BaIsraeli babasa ku Sinai.
19
1 Ku busi butangi bwa mwezi w'isatu kumbusa kwa kutuka mu Misri, baIsraeli bavule ku Kalula ka Sinai. 2 Kumbusa kwa kutuka ku Refidimu, bavule ku Kalula ka Sinai, nu bakitile ido lyabo mu kalula lwabusio lwa mwiduko. 3 Musa abakamine mwiduko kuli Kalaga, nu Yehowa amumanine ku ntonga za mwiduko, nu amubwide bunee: “Bubuno u buukatonda ku kikanga kya Yakobo, nu buukasambalila baIsraeli: 4 ‘Inyuwe mwamonine bunakitide baMisri, nu buni bunamwekile anga ga byupi bya ndiu nu buni bunamusondelezizie kundi. 5 Kano kaluma ndi mwanza iyuki lyane nu makakizio mane, nti mwabe anga isuku kundi munkatini mwa bilongo binsania bya kisi, kubuno kisi kinsania kili kyane. 6 Mwabe bukota bwane bwa basankoga nu kilongo kyasililila. Tenda moki mamano ku baIsraeli.”’ 7 Musa asubizie ku bantu nu amanine bakulu babo bansania, nu ababwide moki mansania mamukakizizie Yehowa kubatenda. 8 Bantu bansania babwide gamozi bunee: “Twakite binsania byatenda Yehowa.” Ububo Musa asubanizie ku Yehowa n'iyakulo lyabo. 9 Yehowa abwide Musa bunee: “Nababasile mu kimpa kinene, nu bantu banungwa bunkutenda nobe, bakukatizie aaba nu ku milyalya.” Kumbusa Musa atendile ku Yehowa binsania byatendile bantu.
10 Nu Yehowa akwide Musa bunee: “Enda ku bantu ubengie lelo nu lubi. Basuge nsulu zabo, 11 nu babe kayikayika ku busi bubo bw'isatu, kubuno bubo busi bw'isatu Yehowa agele ku ntonga za mwiduko Sinai nu bantu bansania bamumone ko. 12 Nu uwe wabike myaga ku ntungo insania za mwiduko nu kutenda ku bantu bunee: ‘Mwidange, tamubakame mwiduko nu tamwitubye ku mwaga wago. Muntu unsania witubya ku mwiduko, lebelebe akue.’ 13 Lebelebe eiswe makozi aba misungu, tondo kuboko takwabikwe kweli. Ndi muntu eitubya ku mwiduko, aba nyama, nti eitwe; ntalame lingo. Gatutwe monze nkungu ndazi, nti bakunde ku mwaga wa mwiduko.”
14 Musa agelile ku bantu kutuka ku mwiduko, nu engezie bantu bansania. Basugile nsulu zabo. 15 Nu Musa ababwide bunee: “Mube kayikayika busi bw'isatu. Tamukunde bakikulu.”
16 Nindunindu za busi bw'isatu kwabede mikulumino nu nkuba, nu kimpa kinene gantata mwiduko, nu iyuki inene nunse lya monze. Bantu bansania babezaga mu ido bagiliminne. 17 Musa atikizye bantu bansania mu ido kukulumana na Kalaga, nu bemenne kunsi kwa mwiduko. 18 Mwiduko Sinai unsania wakukidwe na muuki, kubuno Yehowa agelile gantata gago mu keiya. Muuki wago wabakamine anga muuki w'iyambi lya keiya, nu mwiduko unsania watengiletengile nunse. 19 Nu iyuki lya monze lyitide kulila, nu Musa atendile ku Kalaga, nu Kalaga amwakwide na mukulumino. 20 Yehowa agelile ku ntonga kwa mwiduko, nu amanine Musa kuko. Ububo Musa abakamine ku ntonga kwa mwiduko. 21 Nu Yehowa amubwide bunee: “Gela mwiduko nu tonda bantu buno tabatinge mwaga wa mwiduko buno balole ku Yehowa, beingi banavwa kukua. 22 Basankoga babo bakunde Yehowa, beiyengie nu bo, Yehowa anavwa kubazikya.”
23 Musa akwide Yehowa bunee: “Bantu tabanavwama kubakama mwiduko kubuno uwenyene watukakizizie bunee: ‘Bikazi myaga ku mwiduko unsania, nu kengelazi buno guli kizila nunse.”’
24 Yehowa amwakwide bunee: “Gela tugu, nu subya na Haruni gamozi nobe, tondo basankoga nu bantu tabatinge myaga kubakama ku Yehowa, anavwa kubazikya lebelebe.”
25 Ububo Musa agelile ku bantu nu abatendile bubo.