Kusoka Kitatenge Kyakisimana.
14
1 Yehowa abwide Musa bunee: 2 “Tenda ku baIsraeli buno batimbuke nu kulongeka ido lyabo lwabusio lwa Pi-Hahiroti, gasamba Migidoli nu kitatenge, bwigi na Bali-Sefoni; gago balongeke ido lyabo bwigi na kitatenge. 3 Farao anakengela buno baIsraeli bazangazanga mu kisi kyongo nu beli anga bakandwa mu kalula. 4 Nalimbanie mutima wa Farao buno abayange, tondo natanunwe ku kabamba ka Farao nu mayombo mage; nu baMisri bamenye buno nili Yehowa.” Bubo u bwakitile baIsraeli. 5 Mukota wa Misri asambalidwe buno baIsraeli batinine, nu mutima wage nu wa bakiti bage zazangilezangile, nu beibuzizie bunee: “Twakitile kikizi? Twasigile baIsraeli bende nu tabakutukitila lingo mulimo!” 6 Nu Farao alongekile tuyanga twage nu endile na mayombo mage mansania. 7 Endile na tuyanga twage tusoga nunse nkama mutuba, nu tungo tuyanga tunsania twa baMisri na bemanizi ba to bansania. 8 Yehowa alimbanizie mutima wa Farao, u mukota wa Misri, nu ayangile baIsraeli, bendaga na kwikaka. 9 BaMisri, u bendaga ga farasi nu mu tuyanga, bemanizi nu mayombo mansania, bayangile baIsraeli, nu babasangile mu ido lyabo bwigi na kitatenge, bwigi na Pi-Hahiroti lwabusio lwa Bali-Sefoni.
10 Nu gabezaga Farao nu bakoloboyo bage bese bavwa, baIsraeli gababamonine ko, bakule boba nunse nu balilile ku Yehowa. 11 Babwide Musa bunee: “Ndi watubasizie gano kukua mu kalula kubuno takwabezaga nsinda mu Misri? Watutikizye mu Misri kutukitila kikizi? 12 Ndi tatwakutendile mu Misri bunee: ‘Tulekele buno tukitile baMisri?’ Bunabede busoga kutuli kukitila baMisri kutinga kuvwa kukua mu kalula!”
13 Musa akwide bantu bunee: “Tamukue boba; emanazi, nu lelo mwamone lonio lwa Yehowa, kubuno babo baMisri bamukumonako lelo tamwabamoneko lingo nunse aaba ku milyalya. 14 Yehowa amwitanine, tondo mwikale kibibi.”
15 Nkungu zezo Yehowa abwide Musa bunee: “Kubuni ukulila kundi? Tenda ku baIsraeli buno bende lwabusio. 16 Nu uwe, uzanzule musumbo wobe nu lambya kuboko kobe gantata kitatenge nu kyabeganibwe buno baIsraeli basoke mukyo kyakama. 17 Nu Nne nalimbanie mutima wa Farao nu mitima za bakoloboyo bage nu babayange mu kitatenge. Nu natanunwe ku kabamba ka Farao nu mayombo mage, ka tuyanga twage nu bakwendaga ga farasi. 18 BaMisri bamenye buno Nne nili Yehowa ganasile kutanunwa ku kabamba ka Farao nu ka bantu bage bendaga ga farasi.”
19 Nkungu zezo mwanzelo wa Kalaga wendaga lwabusio lwa baIsraeli wasigelede kwemana kumbusa kwabo, nu iyango lya kimpa lyatukile ku lwabusio lwabo nu lyasigede kumbusa kwabo, 20 kusigala gasamba baIsraeli nu baMisri. Mu kindi kinsania lyasanizie kyengi ku baIsraeli nu kapilo ku baMisri, buno mu kindi tabakundane.
21 Musa alambizie kuboko kwage gantata ga kitatenge, nu kindi kikyo kinsania Yehowa asindikile kitatenge na lumpumpu lukali lwatukaga kuntata, nu akitile buno kitatenge kyabede kilongo kyakama. Mazi ma kitatenge malekanukizibwe. 22 Nu baIsraeli batingile munkatini mwa kitatenge ga bilongo byakama, nu mazi mabede anga bitutu ku seidume nu ku seikazi. 23 BaMisri bayangile baIsraeli, nu Farao nu bakoloboyo bage beingide kumbusa kwa baIsraeli, na tuyanga twabo tunsania nu farasi insania, munkatini mwa kitatenge. 24 Mu mukelo kutukila iyango lya kimpa nu keiya, Yehowa alolile ku mayombo ma baMisri mu kitatenge, nu abazangiziezangizie bansania ba mayombo mabo. 25 Akitile buno ngondangonda za tuyanga twabo zakakile, nu tazendaga lubilo. BaMisri babulenne bunee: “Tutine baIsraeli. Kubuno Yehowa wabo abeitanina na baMisri.”
26 Nkungu zezo Yehowa abwide Musa bunee: “Lambya kuboko kobe gantata ga kitatenge, buno mazi makundamane lingo ku baMisri, ku tuyanga twabo, ku farasi zabo, nu ku bantu bendaga ga farasi.” 27 Ububo Musa alambizie kuboko kwage gantata ga kitatenge, gakede busi, kitatenge kyakulumenne lingo. BaMisri babezaga bakutina, nu Yehowa abakindile mu kitatenge. 28 Mazi makyo makundamenne lingo nu makukide baMisri bayangaga baIsraeli mu kitatenge, mayombo ma Farao mansania, bendaga mu tuyanga twabo, nu bendaga ga farasi zabo; takwasigede wampa kubeli, ta umozi.
29 Tondo baIsraeli batingile ga bilongo byakama munkatini mwa kitatenge, nu mazi mabede anga bitutu kubeli ku seidume nu ku seikazi. 30 Busi bubo Yehowa akulwide baIsraeli ku maboko ma baMisri, nu baIsraeli bamonine ku bakuzi ba baMisri ku muse wa kitatenge. 31 Gamonine baIsraeli ku magala ma Yehowa maakitide baMisri, bakule Yehowa boba nu bakatizizie Yehowa nu mukiti wage Musa.