Lusungio lwa nzige.
10
1 Yehowa abwide Musa bunee: “Enda ku Farao, kubuno nalimbanizie mutima wa Farao nu za mitonge zage, buno ninavwama kukita miganogano zane munkatini mwabo, 2 buno munavwama kusambalila bana beinyu nu bayukulu beinyu, ee, munavwama kubasambalila migeleko zane zinakitile nu buni bunakitide baMisri bubi, buno mumenye buno nili Yehowa.” 3 Ububo Musa nu Haruni bendile ku Farao nu bamubwide bunee: “Yehowa, Kalaga wa baEbrania atenda bunee: ‘Ukusombaga kwibotya kundi aaba nu ku busi bukizi? Itabizia buno bantu bane bende kunkitila. 4 Ndi ntwaziga bende nti lubi nkulusia nzige mu myaga za kisi kyobe. 5 Zakukile kisi buno muntu ntamone ku kisi, nu zalie bibyo byasigede ku mbula za lubula, nu zalie muti na muti ukukolamaga biguma. 6 Zizazie numba zobe nu za mitonge zobe nu za bantu bobe bansania, u numba insania za baMisri. Zabe ningi buno bwingi bwazo tabwamonekile ko ku basoinyuwe aba basonguluinyuwe aaba kutukila nkungu zalingile kisi kya Misri aaba nu lelo.”’ Musa agalukile nu asigile Farao.
7 Bakiti ba Farao bamubwide bunee: “Aaba nu ku nkungu nkizi muntu wono abe itega kutuli? Ziga baIsraeli beli bamulume bende kukitila Yehowa, Kalaga wabo. Ntukumenya buno Misri zikuzika?”
8 Nu Musa nu Haruni bamaninwe kusubania ku Farao, nu Farao ababwide bunee: “Endazi kukumbamina Yehowa, Kalaga weinyu. Tondo ba nazi bakwenda?”
9 Musa akwide bunee: “Iswe bansania tukwenda na bana beitu nu bakungu beitu, na basikila beitu nu bakinga, gamozi na mikoko zeitu nu ngombe, kubuno bwatunganana tukitile Yehowa kisagulo.”
10 Farao amwakwide bunee: “Yehowa abe gamozi n'inyuwe anga bunkumuzigila kwenda na bakikulu nu bana beinyu. Idangazi kubuno bubi buli lwabusio lweinyu. 11 Kasi ta bubo! Endazi inyuwe muli bamulume tugu mukumbamine Yehowa weinyu, kubuno mwatundaga bubo.” Nu Musa nu Haruni bapumbizibwe ku Farao.
12 Yehowa atendile Musa bunee: “Lambya kuboko kobe ku Misri buno nzige zibe mukyo kinsania nu kulia bisugu binsania bili mu masoa, u binsania byasigede ku kisoa kya lubula.”
13 Ububo Musa alambizie kuboko kwage ku Misri, nu Yehowa apupizie lumpumpu lwatukile kuko kukutukaga kisongo kya busi, nu lwapupile busi bubo bunsania nu kindi kinsania. Gabede nindunindu lwalusizie nzige. 14 Nzige zabede mu kisi kinsania kya Misri, ee, kunsania mukyo mu ndenge insania zakyo, nu zabede ningi. Bwingi bwazo bwatingile nunse maganzo mazo bingo bindi binsania byabezaga bantu mu Misri kutukila kulinga kwa kisi kikyo, nu tabwabe lingo aaba nu ku milyalya. 15 Zakukide nsi insania aaba nu kisi kyabede mwizi ku kabamba kazo. Zalide bisugu binsania bya masoa nu biguma nu nsamba za miti insania, u binsania byasigede kumbusa kwa kisoa kya lubula. Takwasigede lusamba lumozi, aba muti aba kitogo kimozi kya mu isoa mu kisi kinsania kya Misri.
16 Farao amanine Musa nu Haruni lubilo, nu abatendile bunee: “Nagide Yehowa, Kalaga weinyu nu inyuwe. 17 Kano kaluma namusega kunsigilila bwagi lingo limbizi nu kunsegela ku Yehowa, Kalaga weinyu buno antikizye lukuo luluno.”
18 Nu Musa atukile lwabusio lwa Farao, nu asegile ku Yehowa. 19 Nu Yehowa agalukizye lumpumpu buno lwapupile kutuka ku kwendaga kisongo kya busi nu lwabede lukali nu lwatikizye nzige insania mu Misri nu kuzipumbia mu Kitatenge Kyakisimana. Takwasigede nzige emozi, t'emozi, mu kisi kinsania kya Misri. 20 Tondo Yehowa alimbanizie mutima wa Farao, nu ntazigile baIsraeli bende.
Lusungio lwa kapilo.
21 Yehowa abwide Musa bunee: “Lambya kuboko kobe kwigulu buno kapilo kakukile Misri, u kapilo ka kwitubibwa kuko.” 22 Ububo Musa alambizie kuboko kwage kwigulu, nu kapilo kakali nunse kakukide Misri insania musi nu kindi bindi bisatu. 23 Tabamonenne ko, nu takuli muntu umozi watukile mu kiziki kyage ku bindi bisatu, tondo baIsraeli babezaga na kyengi mu biziki mubeikalaga.
24 Farao amanine Musa nu amutendile bunee: “Endazi mukitile Yehowa. Mikoko zeinyu nu ngombe zeinyu zisigale kuno, tondo endazi bansania gamozi na bakikulu nu bana.”
25 Musa akwide bunee: “Bwatunganana witabizie twende na bituganwa byeitu binsania buno bibe bisansa nu tuyulo twa kugisia kubikasana ku Yehowa, Kalaga weitu. 26 Tukwenda na bituganwa byeitu binsania. Tatukusiga kyondo kimozi. Twatunganana kukumbamina Yehowa, Kalaga weitu nabyo, nu tatwizi kyasombole aaba nu twabasa kuko.”
27 Tondo Yehowa alimbanizie mutima wa Farao nu ntazigile bende. 28 Farao atondile Musa bunee: “Tuka kwane, nu widange ntumone ku meiso mane lingo, kubuno busi bubo buukummona ko nti wakua.”
29 Musa amwakwide bunee: “Busoga bubo. Nsikakumona ko lingo.”