Kulinga kwa Kisagulo ky'Isuluko.
12
1 Yehowa abwide Musa nu Haruni gababezaga mu Misri bunee: 2 “Mwezi wono wabe kumuli mwezi mutangi, u mwezi wakulinga mwaka weinyu. 3 Mutende ku kilongo kinsania kya baIsraeli buno busi bw'ikumi bwa mwezi wono batole kyana kya mukoko, na muntu na muntu anga buli kikanga kyage. 4 Ndi kikanga kili kikeke nu takinalia kyana kinsania kya mukoko, muntu uli bwigi na munyage nti batole kyana anga buli iganzo lya bantu mu numba zabo. Baganze na muntu na muntu anga bwakulia ku kitondo kya kyana kya mukoko. 5 Kyana kya mukoko kyabe geteli kabalibango, mulume wa mwaka umozi tugu, mwakitikye mu lusumba lwa mikoko aba lwa mpene. 6 Mwakilange aaba nu busi bw'ikumi nu binazi bwa mwezi wono, nu musanganano unsania wa baIsraeli wakisese mwigolo. 7 Batole ku mikila za kyana kya mukoko nu kuzitila ku miima ibili za mwingilo wa numba nu ga kitiko kya gantata ga lwibi lwa numba mubakilie. 8 Mu kindi kikyo balie misuna zokibwa ga keiya gamozi na kampampa katagaga nu bitogo bili lubaba anga nsyogo. 9 Tamukilie kibisi aba kuyikwa na mazi, tugu kyokibwa ga keiya, nu itoe lyakyo gamozi na magulu nu binsania byakyo. 10 Tamusige kampa kukyo aaba nu nindunindu, tondo kikyo kyasigala aaba nu nindunindu mwakigisie na keiya. 11 Bubuno bumwakilie, nu bibunda byeinyu byakandwa na nsulu, nu bisalapata byeinu ku magulu meinyu, nu misumbo zeinyu ku maboko. Mwakilie lubilo; kili isuluko lya Yehowa. 12 Mu kindi kikyo natinge mu Misri nu nkwita nkula za bantu nu za nyama, nu nkusungia tulaga tunsania twa Misri; nne nili Yehowa. 13 Mikila zabe kumuli kakengelezio ku nibi za numba mumwikalaga; nu nne tondo, kungwa namona ku mikila nti namusuluke, nu nsyamusungie ganasungie Misri.
14 Busi bubo bwabe kumuli busi bwa kukengelaga buni bunakitide baMisri. Bwabe kumuli kisagulo kya Yehowa ku bibuti byeinu binsania ku milyalya. 15 Bindi mutubakamo mwalie tumpampa tutagaga. Busi butangi nti mwatikye mugago mu numba zeinyu, nu wozo walie kampampa kagaga kutukila busi butangi aaba nu busi bwa mutubakamo, nti atikibwe ku bantu bane u baIsraeli. 16 Busi butangi nti mwabe na musanganano wasililila, nu lingo ku busi bwa mutubakamo mwabe n'ungo musanganano wasililila. Tamukite mulimo wa lukita lunsania mubo tondo kulongeka idia lya muntu na muntu, bubo u bumwakite. 17 Mulange kisagulo kikino kubuno mu buno busi natikizye mayombo meinyu mu kisi kya Misri. Mulange busi buno ku bibuti byeinu na mulembe wa milyalya. 18 Kutukila kindi ky'ikumi nu binazi aaba nu ku kindi kya makumi mabili nu kimozi mwalie tumpampa tutagaga. 19 Ku bindi bibyo mutubakamo tamube na mugago mu numba zeinyu. Ndi muntu unsania alia kyagaga, wozo muntu nti atukibwa mu kilongo kya baIsraeli, ndi eli mugeni aba ndi abutwa mu kisi kyeinyu. 20 Tamulie kyampa kyagaga mu bindi bibyo. Kunsania kumwikale tamulie kyagaga.”
21 Musa amanine bakulu ba baIsraeli nu ababwide bunee: “Endazi musombole byana bya mikoko ku bikanga byeinyu, mubisese kisansa ky'isuluko. 22 Mutole lutabi lwa hisopo, nu kulubika mu mikila zili mu lupepe nu kuzitila ku kitiko kya gantata ga lwibi nu ku miima ibili zalo. Takubase muntu umozi kumbuga kwa numba zage aaba nu nindunindu. 23 Kubuno gakutinga Yehowa kusungia baMisri nu kumona ku mikila ku kitiko kya gantata nu ku miima za lwibi lulo, nti ntazige mwiti kwingila mu zizo numba zeinyu nu kumwita. 24 Kitondo kikino kibe kumuli mulembe wa milyalya, kumuli nu ku bibuti byeinu binsania. 25 Gabe muse mwingila mu kisi kyamukasa Yehowa anga bwamulagile, mulange kisagulo kikino. 26 Gakamubuzia bana beinyu bunee: ‘Bwisulilwa bukizi bwa kisagulo kikino?’ 27 Nti mwabatende bunee: ‘Kili kisansa ky'isuluko lya Yehowa wasulukile numba za baIsraeli mu kisi kya Misri, geitile baMisri nu konia numba zeitu.”’ Nu bantu bakumbile mazu nu bakumbaminne Kalaga. 28 BaIsraeli bakitile anga bwakakizizie Yehowa ku Musa nu Haruni.
