Musa nu Haruni lwabusio lwa Farao.
5
1 Kumbusa kwa bubo Musa nu Haruni bendile ku Farao nu bamubwide bunee: “Bubuno u bwatenda Yehowa, Kalaga wa baIsraeli bunee: ‘Itabizia buno bantu bane bende kunkitila kisagulo kinene mu kalula.”’ 2 Farao ababuzizie bunee: “Nazi Yehowa buninanza iyuki lyage? Nsizi Yehowa nu nsyaziga baIsraeli bende.”
3 Bamubwide bunee: “Kalaga wa baEbrania akulumana n'iswe. Tukukusega witabizie twende lugendo lwa bindi bisatu mu kalula kukitila Yehowa, Kalaga weitu kayulo, buno ntatubasile na nsambo nkali nu myene za nganda.”
4 Farao Mukota wa Misri ababwide bunee: “Musa nu Haruni, kubuni mukutikya bantu mu milimo zabo? Subyazi ku milimo zeinyu.” 5 Nu Farao atendile lingo bunee: “Lola, bantu babano beli beingi, tondo mukubomuzia ku milimo zabo.”
6 Mu busi bubo Farao akakizizie bemanizi bage nu bantu banene ba bantu bunee: 7 “Tamubakase lingo mampempe kubumba mabiliki anga bumwabakitilaga. Bende bobenyene kulonda mampempe. 8 Tondo mwabakakizia kubumba iganzo lya mabiliki mababumbaga lwabusio. Beli basosu, ububo bakusega bunee: ‘Twende kukumbamina Kalaga weitu.’ 9 Ububo talikilazi ungo mulimo kubeli buno tabongwilile buza.”
10 Ububo bemanizi bendile ku bantu nu kubabula bunee: “Bubo bwabwide Farao bunee: ‘Nsyamukase lingo mampempe. 11 Endazi mubenyene kutola mampempe kumwamamone, tondo mulimo weinyu tawakokolwe.”’ 12 Ububo bantu babalangenne kunsania ku kisi kya Misri kulonda bisesa ku kiziki kya mampempe. 13 Bemanizi babasindikile nu kubatendaga bunee: “Musililizie milimo zeinyu za busi na busi anga bumwakitagile gabezagile mampempe.” 14 BaIsraeli babikilwe bemanizi ku banyabo na bangati ba Farao, nu babuzizibwe bunee: “Kubuni tamwasililizie mulimo weinyu wa kubumba mabiliki aba walubi aba lelo, anga bumwakitaga wa kalazi?”
15 Nkungu zezo bemanizi ba baIsraeli bendile ku Farao nu kulila bunee: “Kubuni ukukitila bakobe bobe anga bubo? 16 Tatukukaswa mampempe lingo, nu bakututendaga bunee: ‘Bumbazi mabiliki!’ nu bakobe bobe balibulagwa. Tondo katati keli ka bantu bobe bobenyene.”
17 Tondo Farao abakwide bunee: “Muli basosu, muli basosu. Ububo mukutenda bunee: ‘Tuzige kwenda kukita kayulo ku Yehowa.’ 18 Umpanga, endazi ku mulimo. Tamwakaswe mampempe, tondo bumbazi iganzo lyeinyu lya mabiliki.”
19 Nu bemanizi ba baIsraeli bamonine buno baIsraeli babezaga mu kabebe nunse gabatendwa bunee: “Tamwakokolelwe kena ku iganzo leinyu lya mabiliki lya busi na busi.” 20 Gabatukile ku Farao bakundamenne na Musa nu Haruni mu nzila. 21 Bababwide bunee: “Yehowa amulole nu kumusungia kubuno mwakitile buno twabede anga iyugo ku Farao nu ku bakiti bage, nu mwabikile mwene wa nganda ku maboko mabo buno batwite.”