Lusungio lwa lukuo lwa nyama
9
1 Yehowa abwide Musa bunee: “Enda ku Farao umubule bunee: ‘Yehowa, Kalaga wa baEbrania akutenda bunee: “Siga bantu bane bende kunkumbamina. 2 Ndi wasomba bende nu kwizizia kubakanda, 3 nti Yehowa alusie lusambo lukali ku bituganwa byeinu, ku farasi nu mpunda nu ngamia, ku ngombe nu mikoko nu bituganwa bili mu isoa. 4 Tondo Yehowa alekanukye bituganwa bya baIsraeli na bibyo bya baMisri, buno takwakue kimozi kya baIsraeli.””’ 5 Yehowa asombwede nkungu zabase lusambo, nu atendile bunee: “Lubi Yehowa akukita kitondo kikino mu kisi.” 6 Gakede busi Yehowa akitile kyo, nu bituganwa bya baMisri binsania byakule, tondo ku bibyo bya baIsraeli takwakule kimozi. 7 Farao asingile bantu kutambula nu bamenyine buno takwakule kituganwa kimozi kya baIsraeli, ta kimozi. Tondo Farao asigede na kulimbania mutima wage, nu ntazigile baIsraeli bende.
Lusungio lwa muute.
8 Nu Yehowa abwide Musa nu Haruni bunee: “Tolazi lwito lw'iyambi lya keiya na maboko meinyu, nu Musa alwise kwigulu lwabusio lwa Farao. 9 Nu lwito lwabe mukungu mukeke kunsania mu Misri, nu muute makali mabasile bantu bansania nu bituganwa binsania mu kisi kinsania.”
10 Batolile lwito lw'iyambi lya keiya, nu bemanine lwabusio lwa Farao. Musa alwisile kwigulu nu lwalusizie muute ku bantu nu ku nyama. 11 Bagila tabavwamine kwemana lwabusio lwa Musa ku kabamba ka muute mabezaga kubeli nu ku baMisri bansania. 12 Tondo Yehowa alimbanizie mutima wa Farao, nu Farao ntongwilide Musa nu Haruni, anga bwatendile Yehowa.
Lusungio lwa mbula za makozi.
13 Yehowa abwide Musa bunee: “Yuka lukesikesi, wemane lwabusio lwa Farao. Mubule bunee: ‘Yehowa, Kalaga wa baEbrania atenda bubuno: Itabizia buno bantu bane bende kunkitila. 14 Ku nkungu zeno nasinge magala mansania ma lusungio lwane kuguli nu ku mitonge zobe nu ku bantu bobe bansania, buno mumenye buno takuli ungo anga Nne mu kisi kinsania. 15 Songo nalambizie kuboko kwane kuguli nu kulibula bantu bobe na lusambo lukali, songo mwakule kalazi bansania. 16 Tondo lebelebe nakuzanzula ku kabamba kakano, buno nalolesie bwangato bwane muguli, nu buno izina lyane lyasambalwe mu kisi kinsania. 17 Kano kaluma ndi ukwisakika ku bantu bane nu ntukuziga buno bende? 18 Ububo lubi ku nkungu zezo nalokye mbula za lubula lunene nunse zitebezaga mu Misri kutukila bindi bya kulinga kwakyo aaba nu lelo. 19 Ukinsa singa kwingizia bituganwa byobe binsania mu mikumba zabyo kubilanga, kubuno binsania byasigala kumbuga, nu bantu bansania basigala kumbuga nti balokwe na lubula lukali nu lunene nu bakue.”’
20 Mitonge za Farao zakule bwatendile Yehowa boba zingizizie bakiti babo nu bituganwa byabo mu numba, 21 nu babo basombile bwatendile Yehowa basigile bakiti nu bituganwa byabo kumbuga mu idambo.
22 Nu Yehowa abwide Musa bunee: “Lambya kuboko kobe kwigulu buno mbula za lubula ziloke kunsania mu Misri, ku muntu nu ku kituganwa, nu ku biyikanwa binsania bili mu masoa.” 23 Galambizie Musa musumbo wage na kuboko kwage kwigulu, mbula za lubula zalokile. Yehowa azilokezye gamozi na nkuba, nu mikenzi zabasile gansi nunsania. Yehowa alokezye mbula nnene za lubula mu kisi kya Misri. 24 Mbula za lubula zalokile, nu mikulumino zazuminezumine, nu mikenzi zakelimine nunse kwigulu nu gansi. Kutukila kulinga kwa kisi kya Misri takwabezaga kisoa anga kikyo ku bukali bwakyo. 25 Kunsania ku Misri lubula lwitile binsania byabezaga mu masoa gansi, bantu nu bituganwa nu biyikanwa, nu lwatikizye nsamba ku miti insania. 26 Kibe kimozi kya kisi tugu takyabezaga na mbula za lubula, u kibe kya Goseni kwabezaga baIsraeli.
27 Farao amanine Musa nu Haruni, nu ababwide bunee: “Nagile limbizi lilino; Yehowa eisanana, nu nne nu bantu bane tuli bagi. 28 Segazi Yehowa; kubuno nkuba nu mbula za lubula zakuka kutuli. Namuzigile kwenda, tamwasigale lingo.”
29 Musa akwide bunee: “Nkungu zinatuke mu mwino nalambye kuboko kwane mu masego ku Yehowa, nu lubula nu nkuba zalekele buno umenye kisi kinsania kili kya Yehowa. 30 Tondo nizi buno uwe nu mitonge zobe tamwakue Yehowa boba.”
31 Kitani nu shayiri byazikibwa nunsania, kubuno shayiri zabezaga zise zakolama, nu kitani kyabezaga kise kyagata. 32 Tondo ngano nu mumpunge tabyazikibwa kubuno matubulo mabyo mabezaga bulazi nu tabyabezaga bwigi na kukolama. a
33 Musa asigile Farao nu abasile mu mwino. Alambizie maboko mage ku Yehowa, nu nkuba nu mbula za lubula zalekede, nu mbula tazalokile lingo ga kisi. 34 Gamonine Farao buno mbula za lubula nu nkuba zasila, itide kwaga. Farao gamozi na mitonge zage balimbanizie mitima. 35 Ububo mutima wa Farao walimbanizibwe nunse, nu ntazigile baIsraeli bende, anga bwatendile Yehowa mu kanua ka Musa.