Musa abasia mazi mu ikozi.
17
1 Kilongo kinsania kya baIsraeli kyatukile mu Kalula ka Sini, nu kyendile anga bwakakizizie Yehowa, nu kyakitile ido ku Refidimu, tondo takwabezaga mazi ma kunua ku bantu. 2 Nu bantu basakile na Musa. Bamutendile bunee: “Tukase mazi ma kunua.” Musa abakwide bunee: “Kubuni mukunsakya? Kubuni mukulindika Yehowa?” 3 Tondo bantu bakule na mpusia gago; bakitile manungunungu ku Musa, nu bamubuzizie bunee: “Kubuni watutikizye mu Misri? Kubuni ukutwita, iswe nu bana beitu nu bituganwa byeitu na mpusia?”
4 Nkungu zezo Musa alilile ku Yehowa bunee: “Buni bunikita na bantu babano? Beli kayikayika kunisa makozi.”
5 Nu Yehowa akwide Musa bunee: “Enda lwabusio lwa bantu na bakulu babo bamozi. Kata wozo musumbo wobe u walibwide kitatenge. 6 Lola, nemane lwabusio lwobe gago bwigi n'ikozi lya Horebu; a libula ikozi lilyo, nu mazi matuke mu ikozi buno bantu banue.” Nu Musa akitile bubo lwabusio lwa bakulu ba baIsraeli. 7 Amanine kiziki kikyo Masa, b nu Meriba,c ku kabamba ka nsake zabo nu kugeleka Yehowa gabatendile bunee: “Ndi Yehowa eli n'iswe? Aba ndi nteli n'iswe?”
BaAmaleki bakindwa.
8 BaAmaleki bavule kwitana na baIsraeli ku Refidimu. 9 Musa abwide Yosua bunee: “Sombola bantu bamozi, nu wende kwitana na baAmaleki. Lubi nemane gantata ga mwiduko na musumbo wa Kalaga mu kuboko kwane.”
10 Ukinsa Yosua eitenne na baAmaleki anga bwamukakizizie Musa, nu Musa, Haruni nu Huri babakamine gantata mwiduko. 11 Mu nkungu zasakikile Musa musumbo na kuboko kwage baIsraeli bakindile, tondo nkungu zabotezie Musa maboko mage baAmaleki bakindile. 12 Nu maboko ma Musa mabede mazitu, nu Haruni nu Huri batolile ikozi nu beikazizie Musa galyo, nu bazanzwide maboko ma Musa, umozi kwa seidume kwage nu ungo kwa seikazi kwage buno maboko mage malindile aaba nu kwida kwa busi. 13 Nu Yosua azikizye baAmaleki na mwene wa nganda.
14 Yehowa abwide Musa bunee: “Sanza kitondo kikino mu kigondi kya mukanda buno bantu bakikengelage, nu kitende lebelebe ku Yosua, kubuno nkuzikya nunsania baAmaleki mu kisi, buno tabongubweko lingo.” 15 Musa obakile kasenga ka kayulo, nu akeinikile buno: Yehowa-Nisi,d 16 nu atendile bunee: “Kubuno maboko masakikwa ga kisumbi kyage, Yehowa akeitanaga na baAmaleki ku kibuti na kibuti.”