Lukuo lwa Nkula.
29 Ku nkungu za mutuba mu kindi, Yehowa eitile nkula insania za baMisri, kulinga na nkula za Farao wabezaga mwangati aaba nu nkula za mukandwa wabezaga mu kikando, nu nkula insania za bituganwa byabo. 30 Farao nu mitonge zage zinsania nu bantu bage bansania ba baMisri bayukile mu kindi, nu kwabezaga idilo inene nunse kunsania ku Misri, kubuno takwabezaga numba emozi geteli muntu wakule.
31 Mu kindi Farao amanine Musa nu Haruni, nu abakakizizie bunee: “Emanukazi, tukazi mu kisi kyane, inyuwe nu baIsraeli bansania, mwende kukitila Yehowa anga bumwasegile. 32 Mwende na lusumba lwa mikoko nu bibombo bya ngombe. Lingo, munkase mponga.”
33 BaMisri basindikile baIsraeli buno batuke mu kisi lubilo, kubuno bakengede bunee: “Iswe bansania tuli bakuzi.” 34 BaIsraeli batolile bugali bwabo bwa ngano butegaga, nu babwekile ga bituli byabo mu mpepe zabo za kupota zagondilwe na nsulu. 35 BaIsraeli bakitile anga bwabakakizizie Musa. Basegile ku baMisri bikagi bya feza nu bikagi bya olo nu nsulu. 36 Yehowa akitile buno baMisri bakwilide baIsraeli mponga ububo bakasile baIsraeli binsania bibasegile, nu bubo bakatile bikagi bya baMisri.
Kutuka kwa baIsraeli mu Misri.
37 BaIsraeli batukile Ramesesi nu bendile ku Sukoti. Iganzo lyabo lyabezaga bwigi na bamulume tununu mutuba bendaga na magulu, geteli kuganza bakikulu nu bana. 38 Bango bantu beingi bendile nabo, nu bendile na lusumba lunene nunse lwa mikoko nu bibombo binene bya ngombe. 39 Batukile mu Misri na bugali bwa ngano, nu bakitile tumpampa tutagaga nabo kubuno bugali tabwabezaga na mugago. Bapumbizibwe kutuka lubilo mu Misri nu tabavwamine kwizizia kwikanina idia. 40 Kwikala kwa baIsraeli kubeikede mu Misri kwakukile myaka nkama inazi nu makumi masatu. 41 Ku busi bubo kwakukile myaka nkama inazi nu makumi masatu, bubo busi lebelebe, bantu ba Yehowa batukile ku Misri mu mayombo mabo. 42 Yehowa abalangile mu kindi kikyo buno tabakue mu Misri. Ku kabamba kako baIsraeli batunganana kulanga buno busi bube kakengelezio ka Yehowa mu bibuti byabo binsania bikaba.
Milembe za Kisagulo ky'Isuluko.
43 Yehowa abwide Musa nu Haruni bunee: “Wono guli mulembe wa Kisagulo ky'Isuluko: mugeni unsania ntalie kukyo nunse. 44 Mukiti unsania u mwakunzile kungwa mwamumonesia nti alie kukyo. 45 Tondo mugeni aba mukiti wakuligwa lukalilo nti tabalie kukyo. 46 Mwatunganana kukilia mu numba emozi, nu kutabasa kumbuga kwa numba nakyo. Nu tamutande makwa makyo. 47 Kilongo kinsania kya baIsraeli kyalie. 48 Mugeni wikala n'inyuwe nu watunda kulia ku isuluko lya Yehowa, bamulume bage bansania bamonesibwe nu kumbusa mwitabizie akilie nu abe anga babo babutilwe mu kisi, kubuno muntu unsania utamonesibwa ntalie kukyo. 49 Milembe zeno zili ku babo babutwa mu bikanga bya baIsraeli nu ku bageni beikalage munkatini mweinyu.” 50 BaIsraeli bansania bakitile anga bwabakakizizie Yehowa na Musa nu Haruni. 51 Mu bubo busi Yehowa atikizye baIsraeli mu Misri, na muntu na muntu na kyage kikanga.