Mukanda w'Idagano nu mikila zalyo.
24
1 Kalaga abwide Musa bunee: “Bakama ku Yehowa, uwe nu Haruni, Nadabu nu Abihu gamozi na bakulu makumi mutubakamo ba baIsraeli; mukumbamine bulazi. 2 Nu Musa wenyene akunde Yehowa, tondo bango tabakunde, nu bantu tababakame gamozi nage.” 3 Musa endile ku bantu nu ababwide bitondo binsania byatendile Yehowa, u moki mage nu makakizio mage mansania. Bantu bamwakwide n'iyuki limozi bunee: “Twakite binsania byatendile Yehowa.” 4 Nu Musa asanzile moki mansania ma Yehowa. Nu ayukile lukesikesi, nu angile kasenga ka kayulo ku kibelekelo kya mwiduko, nu eimikile mango ikumi nu mabili ku bikanga ikumi nu bibili bya baIsraeli.
5 Asingile basikila bamozi ba baIsraeli kukasana bisansa bya kugisibwa nu babikasile gamozi na bisansa bya ngombe bya bubobelelo ku Yehowa. 6 Musa atolile nkindi za mikila mu lupepe, nu nkindi zasigede azisandide ku kasenga ka kayulo. 7 Kumbusa atolile Mukanda w'Idagano, nu agusomine ku bantu. Bakwide bunee: “Twakite binsania byatendile Yehowa, nu twanze.”
8 Nu Musa atolile mikila zabezaga mu lupepe nu azisandide ku bantu nu atendile bunee: “Lolazi mikila z'idagano lya Yehowa lyakitile n'inyuwe ku bitondo bibino binsania.”
9 Musa, Haruni, Nadabu nu Abihu babakamine mwiduko na bakulu makumi mutubakamo ba baIsraeli, 10 nu bamonine ku Kalaga wa baIsraeli, nu kunsi kwa magulu mage kwabezaga anga ikozi lya yakuti ly'idangi ly'igulu, anga igulu geteli bimpa. 11 Kalaga ntabikile kuboko kwage ku babo bakulu ba baIsraeli, tondo bamonine ku Kalaga nu balide nu kunua.
12 Yehowa abwide Musa bunee: “Bakama ku ntonga za mwiduko, wikale na Nne nu nakukase mbavu za makozi ganasanza milembe nu makakizio makubeigisia.”
13 Musa alingile kwenda na Yosua mukiti wage nu abakamine ku ntonga za mwiduko wa Kalaga. 14 Nu abwide bakulu bunee: “Mutulindile gano aaba nu gatwasubye kumuli. Lolazi, Haruni nu Huri beli gamozi n'inyuwe. Ndi kuli muntu uli na mulondo nti enda kubeli.”
15 Gabakamine Musa mwiduko, bimpa byagukukide 16 nu lutanuno lwa Yehowa lwikede ga mwiduko Sinai, ku bindi mutuba bimpa byakukide mwiduko, nu busi bwa mutubakamo Yehowa amanine Musa kutuka mu bimpa. 17 Lutanuno lwa Yehowa lwamonekile ku baIsraeli anga keiya kakugulumina gantata ga mwiduko. 18 Musa abakamine mwiduko nu eingide mu bimpa, nu eikede ga mwiduko bindi makumi manazi, musi nu kindi.