7
1 Nu Yehowa abwide Musa bunee: “Lola, nakubikile anga Kalaga ku Farao; nu Haruni, solonzi, eli mulengania wobe. 2 Tenda binsania binakukakizie, nu solonzi Haruni abibule ku Farao buno azige baIsraeli batuke mu kisi kyage. 3 Nalimbanie mutima wa Farao buno gube mubibu, nu nitizie tulolesio nu miganogano zane mu kisi kya Misri, 4 tondo Farao ntamungwilile. Nu nne nabike kuboko kwane ku kisi kya Misri nu na nsungio ningi natole mayombo mane, u bikanga bya baIsraeli, kubitikya mu Misri, 5 nu baMisri bamenye buno nili Yehowa mu nkungu zinalambye kuboko kwane ku Misri kutikya baIsraeli munkatini mwabo.” 6 Musa nu Haruni bakitile bubo, anga bwabakakizizie Yehowa. 7 Musa abezaga na myaka makumi kinana, nu Haruni abezaga na myaka makumi kinana nu isatu gabatendile ku Farao.
8 Yehowa abwide Musa nu Haruni bunee: 9 “Ndi Farao amubula bunee: ‘Mukite mugeleko,’ nkungu zezo bula Haruni bunee: ‘Tola musumbo wobe nu wise gansi lwabusio lwa Farao, nu wabe nzoka.”’
10 Musa nu Haruni beingide ku Farao, nu bakitile anga bwabakakizizie Yehowa. Haruni eisile musumbo wage gansi lwabusio lwa Farao nu mitonge zage, nu wabede nzoka. 11 Nkungu zezo Farao amanine beiya menge nu bagila bage, nu baganga ba Misri bakitile nu bo bubo na buganga bwabo. 12 Beisile misumbo zabo gansi, na muntu na muntu wage, nu zabede nzoka, tondo musumbo wa Haruni wamenine misumbo zabo.
13 Mutima wa Farao wabede mubibu, nu Farao ntabongwilide anga bwatendile Yehowa.
Lusungio lutangi.
14 Yehowa abwide Musa bunee: “Mutima wa Farao guli mubibu. Ntakuziga bantu bende. 15 Enda ku Farao nindunindu. Akwenda ku luuzi, nu umulindile ku mutili wa luuzi nu kukulumana nage. Wende na musumbo wagalukile kuba nzoka ku kuboko kobe, 16 nu mubule bunee: ‘Yehowa, Kalaga wa baEbrania ansinga kuguli kutenda bunee: “Itabizia buno bantu bane bende kunkumbamina mu kalula. Aaba nu kano kaluma ntukungwa.” 17 Yehowa akutenda bunee: “Ku bubuno wamenye buno nili Yehowa: Na musumbo guli ku kuboko kwane nalibule mazi ma luuzi, nu magaluke kuba mikila, 18 nu byena bya mu luuzi byakue nu luuzi lwabe n'iyugo, nu baMisri basombe kunua mazi ma lulo luuzi.””’
19 Yehowa abwide Musa bunee: “Tenda Haruni bunee: ‘Tola musumbo wobe nu lambya kuboko kobe ku mazi mansania ma Misri, ma nuuzi zabo, nu ku myasa nu tunuabalongo nu biziba byabo binsania, nu mazi mabyo magaluke kuba mikila. Mikila zabe mu kisi kinsania kya Misri, aba nu malega ma miti nu ma makozi.”’ 20 Musa nu Haruni bakitile anga bwabakakizizie Yehowa. Haruni azanzwide musumbo wage lwabusio lwa Farao nu mitonge zage, nu agulibwide mu mazi ma luuzi, nu mazi mansania ma kisi magalukile kuba mikila. 21 Byena bya mu luuzi byakule, nu luuzi lwabede n'iyugo, nu baMisri tabavwamine kunua mazi ma luuzi, kubuno mikila zabezaga kunsania mu kisi kya Misri.
22 Tondo bagila ba Misri bakitile bubo na buganga bwabo, nu mutima wa Farao wabede mubibu, nu ntongwilide Musa nu Haruni anga bwatendile Yehowa.
23 Farao agalukile, eingide mu numba zage, nu ntakengede kampa mu mutima wage. 24 BaMisri bansania bombile bwigi na luuzi Nile buno bamone mazi ma kunua, kubuno tabavwamine kunua mazi ma luuzi.
Lusungio lwa mitende.
25 Gakukile bindi mutubakamo kumbusa kwalibwide Yehowa luuzi,