Lusungio ku nkula.
11
1 Yehowa abwide Musa bunee: “Nkulusia lungo lusungio lumozi ku Farao nu ku baMisri, buno amuzige kwenda. Nkungu zamuzigile kwenda amupumbie nunse. 2 Tenda ku baIsraeli bansania basege bintu bya feza nu bya olo, muntu na muntu abisege ku munyage, nu mukikulu na mukikulu ku munyage.” 3 Yehowa akasile bantu mponga ku baMisri. Lingo wozo Musa abezaga munene nunse mu Misri, ku meiso ma bakiti ba Farao nu ku meiso ma bantu.
4 Musa atendile bunee: “Yehowa akubula bunee: ‘Bwigi na nkungu mutuba za kindi nkutinga mu Misri, 5 nu nkula insania zili mu kisi kya Misri zikukua, kulinga na nkula za Farao ukwikala ga kisumbi kyage kya bukota aaba nu ku nkula za kalemba a kakugoga na makozi mu numba zage, nu lingo nkula za nyama insania. 6 Nu idilo linene likuba kunsania mu Misri, idilo litebezaga lingo nu litakaba lingo. 7 Tondo munkatini mwa baIsraeli tamwagume mboa emozi, kutagumina muntu aba nyama, nkungu zezo nti mwamenye buno Yehowa akwengukania gasamba baMisri nu baIsraeli. 8 Nkangala zeno insania zili zobe nti zangelele nu kunkumbamina kunsega bunee: “Endazi, uwe nu bantu bobe bansania.” Nu kumbusa kwa bubo nti natuke mu kisi kyobe.”’ Nu Musa atukile ku Farao na bongoa bukali.