Kulanga bikulo bya bango.
22
1 Nu atendile lingo bunee: “Ndi muntu iba ngombe aba mukoko nu kuzita aba kuzikunzia, nti asubya ngombe itano ku ngombe emozi, nu kusubya mikoko inazi ku mukoko umozi. 2 Ndi mwibi amoneka akwingila na magala nu alibulwa nu kukua, wozo wamulibwide nteli na katati ka kumwita, ndi alibulwa mu mwizi, 3 tondo ndi akwingila nu kulibulwa nu kukua mu musi, nti wozo wamulibwide eli na katati. Mwibi atunganana kusubya kikyo kyibile. Ndi nteli na kena, nti akunzibwe ku kabamba ka kwiba kwage. 4 Nyama ziibile, aba ngombe aba mpunda aba mukoko, ndi zasangwa ku kuboko kwage tazikua, nti aliga mambizi mabili. 5 Ndi muntu akulisia nyama zage mu kalula aba mu isoa lyage lya mizigi za biguma nu kuzisiga kutingila mu isoa lya ungo muntu, nti aliga bibyo bili bisoga nunse mu kalula aba mu isoa lyage wenyene.
6 Ndi keiya kagulumina nu kugisia mikanda aba mumpunge aba isoa linsania, nti wozo wagulumizizie keiya atunganana kuliga.
7 Ndi muntu akasa munyage bikulo kumulangila byo nu bibwa mu numba za munyage nu mwibi amoneka, nti asubye mambizi mabili. 8 Tondo ndi mwibi ntamoneka nti nyene numba enda lwabusio lwa Kalaga kwatulwa buno tuwakatile ku bikulo bya munyage. 9 Mambizi mansania ma nsake ku kabamba ka ngombe aba mpunda aba mukoko aba nsulu aba kinsania kinavwama kuzimina, nti bobabili bende nakyo ku ngatu lwabusio lwa Kalaga, nu wozo wakindwa alige munyage mambizi mabili ma bukunza bwakyo.
10 Ndi muntu akasa nyama zage zinsania, aba ngombe aba mpunda aba mukoko, ku munyage buno amulangilezo nu zakua aba zakua kyulu aba kulombolwa geteli kumoneka na bantu, 11 nti mulondo waseswe na kilumbilo kya Yehowa gabasamba buno mulangi ntabikile kuboko kwage ku bikulo bya munyage, nyene bikulo eitabizie, u bubo mulangi ntalige kampa. 12 Tondo ndi nyama zibilwe mu numba za wozo wazilangaga, nti lebelebe alige mwiya zo. 13 Ndi zitwa na nyama nkali, nti atole byindi byasigala kuba bulongeki bwage, nu ntalige ku nyama zezo zitwa.
14 Ndi muntu ambya nyama za munyage nu zakua kyulu aba ndi zakua nu nyene zo nteikile go, nti alige. 15 Tondo ndi nyene zo eli go nti ntalige. Ndi ambya nyama, nti bukunza bwa kuziambya bwakuka kuliga kuziminwa nazo.
Milembe za misako mibi za bantu.
16 Ndi wamulume alimbia mukinga utandilwe nu akita nage butazi, atunganana kuliga bikulo byage nu kumusonga. 17 Ndi isi wa mukinga ntaziga kumusongia na wozo wamulume, nti wozo wamulume atunganana kuliga ku isi bikulo bya bukumi.
18 Tamusige kabula kulama.
19 Muntu unsania wakita butazi na nyama atunganana kwitwa.
20 Wozo ukukasana kayulo aba kisansa ku kango kalaga, tugu Yehowa wenyene, atunganana kwitwa nunse.
21 Tamukitile bageni bubi, nu tamubasungie, kubuno mwabezaga bageni mu kisi kya Misri.
22 Tamusungie musigala aba nkubi. 23 Ndi mwabasungia mu makitilo mansania nu balila kundi, nti nitabizie lebelebe idilo lyabo, 24 nu bongoa bwane bwabe bukali nu namwite na mwene wa nganda, nu bakikulu beinyu babe misigala, nu bana beinyu babe nkubi.
25 Ndi mwakasa nsombi ku muzambi wa bantu bane uli gamozi n'inyuwe, tamube anga baligia, tamumubikile mutali. 26 Ndi wakata nsulu za munyobe anga mwima, musubizie zo lwabusio lwa kwida kwa busi, 27 kubuno zili anga bulangeti bwa kukukila mubili wage. Eiyombeke na kikizi? Ndi alila kundi nti namungwilile, kubuno nili mwiya kyombo.
28 Tamulinge Kalaga, a nu tamuswilile mukota wa bantu beinyu.
29 Tamwide kunkasa tuyulo twa nkula za matubulo meinyu nu byeinyu bya mu malega. Nkasazi nkula zeinyu za bamulume, 30 nu kitazi bubo lingo na bituganwa byeinu nu nyama, u ngombe nu mikoko, zisigale na nina bindi mutubakamo, tondo busi bwa kinana nti mwankasa zo.
31 Mwabe bantu bane basililila, ububo tamulie nyama zitwa na nyama nkali za mu lubanda, muzise ku mboa tugu.”