Yetoro atabangila Musa.
18
1 Yetoro, sankoga wa baMidiani nu isibyala wa Musa, ungule ku binsania byakitile Kalaga ku Musa nu ku bantu bage baIsraeli, nu buni bwabatikizye mu Misri. 2 Yetoro avule ku Musa na Zipora, mukikulu wa Musa wasingile Musa kumusubya ku isi, 3 gamozi na bana bamulume babili. Izina lya nkula lyabezaga Gersomi,a kubuno Musa atendile bunee: “Nabezaga mugeni mu kisi kiteli kyane.” 4 Izina lya ungo lyabezaga Eliezeri, b kubuno atendile bunee: “Kalaga wa tatane abezaga mukasia wane. Anonezie ku mwene wa nganda wa Farao.” 5 Wozo Yetoro avule ku Musa na mukazi wage nu bana bage gabezaga Musa ku ido lyage mu kalula bwigi na mwiduko wa Kalaga. 6 Yetoro asingile mugenzi ku Musa kumutenda bunee: “Nne Yetoro, sobyala, nkuvwa kuguli na mukazi wobe nu bana bage babili.”
7 Ububo Musa endile kukulumana n'isibyala. Akumbile itoe nu amumumine ku matama. Babuzanizie misagu, nu beingide mu numba za hema za Musa. 8 Musa asolede isibyala bunsania bwakitaga Yehowa ku Farao nu baMisri ku kabamba ka baIsraeli, nu mbabazio insania zababaside mu nzila, nu buni bwabonezie.
9 Yetoro abogilebogile ku busoga bunsania bwakitide Yehowa ku baIsraeli gaabatikizye mu maboko ma baMisri. 10 Atendile bunee: “Yehowa aganunwe wamwonezie kutuka mu kuboko kwa Farao nu kwa baMisri. 11 Kano kaluma nizi buno Yehowa eli munene kutinga tulaga tunsania, kubuno akitile bubo ku kabamba ka lwikotio lwa baMisri gababengile baIsraeli.” 12 Nu Yetoro isibyala wa Musa avule na kisansa kya kugisibwa nu bingo bisansa ku Kalaga, nu Haruni avule gamozi na bakulu bansania ba baIsraeli kulia idia gamozi n'isibyala wa Musa lwabusio lwa Kalaga.
Musa abika ngatu
13 Gakede busi, Musa eikede ga kisumbi kya ngatu, kusungia bantu, nu bantu batimbile Musa kutukila mu nindunindu aaba nu mwigolo. 14 Mu nkungu zamonine isibyala wa Musa buni bwakukitila bantu, abwide bunee: “Buni buukukitila bantu? Kubuni ukwikala uwenyene nu bantu bansania bakutimba kutukila nindunindu aaba nu igolo?”
15 Musa akwide isibyala bunee: “Kubuno bantu bakuvwa kundi kubuzia ku Kalaga. 16 Kungwa beli na bitondo bakuvwa kundi, nu nne nkwatula gasamba muntu na munyage, nu nkubalolesia makakizio ma Kalaga nu milembe zage.”
17 Isibyala wa Musa amubwide bunee: “Kitondo kyukukita takili kisoga. 18 Uwe nu babo bakuvwa kuguli mwakutwe nunse, kubuno kitondo kikino kili kinene kukutinga. Ntunavwama kukikita uwenyene. 19 Ungwilila kano kaluma iyuki lyane linkukwana, nu Kalaga abe nobe: ube mulongeki wa bantu ku Kalaga nu ulusie bitondo bibibu ku Kalaga, 20 nu wabeigisie makakizio nu milembe, nu wabalolesie nzila zibatunganana kutabanga muzo nu mulimo gubatunganana kukita. 21 Nu lingo sombola munkatini mwa bantu bansania beiya menge bakukua Kalaga boba, bantu ba bulili bakusomba mutali guteisanana, nu ubabike buno babe bangati ba tununu, nu bangati ba nkama, nu bangati ba makumi matano nu bangati ba bantu ikumi. 22 Babe ngatu za kusungia bantu ku nkungu insania. Kungwa beli na kitondo kinene, nti bavwa nakyo kuguli, tondo kitondo na kitondo kikeke batule bobenyene. Bubo bwabe busoga kutinga kuguli, nu beeke muzigo gamozi nobe. 23 Ndi wakita bubo nu Kalaga akukakizia bo, nti bubo walinde, nu bantu babo bansania bende kwabo na bubobelelo.”
24 Musa eitabizizie iyuki ly'isibyala, nu akitile bunsania bwatendile. 25 Musa asombwede beiya menge ku baIsraeli kuba bangati nu bemanizi, bemanizi ba tununu, bemanizi ba nkama, bemanizi ba makumi matano, nu bemanizi ba bantu ikumi. 26 Batwide bitondo bya bantu ku nkungu insania. Bitondo bibibu bavule nabyo ku Musa.
27 Musa asindikizie isibyala mu lugendo lwage lwa kusubya kwage.