazi wakasile muntu kanua? Nazi wakitile kaluma aba kimbula matuzi? Nazi wakitile muntu buno amone aba kuba kyuku? Ndi ta Nne, Yehowa? 12 Enda kano kaluma. Nabe mu kanua kobe, nu nakwigisie buwatende.”
13 Musa amusegile bunee: “Mukota, singa ungo u ukutunda.” 14 Gaatendile bubo, Yehowa amwongedwe, nu amutendile bunee: “Ndi Haruni muLawi nteli solonzi? Nizi eizi kutenda busoga. Akuvwa kukulumana nobe. Nkungu ziukukulumana nage abogeboge mu mutima. 15 Nu watende kweli kumukasa moki mansania manatenda. Nabe gamozi n'inyuwe, nu kumwigisia buni bumwakite. 16 Abe mutenzi wobe, ee, abe kanua kobe, n'uwe wabe Kalaga wage. 17 Wende na musumbo wono kukita nago miganogano.”
Musa asubania ku Misri
18 Nkungu zezo Musa endile ku isibyala, u Yetoro, nu amubwide bunee: “Nkukusega buno nisubye ku mibuto zane zili mu Misri buno nilole ndi beikili ko.”
Yetoro abwide Musa bunee: “Enda busoga.”
19 Yehowa abwide Musa mu kisi kya Midiani bunee: “Subya ku Misri, kubuno bansania batundaga kukwita bakule.” 20 Ububo Musa atolile mukazi wage nu bana bage, nu ababikile ga mpunda zage basubye ku Misri. Musa akatile musumbo wa Kalaga mu kuboko kwage.
21 Yehowa abwide Musa lingo bunee: “Nkungu ziwasubye ku Misri, kita lwabusio lwa Farao miganogano insania zinakukasile bwangato bwa kukita. Nakite mutima wage mubibu buno ntazige bantu bende. 22 Bula Farao bunee: ‘Yehowa atenda bunee: “BaIsraeli beli bane, u nkula zane. 23 Nakubula bunee: ‘Itabizia buno bantu bane bende kunkitila. Ndi ntwaziga, nti nite nkula zobe.”””
24 Gabeiyombekile ido mu nzila, Yehowa akulumenne na Musa, buno amwite. 25 Ububo Zipora atolile mwene w'ikozi libibu nu amonesizie mwana wage nu eisile kyasesile ku magulu ma Musa. Amutendile bunee: “Iba wane, uli muntu watunda kubasia mikila.” 26 Ububo Kalaga asigile Musa. Zipora amanine iba wage muntu watunda mikila, ku kabamba ka kumonesia bana.
27 Yehowa abwide Haruni bunee: “Enda ukulumane na Musa mu kalula.” Ububo Haruni akulumenne nage ku mwiduko wa Kalaga, nu amumumine ku matama. 28 Musa asolede Haruni binsania byatendile Yehowa kweli nu miganogano insania zaamukakizizie.
29 Ukinsa Musa nu Haruni bendile ku Misri nu bakundamanizie bakulu bansania ba baIsraeli, 30 nu Haruni ababwide binsania byatendile Yehowa ku Musa, nu akitile tulolesio ku meiso ma bantu. 31 Bantu bakatizizie gabongule buno Yehowa alolile baIsraeli mu mbabazio zabo nu abakwila kyombo mu nsungio zabo, nu bakumbaminne Kalaga.