Lwimbo lwa Musa
15
1 Nkungu zezo Musa nu baIsraeli beimbide Yehowa lwimbo luluno: “Nimbile Yehowa kubuno akindile ku lutanuno lwage. Eisile farasi nu bendaga gazo mu kitatenge. 2 Yehowa eli magala mane nu lwimbo lwane, nu lingo eli lonio lwane. We eli Kalaga wane, nu nne namuganune, nu eli Kalaga wa batatane, nu namutanune nunse.
3 Yehowa eli ipuka lya bita, ee, izina lyage lili Yehowa.
4 Eisile tuyanga twa Farao nu mayombo mage mu kitatenge,
mapuka ma bakoloboyo ba Farao bakokile mu Kitatenge Kyakisimana.
5 Maziba mazindu mabakukide, nu bakokile anga makozi.
6 Ee Yehowa, kuboko kobe kwa seidume kuli na lutanuno nu magala, ee Yehowa, kuboko kobe kwa seidume kwabungwide beiti.
7 Ku bwingi bwa magala mobe wagusizie babo bemanine kuguli; Wasingile bongoa bobe bukali, u bwabagisizie anga mpepa.
8 Lumpumpu lwobe lukali lwasakikizie mazi buno mabede anga kitutu; Nu mazi ma maziba mazindu meikandile anga makozi munda mwa kitatenge.
9 Mwiti atendile bunee: ‘Nkuyanga nu kubasanga, nabeganie bikagi, nu kutola binsania binatunda. Nkukata mwene wane wa nganda, nu kubazikya na kuboko kwane.’
10 Tondo wopide na lumpumpu lwobe nu kitatenge kyabakukide; nu bakokile mu mazi mengi anga nanga z'ikozi.
11 Ee Yehowa, munkatini mwa tulaga tunse nazi uli anga uwe? Nazi uli anga uwe, mwiya lutanuno ku kwisanana kwobe, wozo ukukubwa boba ku lutanuno lwage, ukukitaga miganogano?
12 Walambizie kuboko kobe kwa seidume nu kisi kyabamenine.
13 Ku kyombo kyobe wasondelezizie bantu bawakulwide; wabasondelezizie na magala mobe ku kiziki kyobe kyasililila.
14 Bantu ba bilongo bongule nu bagiliminne na boba; kabebe kakatile baFilistini.
15 Bakota ba baEdomu bakule boba nunse; nkangala za Moabu zagiliminne; bantu bansania baKanana balubikenne.
16 Boba, ee, kukua boba nunse kwababaside. Ku kabamba ka magala mobe mawabalolesizie, beikale kibibi anga ikozi aaba nu bantu bawakulwide batinge. Ee Yehowa, aaba nu bantu bawakulwide batinge.
17 Wingizie bantu bobe nu kubabasia ga mwiduko wa bwiyani bwobe. Ee Yehowa, wababasie mu kiziki mu wikalaga, ee Yehowa, kiziki kyasililila kiwakokomezizie.
18 Yehowa akangata ku milyalya zitanakuzinda.
19 Kubuno geingide farasi za Farao nu bendaga mu tuyanga nu ga farasi mu kitatenge, Yehowa asubizie mazi ma kitatenge nu kubakukila namo, tondo baIsraeli bendile mu nzila zakama munkatini mwa kitatenge.”
20 Nu Miriamu mulengania mukikulu, u mubitu wa Haruni, atolile nzenze zage, nu bakikulu bansania bamuyangile na nzenze zabo nu kumina. 21 Miriamu abeimbide lwimbo luluno: “Imbilazi Yehowa kubuno akindile ku lutanuno lwage. Eisile mu kitatenge farasi nu bendaga gazo!”
Mazi ma Mara nu Elimu
22 Musa asondelezizie baIsraeli kutuka ku Kitatenge Kyakisimana, nu beingide mu Kalula ka Suri. Bendile lugendo lwa bindi bisatu mu kalula nu tabamonine ku mazi. 23 Mu nkungu zibavule ku kiziki kyamanagwa Mara tabavwamine kunua mazi makyo kubuno mabezaga lubaba. Ububo izina lyakyo lili Mara.
24 Bantu bakitide Musa manungunungu, batendile bunee: “Twanue kikizi?”
25 Nu Musa alilile ku Yehowa, nu Yehowa amulolesizie muti. Awisile mu mazi, nu mazi magalukile nse. Yehowa abakakizizie mulembe nu abalindikile gago. 26 Ababwide bunee: “Ndi mukungwilila nunse iyuki lya Yehowa, Kalaga weinyu nu kukita busoga ku meiso mage, ndi mukungwilila milembe zage nu kulanga makakizio mage mansania, nti nsyamubike nsambo insania anga bunabikile ku baMisri, kubuno nili Yehowa ukumwonia.”
27 Bendile lingo nu babasile ku Elimu, gabezaga tunuabalongo ikumi nu tubili nu lingo bibila makumi mutubakamo. Beiyombekile kuko mu ido bwigi na mazi.