Mana nu Nkwale
16
1 BaIsraeli bansania bendile lugendo kutuka Elimu, nu babasile ku Kalula ka Sini, keli gasamba Elimu nu Sinai, ku kindi ky'ikumi nu bitano kya mwezi w'ibili kumbusa kwa kutuka kwabo mu Misri. 2 Mu kalula kako, baIsraeli bansania bakitile manungunungu ku Musa nu Haruni. 3 Babwide Musa nu Haruni bunee: “Songo twakule na kuboko kwa Yehowa mu Misri! Gago twabezaga twikala na nyungu ziyala na misuna, nu twaliaga malia matwatundile nu twembukaga, tondo mwasila kutubasia ku kalula kakano buno mwite bantu babano na nzala.” 4 Yehowa abwide Musa bunee: “Nakolokizye bantu idia lya kwigulu. Bantu bende kusongya lyabakuka na busi na busi. Ububo nabalindike ndi bakite mulembe wane aba kilo. 5 Nu bakakita bubuno: ku busi bwa mutuba nti booze idia lyakuka mambizi mabili ma lilyo lya bingo bindi.”
6 Musa nu Haruni batendile ku baIsraeli bunee: “Mwigolo mwamenye buno Yehowa u wozo wamutikizye mu Misri, 7 nu mu nindunindu mwamone ku lutanuno lwa Yehowa, kubuno ungule manungunungu meinyu ku Yehowa. Nu beiswe, tuli ba nazi buno munakita manungunungu kutuli?”
8 Nu Musa atendile lingo bunee: “Mwamenye buno u Yehowa, gaamukase misuna za kulia mwigolo nu idia lya kumwembukya mu nindunindu, kubuno Yehowa ungule manungunungu mamwamukitide. Nu iswe tuli ba nazi? Manungunungu meinyu tameli kutuli, tondo lebelebe meli ku Yehowa.”
9 Nu Musa abwide Haruni bunee: “Tenda ku musanganano unsania wa baIsraeli bunee: ‘Kundazi ku Yehowa, kubuno ungule manungunungu meinyu.”’
10 Gabezaga Haruni es'atenda kubeli balolile ku kalula nu lutanuno lwa Yehowa lwamonekile ko mu kimpa. 11 Yehowa atendile ku Musa bunee: 12 “Nungule manungunungu makitaga baIsraeli. Babule bunee: ‘Mwigolo mwalie misuna, nu mu nindunindu mwembuke na kampampa, nu mwamenye lebelebe buno Nne nili Yehowa, Kalaga weinyu.”’
13 Bwabede buno mwigolo nkwale zabasile nu zabezaga kunsania mu ido lyabo, nu mu nindunindu mame mabezaga gansi kunsania. 14 Gatukile mame kwamonekile byindi bikeke byingi byabilingana anga lubula byasigede gansi. 15 Gabamonine kubyo, baIsraeli beibuzanizie bwabo bwabo bunee: “Bili bikizi?” Kubuno tababimenyine bili bikizi.
Musa atendile bunee: “Bibino bili idia lyamukasile Yehowa buno mulie. 16 Bubuno u bwamukakizizie Yehowa bunee: ‘Muntu na muntu asongye bwanalia, luzi lumozi a ku muntu na muntu anga buli maganzo ma bantu ba numba zage.”’
17 BaIsraeli bakitile bubo. Bamozi basongizye byingi, nu bango bikeke. 18 Nu gabalindikile byo na luzi, we wasongizye byingi ntatingile byakuka ku bantu ba numba zage, nu we wasongizye bikeke nteidile ku meiyanino ma bantu ba numba zage; basongizye muntu na muntu bwanalia.
19 Musa ababwide lingo bunee: “Muntu ntasige kampa ku nindunindu.” 20 Tondo bamozi tabongwilide Musa, nu basigile milanga ku nindunindu, nu zabasile mikuso nu kuga. Ububo Musa abongedwe.
21 Balisongagia nindunindu na nindunindu, na muntu na muntu anga bwanalia. Gabasile musi mukali lyanyengukile. 22 Ku busi bwa mutuba basongizye idia mambizi mabili, u nzi ibili ku muntu na muntu, nu bemanizi ba bantu bavule kulolesia Musa. 23 Ababwide bunee: “Bubo u bwakakizizie Yehowa bunee: ‘Lubi buli busi bwasililila nu bwa kumunwa, busi bwisanana ku Yehowa. Okyazi limokie, nu yikazi limwayike. Lilyo lyasigala, nti walibike milanga ku nindunindu.”’
24 Nu balangile lyo aaba nu nindunindu, anga bwakakizizie Musa, nu talyugile iyugo nu talyabede na mikuso. 25 Musa ababwide bunee: “Liazi lilino lelo, kubuno lelo buli busi bwa kumunwa ku Yehowa. Tamwamone kulyo lelo gansi. 26 Mwalisongagie ku bindi mutuba, tondo ku busi bwa mutubakamo, u Busi bwa Kumunwa, u Sabato, nti kubo takwabe lyampa.”
27 Tondo bantu bamozi bendile ku busi bwa mutubakamo kulisongya, nu tabamonine ku lyampa. 28 Nu Yehowa atendile ku Musa bunee: “Ku nkungu nkizi mukusomba kwanza makakizio mane nu milembe zane? 29 Mwatunganana kukengela buno Yehowa amukasile busi bwa Sabato, u bwa kumunwa. Ku kabamba kako akumukasaga ku busi bwa mutuba tumpampa twakuka ku bindi bibili. Na muntu na muntu eikale mu numba zage ku busi bwa mutubakamo. Ta umozi utuka mu kiziki kyage.” 30 Ububo bantu bomwinwe ku busi bwa mutubakamo.
31 BaIsraeli balimanine bunee: Mana. b Lyabezaga lyenga anga mbuto za bunyonyo, nu kusonda kulyo kwabezaga anga bitumbula byakitilwe na buuki. 32 Musa atendile bunee: “Kikino u kitondo kya Yehowa kyasengezizie bunee: ‘Tolazi mbusu nu izaziazi zo na mana, nu kubikila bibuti byeinu buno bamone ku idia linamulisagia mu kalula nkungu zinamutikizye kutuka ku kisi kya Misri.”’ 33 Musa abwide Haruni bunee: “Tola mbusu nu bika luzi lumozi lwa mana muzo, nu zibike lwabusio lwa Yehowa kuzilanga ku bibuti byeinu.” 34 Anga bwakakizizie Yehowa ku Musa, bubo u bwabikile Haruni mbusu na mana muzo lwabusio lwa Bulongeki, buno zilangwe. 35 BaIsraeli balide mana myaka makumi manazi, aaba nu gabeingide mu kisi kyabezaga mu bantu. Balide mana aaba nu gababasile ku mwaga wa Kanana. 36 Luzi lulo lwa kulindika mana, u omeri, luli kyindi ky'ikumi kya efa, anga lungo luzi lwabo. c