Kalaga alaga lonio.
6
1 Mu nkungu zezo Yehowa abwide Musa bunee: “Kano kaluma wamone buni bunakite ku Farao. Nakite buno eitabizie bantu bane bende, ee, na magala mane nakite buno abapumbie kubatikya mu kisi kyage.” 2 Kalaga abwide Musa bunee: “Nne nili Yehowa. 3 Nabaside Abrahamu nu Isaka nu Yakobo n'izina lyane Kalaga Mwiya Mayombo a tondo nsimenyesizie kubeli n'izina lyane Yehowa. 4 Nakokomezizie idagano lyane nabo, kubakasa kisi kya Kanana mubeikalaga bageni. 5 Lingo, nungule kutonga kwa baIsraeli kubakutonga ku kabamba ka bukobe bwabo bubakandwa na baMisri. Nu nakengede idagano lyane. 6 Kasi utende ku baIsraeli bunee: ‘Nne, u Yehowa, namutikye ku kisanga kya milimo mibibu kya baMisri, namukandule ku bukobe. Namukulule na kuboko kwane kwa magala mu nsungio nnene. 7 Namutole inyuwe buno mwabe bantu bane, nu nne nabe Kalaga weinyu, nu mwamenye lebelebe buno Nne nili Yehowa, Kalaga weinyu, ukumutikya ku kisanga kya milimo mibibu kya baMisri. 8 Namubasie ku kisi kinalumbide Abrahamu nu Isaka nu Yakobo buno nabakasa kyo. Namukase kyo anga ntiko zeinyu. Nne nili Yehowa.”’
9 Musa abutendile ku baIsraeli, tondo tabongwilide Musa ku kabamba ka kutamba mitima nu ka bukobe bubibu.
10 Yehowa atendile ku Musa bunee: 11 “Enda utende Farao mukota wa Misri buno asige baIsraeli batuke mu kisi kyage.”
12 Tondo Musa abwide Yehowa bunee: “BaIsraeli tabannungwilide. Buni bwannungwilile Farao nu nne nkutetuma?”
13 Yehowa atendede baIsraeli nu Farao mukota wa Misri ku Musa nu Haruni, nu abakakizizie kutikya baIsraeli mu Misri.
Kibuti kya kikanga kya Musa nu Haruni.
14 Babano beli bakulu ba bikalo byabo: Rubeni u nkula z'israeli abezaga na bana banazi, u Hanoki, Palu, Hezironi, nu Karmi. Babo beli beisi ba bikanga bya Rubeni.
15 Simeoni abutile bana mutuba, u Yemueli, Yamini, Ohadu, Yakini, Zohari, nu Sauli, u mwana wa mukikulu muKanana. Babo beli beisi ba bikanga bya Simeoni.
16 Mamano meli meina ma bana ba Lawi, u Gersoni, Kohati, nu Merari. Myaka za kalamo ka Lawi zabezaga myaka lukama makumi masatu nu mutubakamo. 17 Gersoni abutile bana babili, u Libuni nu Simei, babede beisi ba bikanga mu kikanga kya baLawi.
18 Kohati abutile bana banazi, u Amramu, Izihari, Hebroni, nu Uzieli. Myaka za kalamo ka Kohati zabezaga myaka lukama makumi masatu n'isatu.
19 Merari abutile bana babili, u Mali nu Musi. Babano beli bikanga bya baLawi mu bikanga byabo.
20 Amramu asongile mubitu wage, u mukinga w'isi, wamubutide Haruni nu Musa. Myaka za Amramu zabezaga myaka lukama makumi masatu nu mutubakamo.
21 Bana ba Izihari babezaga Kora, Nefegi, nu Zikiri.
22 Bana ba Uzieli babezaga Misaeli, Elisafani, nu Sitiri.
23 Haruni asongile Eliseba, mukinga wa Aminadabu nu mubitu wa Nasoni. Eliseba abutile Nadabu, Abihu, Eleazari nu Itamari.
24 Bana ba Kora babezaga Asiri, Elkana, nu Abi-Asafu. Babano beli bikanga bya baKora.
25 Eleazari mwana wa Haruni asongile mukinga umozi wa babo ba Putieli, wamubutide Finehasi. Babano beli bakulu ba bikanga bya baLawi.
26 Babano u beli wozo Haruni nu wozo Musa babwidwe na Yehowa bunee: “Tikyazi baIsraeli mu kisi kya Misri mu bikanga byabo.” 27 Babo u batendile ku Farao, mukota wa Misri, kutikya baIsraeli mu Misri, u Musa nu Haruni.
Haruni, mutenzi wa Musa.
28 Gatendile Yehowa ku Musa mu Misri, 29 amutendile bunee: “Nne nili Yehowa. Bula Farao, mukota wa Misri, bunsania bunakubula.”
30 Tondo Musa akwide Yehowa bunee: “Buni bunanungwa Farao, kubuno nkutetuma?”