Milembe za bakiti nu bakobe.
21
1 Nu atendile lingo bunee: “Zeno zili milembe za kubakakizia: 2 Ndi muntu akunza mukobe uli muEbrania, nti amukitila myaka mutuba, nu mu mwaka wa mutubakamo nti enda mukandulwa. 3 Ndi eingila musimba mu numba zobe, nti atuke musimba; tondo ndi eli na mukikulu gaalinga nobe nti atuke na mukazi wage. 4 Ndi mukota wage amusongela mukikulu, nu amubutila bana bamulume aba bakinga, nti mukikulu nu bana bage beli ba mukota, nu wamulume wenyene akandulwe. 5 Tondo ndi mukobe atenda bunee: ‘Natunda mukota wane nu mukazi wane nu bana bane, nu nsyatunda kukandulwa,’ 6 nti mukota wage ende nage ku Kalaga, a nu gago avwe nage ku lwibi aaba ku iyango lya lwibi nu kubotola kutuzi kwage na kyuma. Kumbusa kwa kukitwa bubo, nti eli mukobe ku kalamo kage kansania. 7 Ndi muntu akunzia mukinga wage kuba kalemba, nti ntatuke anga bukutuka bakobe bamulume. 8 Ndi ntatananizia mukota wage wamusombwede kuba wage, nti eitabizia buno akululwe, tondo ntanavwama kumukunzia ku bageni, kubuno amukitide bubi. 9 Ndi muntu asombolela musikila wage mukinga umozi, nti eingizia wozo mukinga mu numba zage anga mukinga wage wakubuta. 10 Kungwa asonga ungo mukikulu, nti nteida kukasa ku mutangi idia nu nsulu nu bitondo byage by'isonga. 11 Ndi ntamukasa bitondo bibino bisatu, nti amukandula geteli mpolo.
Milembe za misako mibi.
12 Wozo walibula muntu nu akua, nti lebelebe eitwe. 13 Tondo ndi ntabezaga akumukambila nu Kalaga amubika mu kuboko kwage, nti namubikile kiziki ky'itinino. 14 Tondo ndi muntu akambila munyage, nu kumwita, nti mwamutikya ku kasenga kane ka kayulo nu kumwita.
15 Unsania walibula isi aba nina, nti atunganana kwitwa.
16 Unsania wiba muntu nu kumukunzia aba asangwa nage mu kuboko kwage, nti atunganana kwitwa.
17 Unsania walinga isi aba nina, atunganana kwitwa.
18 Ndi bantu basaka, nu umozi alibula munyage n'ikozi aba na kinkunya kyage, nu walibulagwa ntakua tondo asamba na bibyo bituto, 19 nu azanzuka nu kutabanga kumbuga na musumbo wage, nti wozo wamulibwide asigililwa, tondo alige wozo waalibwide ku nkungu zage zaasamba nu kumusakizia nunsania. 20 Ndi muntu alibula mukiti aba kalemba kage na kati aaba nu akua, nti wozo muntu asungibwe. 21 Tondo ndi mukiti aba kalemba asigala nu ntakua ku kindi kimozi aba bindi bibili, nti wozo muntu ntasungibwa, kubuno mukiti nu kalemba beli bikulo byage. 22 Ndi bantu bakusaka nu balibula mukikulu mwimisu nu iyimi lyage lyatuka tondo ntaba na lungo lusambo aba lubaba, nti wozo wamulibwide aliga bikulo anga bwatunda iba wa mukikulu nu anga bwatula ngatu. 23 Tondo ndi mukikulu eli na lungo lusambo aba lukuo, nti lusungio lwabe bumozi, lwabe kutikya kalamo ku kalamo, 24 liso ku liso, linyo ku linyo, kuboko ku kuboko, kugulu ku kugulu, 25 kugia ku kugia, kyulu ku kyulu, bituto ku bituto.
26 Ndi muntu alibula liso lya mukiti wage aba lya kalemba kage, nu kulibugia, nti amukandula ku kabamba ka liso lyage. 27 Ndi muntu alibula linyo lya mukiti aba lya kalemba kage nu kulitikya, nti amukandula ku kabamba ka linyo lyage.
28 Ndi mulume wa ngombe alibula muntu, aba wamulume aba mukikulu, na mega nu wozo muntu akua, lebelebe ngombe zezo ziswe makozi aaba nu zakua nu misuna zazo tazibwe, tondo nyene ngombe ntasungibwe. 29 Tondo ndi mulume wa ngombe agomezie na kulibula na mega nu nyene zo atondilwe na bantu, nu ntaswikile zo, nu ndi zita muntu wamulume aba mukikulu, nti zezo ngombe zitwa na makozi gamozi na nyene zo. 30 Tondo ndi abikilwe idigo anga mwima, nti alige lilyo idigo nu kukulula kalamo kage. 31 Mulembe wono guli ku mulume wa ngombe wita musikila aba mukinga. 32 Ndi mulume wa ngombe eita mukiti aba kalemba na mega, nti ngombe zitwa na makozi nu nyene zo alige mukota wa mukiti aba kalemba byindi bya feza makumi masatu.b
33 Ndi muntu okula kyundundu aba ndi omba kyundundu nu ntakikukila lingo, nu ngombe aba mpunda zakoloka mukyo, 34 nti nyene kyundundu alige bukunza bwazo nu nyama zakule nti zili zage.
35 Ndi mulume wa ngombe eita ngombe z'ungo muntu, nti bakunzia ngombe zezo zitakua nu kubegania bukunza bwazo gabasamba, nu nti babegania zezo ngombe zakua bulingilingi. 36 Tondo ndi bantu bamenyine buno wozo mulume wa ngombe agomezie kulibula engo ngombe na mega nu nyene zo ntamulangile, nyene zo atunganana kuliga ngombe ku ngombe nu zezo zakule zibe zage.”