Makakizio ma milembe ikumi
20
1 Nu Kalaga atendile moki mamano mansania bunee: 2 “Nne nili Yehowa, Kalaga weinyu wamutikizye mu Misri, u kisi kimwabezaga mukyo bakobe. 3 Tamube na tungo tulaga lwabusio lwane. 4 Tamwikitile nkisi za kisusania kinsania kili mwigulu aba kili mu kisi aba kili mu mazi mu kisi. 5 Tamukumbame lwabusio lwazo, aba kuzikitila, kubuno Nne Yehowa, Kalaga weinyu, nili Kalaga wa lugi wakubasia lusungio lwa bwagi bwa beisibo ku bana babo nu ku kibuti kya bisatu aba kya binazi kya babo bakunsomba, 6 nu wakukwila kyombo ku tununu twa babo bakunelama nu kwanza makakizio mane. 7 Tamutekule izina lya Yehowa, Kalaga weinyu buliabulia, kubuno Yehowa ntabingie wozo ukutekula izina lyage buliabulia.
8 Mukengele busi bwa Sabato kubulanga anga bwasililila. 9 Kitazi milimo zeinyu nu bitondo byeinu mu bindi mutuba, 10 tondo busi bwa mutubakamo buli bwa kumunwa bwa Yehowa, Kalaga weinyu. Mubo tamukite mulimo umozi, uwe, aba mwana wobe wamulume aba mwana wobe wamukazi, aba mukikulu wobe, aba mukiti wobe wamulume aba mukiti wobe wamukazi, aba mugeni guli munkatini mweinyu. 11 Kubuno ku bindi mutuba Yehowa akitile igulu nu kisi nu binsania bili mubyo, umwinwe busi bwa mutubakamo. Ububo Yehowa abikide Busi bwa Kumunwa, u Sabato, mponga, nu abukitile busi bwasililila.
12 Anzazi basoinyuwe nu banyokoeinyuwe, buno bindi byeinu bibe byingi mu kisi kyamukasa Yehowa, Kalaga weinyu.
13 Tamwite.
14 Tamukite butazi.
15 Tamwibe.
16 Tamwekele muneinyu buza.
17 Tamutonie muneinyu na numba zage; tamutonie muneinyu na mukikulu wage, aba na mukiti wage wamulume, aba na mukiti wage wamukazi, aba na ngombe zage, aba na mpunda zage, aba na kinsania kili kyage.”
Boba bwa bantu.
18 Nu bantu bansania bamonine ku nkuba nu bongule ku mikulumino nu monze, bamonine buno mwiduko ukubasia ndembelela za keiya nu muuki. Gabamonine ku bubo bagiliminne na boba, nu bemanine bulazi na mwiduko. 19 Nu babwide Musa bunee: “Tenda kutuli, uwenyene, nu tungwilile, tondo Kalaga ntatende kutuli tunavwa kukua.”
20 Musa abwide bantu bunee: “Tamukue boba! Kubuno Kalaga avule kumulindika buno kukua Kalaga boba kube kumuli, buno tamwage.”
21 Bantu bemenne bulazi, tondo Musa akundile kapilo kakali mwabezaga Kalaga.
Milembe za nkisi nu tusenga twa kayulo.
22 Yehowa abwide Musa bunee: “Bubuno u buwatende ku baIsraeli: ‘Mwasila kumona buno natenda n'inyuwe kutuka kwigulu. 23 Tamukite tulaga buno tube gamozi na Nne. Tamutule tulaga twa feza aba olo.
24 Nnangilazi kasenga ka bisogo, nu kunkasa kisansa kya kugisibwa gantata ko nu kya bubobelelo, mikoko aba mpene aba ngombe zeinyu. Mu biziki binsania binasombole buno mwakumbamine mubyo nti navwe kumuli nu kumukasa mponga. 25 Ndi mwatunda kunnangila kasenga ka kayulo na makozi, tamukange na makozi mabazwa, kubuno ndi mwalibula kyuma ku ikozi, nti mwalibigia. 26 Tamubakame ga kasenga kane ka kayulo na kyindo, mundulu weinyu unavwa kumoneka ko.”’