Makakizio ma bwisanana nu kyombo.
23
1 Nu atendile lingo bunee: “Tamusambale misagu za buza. Tamukasie mwagi mu kuba mulongeki wage na buza. 2 Tamuyange bantu beingi mu kukita bubi. Kungwa muntu alongeke mulondo, ntagalukye bwisanana ku kabamba ka bantu beingi, atende bulili tugu. 3 Tamugunie muzambi mu mulondo. 4 Ndi wakulumana na ngombe za musombi wobe aba mpunda zage zazimina, nti wazisubye lebelebe kweli. 5 Ndi wamona ku mpunda za wozo wakusomba zeiyombeka gansi kunsi kwa mizigo zazo, ntuzisige, busoga kuzikasia.
6 Tamugalukye bwisanana bwa muzambi mu milondo zage. 7 Idekanukyazi na mabingo ma buza. Tamwite wisanana aba uteli na bwagi, kubuno nsikalekelela wozo mwagi.
8 Tamukate lukaso lwa lumbisombiso, kubuno lukuziba meiso ma babo bakumona, nu kugalukya moki ma beisanana.
9 Tamubabazie bageni, kubuno mwizi mutima wa mugeni, kubuno mwabezaga bageni mu kisi kya Misri.
Makakizio ma Sabato.
10 Yikazi masoa meinyu nu kukala matubulo meinyu myaka mutuba, 11 tondo ku mwaka wa mutubakamo sigazi bilongo byeinyu kumunwa nu kunagibwa. Gamwakite bubo nti bazambi ba bantu beinyu banalia, nu bibasige nti nyama za mu lubanda zinalia. Kitazi bubo na masoa meinyu ma miti nu ma mizigi za biguma.
12 Kitazi mulimo weinyu bindi mutuba, tondo ku busi bwa mutubakamo umunwazi, ububo ngombe nu mpunda zeinyu zomunwe, nu mukiti wabutwa mu numba zeinyu nu bageni beli munkatini mweinyu bomunwe.
13 Idangazi buno mukite binsania binatendile. Tamutekule izina lya tungo tulaga, nu talyungubwe kulyo mu kanua ka muntu umozi.
Bisagulo bisatu bya mwaka.
14 Mambizi masatu mu mwaka mwatunganana kunkitila busi bunene. 15 Langazi bindi bya tumpampa tutagaga. Bindi mutubakamo nti mwalia tumpampa tutagaga, anga bunamukakizizie. Kitazi bubo mu bindi byasombwedwe bya mwezi wa Abibu, kubuno mu mwezi wozo mwatukile mu Misri. Muntu unsania ntabase kundi bulia, geteli kena. 16 Langazi Kisagulo kya Matubulo n'idia litangi lya matubulo ma masoa mamwayikile. Langazi Kisagulo kya Kukundamania Matubulo ku kuzinda kwa mwaka gamwazindilizie matubulo ma bibyo bimwayikile mu isoa. 17 Na mwaka na mwaka bamulume bansania batunganana kubasa ku Yehowa Mwiya Bwangato Bunsania mambizi masatu, ku bisagulo bibino bisatu.
18 Tamunkase mikila za kisansa gamozi na tumpampa twagaga, nu manona ma bisagulo byane tamasigale kindi kinsania aaba nu ku nindunindu.
19 Vwazi ku numba za Yehowa, Kalaga weinyu n'idia litangi lisoga nunse lya matubulo. Tamuyike kyana kya mpene mu mabele ma nina.
Mwanzelo wa Kalaga amulongekele nzila.
20 Ungwililazi! Nkusinga mwanzelo wane lwabusio lweinyu kumulanga mu nzila nu kumulusia ku kiziki kinamulongekede. 21 Mwidangazi nu kungwilila iyuki lyage. Tamumugune kubuno ntasigilile kuguna kweinyu, kubuno izina lyane lili mweli. 22 Tondo ndi mungwilila iyuki lyage nu kukita binsania byamutenda, nti nabe musombi wa basombi beinyu, nu nitane na babo bakwitana n'inyuwe. 23 Mwanzelo wane wende lwabusio lweinyu kumubasia ku bisi bya baAmori nu baHiti nu baPerisi nu baKanana nu baHivi nu baYebusi, nu nabazikye nunse. 24 Tamukumbame lwabusio lwa tulaga twabo, nu tamutukitile aba kukita makitilo mabo. Mwatunganana kubazikya nu kubugia mango ma tulaga twabo. 25 Kumbaminazi Yehowa, Kalaga weinyu tugu, nu amukase mponga ku idia lyeinyu nu ku mazi meinyu. Natikye lusambo munkatini mweinyu, 26 nu takwabe umozi wa kukolokwa n'iyimi, aba takwabe mugumba umozi munkatini mweinyu. Lingo nasililizie bindi byeinu buno mube bakungu.
27 Nkeitia bantu boba lwabusio lweinyu nu kubazangiazangia nu natimbule migongo zabo nu batine. 28 Nkasinga lusungu lwabusio lweinyu kupumbia baHivi nu baKanana nu baHiti lwabusio lweinyu. 29 Tondo nsikabapumbia lwabusio lweinyu ku mwaka umozi, kisi kinaba na mulali nu nyama za mu lubanda zinaba ningi. 30 Nkabapumbia kakeke kakeke aaba nu gamwitile nu kwiyana kisi.
31 Nkabika mwaga weinyu kutukila Kitatenge Kyakisimana nu ku Kitatenge kya baFilistini aaba nu ku kalula nu ku Luuzi Furati. Nkamukasa bantu ba kisi kikyo nu mukabapumbia lwabusio lweinyu. 32 Tamugomie nabo aba na tulaga twabo. 33 Tamwitabizie buno beikale gamozi n'inyuwe mu kisi kubuno banamusondelezia kunagila, kubuno kukumbamina tulaga twabo kukaba itega kumuli.”