8
1 Yehowa abwide Musa bunee: “Enda ku Farao umubule bunee: Yehowa akutenda bunee: ‘Ziga bantu bane bende kunkitila. 2 Ndi ntwitabizia buno bantu bane bende, nti nasinge mitende ku kisi kyobe kinsania. 3 Luuzi lwitile mitende, nu zabase mu numba zobe, mu busio bwobe bwa kwiyombeka, nu lingo ga mugu wobe. Zabase lingo mu numba za bantu bobe bansania, nu mu mapika nu mu bilunga. 4 Mitende zavwe gantata gobe nu ga bantu, ga bakobe bobe bansania, nu ga mitonge zobe.”’ 5 Nu Yehowa abwide Musa bunee: “Tenda ku Haruni buno alambye kuboko nu musumbo wage ku nuuzi nu ku biziba binsania bya mazi, nu bakamia mitende ku kikyo kisi kya Misri.” 6 Ububo Haruni alambizie kuboko ku mazi ma Misri, nu mitende zabakamine. Zakukide kisi kya Misri. 7 Tondo bagila bakitile nu bo bubo na buganga bwabo. Babakamizie mitende gantata ga kisi kya Misri.
8 Ububo Farao amanine Musa nu Haruni, nu abatendile bunee: “Segazi Yehowa antikizye mitende ku bantu bane, nu nazige bantu bende kukasa Yehowa kisansa.”
9 Musa abwide Farao bunee: “Nitabizia kukusegela ndi wasombola nkungu nkizi za kumusegela, uwe nu bakiti bobe nu bantu nu mitonge, nu namusegele buno mitende zituke mu numba zeinyu nu zisigale tugu mu luuzi.”
10 Farao akwide bunee: “Lubi.”
Musa amwakwide bunee: “Busoga buwatenda, nu wamenye takuli ungo anga Yehowa, Kalaga weitu. 11 Lubi mitende zatuke mu numba zobe, nu mu numba za bantu bobe bansania, nu zasigale mu luuzi tugu.”
12 Musa nu Haruni batukile mu numba za Farao. Kumbusa Musa asegile ku Yehowa ku kabamba ka mitende zaalusizie ku Farao. 13 Nu Yehowa akitile bwasegile Musa. Mitende zakule mu numba nu ku milungu nu mu masoa. 14 Bantu bazikundamanizie bibombo bibombo, nu kisi kyabede n'iyugo. 15 Tondo nkungu zamonine Farao buno kuli kyumuno, alimbanizie mutima wage buno ntongwilile Musa nu Haruni, anga bwatendile Yehowa.
Lusungio lwa mibuli.
16 Nu Yehowa abwide Musa bunee: “Tenda ku Haruni bunee: ‘Lambya musumbo wobe kulibula mukungu wa kisi,’ nu kunsania mu kisi kya Misri nti mukungu wabe mibuli.” 17 Bakitile bubo, nu galambizie Haruni kuboko nu musumbo wage nu kulibula mukungu wa kisi, mibuli zavule ku bantu nu ku nyama. Mukungu unsania wa kisi wabede mibuli mu kisi kinsania kya Misri. 18 Tondo bagila bagelekile kukita bubo, tondo tabavwamine; nu mibuli zabezaga ku bantu nu ku nyama.
19 Ububo bagila babwide Farao bunee: “Kikino kili mulimo wa Kalaga.” Tondo mutima wa Farao wasigede mubibu, anga bwatendile Yehowa.
Lusungio lwa byengele.
20 Yehowa abwide Musa bunee: “Yuka lukesikesi, nu emana lwabusio lwa Farao gaakuvwa ku mazi, umubule bunee: ‘Yehowa akutenda bunee: “Itabizia buno bantu bane bende kunkitila. 21 Nu ndi ntwaziga, nasinge bibombo bya byengele kuguli nu ku bantu bobe, nu mu numba zeinyu. Byengele bikeizazia numba nu kukukila nsi geli bantu bobe. 22 Busi bubo nalekanukye kisi kya Goseni mukwikalaga bantu bane, buno byengele tabibe gago, buno umenye Nne nili Yehowa, Kalaga wa kisi kikino. 23 Nkubika kwengukania gasamba bantu bane nu bantu bobe. Lubi nti iganogano lilino likuba.””’
24 Yehowa akitile bubo. Bibombo binene bya byengele byingide mu numba za Farao nu mu numba za bakiti bage, nu kisi kinsania kya Misri kyabigile ku kabamba ka byengele.
25 Farao amanine Musa nu Haruni, nu abatendile bunee: “Endazi mukase kisansa ku Kalaga weinyu mu kisi.”
26 Musa akwide bunee: “Tabwakulungana tukite bubo. Kungwa twakasana kisansa ku Yehowa, Kalaga weitu, nti baMisri banakisomba. Ndi buli busoga kumukasa kisansa kibakusomba ku meiso mabo? Ndi tabanatwisa makozi? 27 Twatunganana kwenda lugendo lwa bindi bisatu mu kalula nu kukasa Yehowa, Kalaga weitu kisansa kuko.”
28 Farao amutendile bunee: “Nitabizia buno mwende kukasa Yehowa, Kalaga weinyu kisansa mu kalula, tondo tamwende bulazi nunse. Munsegele.”
29 Musa amwakwide bunee: “Ganatuke mu numba zobe nti nakusegele ku Yehowa buno bibombo bya byengele bitukile Farao nu ku bakiti bage nu ku mitonge zage. Tondo Farao eidange buno ntatwengelele lingo nu ntazige twende kukasana ku Yehowa kisansa.”