Nkula insania zili za Yehowa.
13
1 Yehowa atendile ku Musa bunee: 2 “Nnengezie nkula za bamulume insania zabutwa kumuli, za bantu nu za nyama; zili zane.” 3 Nu Musa abwide bantu bunee: “Kengelazi buno busi bumwatukile mu Misri, u kisi kya bukobe, kubuno Yehowa amutikizye mukyo na magala nu bwangato bwage bunene. Tamulie mu busi bubuno kampampa kagaga. 4 Lelo, ku mwezi wa Abibu, mwatuka ko. 5 Nkungu zikamwingizia Yehowa mu kisi kya Kanana, u kisi kya baKanana nu baHiti nu baAmori nu baHivi nu baYebusi, u kisi kyamulagile Yehowa buno amukase kyo, u kikyo kiyala na mabele nu buuki, nti mwalanga kisagulo kikino ku mwezi wono. 6 Bindi mutubakamo mwalie tumpampa tutagaga, nu busi bwa mutubakamo bwabe busi bunene bwa kisagulo ku Yehowa. 7 Mulie tumpampa tutagaga bindi mutubakamo. Kinsania kyagaga takimonekeko, nu mugago taumonekeko kumuli nunsania mu kisi kyeinyu kinsania. 8 Busi bubo bulazi bana beinyu bunee: ‘Tukukita bubo ku kabamba ka bwatukitide Yehowa nkungu zatutikizye mu Misri.’ 9 Kukita bubo kwabe kumuli kalolesio ku maboko nu ku malanga buno milembe za Yehowa zibe mu tunua tweinyu, kubuno Yehowa amutikizye mu Misri na kuboko kwage kwa magala. 10 Mwatunganana kulanga mulembe wono ku nkungu zago na mwaka na mwaka.
11 Nkungu zikamwingizia Yehowa mu kisi kya baKanana nu kumukasa kyo, anga bwamulagile n'idumbilo lili kumuli nu ku basoinyuwe, 12 nti mwakasa Yehowa nkula insania; nu nkula insania za bituganwa byeinu zili balume zili za Yehowa. 13 Mwakulule nkula za mpunda na kyana kya mukoko, nu ndi tamwaziga kuzikulula, nti mwazibela ikosi. Nkula za muntu na muntu munkatini mweinyu, nti akululwe.
14 Mu nkungu zikakubuzia mwana wobe bunee: ‘Bwisulilwa bukizi bwakyo?’ Umubule bunee: ‘Na magala mage Yehowa atutikizye mu Misri, kututikya mu kisi kya bukobe. 15 Gananine Farao nu kutaziga twende, Yehowa eitile nkula insania mu Misri, nkula za bantu nu nkula za nyama, nu ku kabamba kako nkukasana ku Yehowa nkula za nyama zili balume, nu kukulula nkula zili bamulume ba bantu.’ 16 Kukita bubo kwabe kumuli anga kalolesio keli ku kuboko aba ku malanga meinyu kumukengelezia buno Yehowa wenyene atutikizye mu Misri na kuboko kwage kwa magala.”
Iyango lya kimpa nu lya keiya.
17 Nkungu zazigile Farao buno baIsraeli bende, Kalaga ntabasondelezizie ku nzila za baFilistini tondo zabezaga bwigi, kubuno Kalaga atendile bunee: “Ndi bamona ku bita baneiyania nu kusubania ku Misri.” 18 Kasi Kalaga abatimbizie mu nzila za Kitatenge Kyakisimana; baIsraeli batukile mu Misri bite ngabo zabo.
19 Musa ekile makwa ma Yosefu gamozi nabo, kubuno Yosefu abalumbizizie idumbilo; ababwide bunee: “Lebelebe Kalaga akavwa kumukasia, nu mwatunganana kweka makwa mane gamozi n'inyuwe gamukatuka gano.” 20 Bendile kutuka ku Sukoti, nu beiyombekile ido ku Etamu, ku mwaga wa kulinga kalula. 21 Yehowa endile lwabusio lwabo, mu musi mu iyango lya kimpa nu mu kindi mu iyango lya keiya kubasanizia kyengi buno banavwama kwenda musi nu kindi. 22 Iyango lya kimpa mu musi nu lya keiya mu kindi talyatukile lwabusio lwabo.