Nkaso za kobaka Numba za Hema.
25
1 Yehowa abwide Musa bunee: 2 “Tenda ku baIsraeli buno bamvwile na nkaso. Wazikate ku kabamba kane ku muntu na muntu uli kayikayika kunkasa zo. 3 Zezo zili nkaso ziwakate kubeli: olo aba feza aba nsubi, 4 aba misinge z'idangi ly'igulu, aba z'idangi lya misamba za mpene, aba zakisimana, aba nsulu za kitani u nsulu nsoga, aba myoza za mpene, 5 aba bikoba bya bilimba bya mikoko byatilwa idangi lyakisimana, aba bikoba bya mpombolo, a aba miti za musita, 6 aba makitib aba mwambo wa kubonga, nu wa nsunu nsoga, 7 aba makozi ma bukunza bunene nu ma kwidebya anga sardoniki nu kibakuli, aba mango makozi ma bukunza bunene ma kubika ku nsulu zikumanwa efodi nu ku nsulu za kukukila bukuba. 8 Nu kumbusa kwa kukasana byo binsania, nti banobakile numba zasililila buno nikale munkatini mwabo. 9 Mobake numba zeno nu binsania byazo ku kisusania kinakulolesie.
Sanduku z'Idagano
10 Munangile sanduku na mbavu za muti wa musita. Bulazi bwazo bwabe mabusu mabili nu kyindi, nu bungulu bwazo ibusu limozi nu kyindi, nu kusakama kwazo ibusu limozi nu kyindi. 11 Muzikukile na olo nsoga nunse, munda nu kumbuga, nu ku ntungo zazo ku ndenge inazi muzitimbe na mwimbo wa olo. 12 Tulazi mpo inazi za olo, nu kuzibika ku magulu manazi ma sanduku, ibili ku lulenge lumozi, nu ingo ibili ku lungo lulenge. 13 Mukite mingolo za muti wa musita, nu kuzikukila na olo, 14 nu kuzingizia mu mpo za sanduku zili ku ndenge ibili zazo, buno bavwame kuzeeka. 15 Mingolo zasigale mu mpo za sanduku. Tazitikibwe nunse. 16 Bika mu Sanduku bulongeki bunamukase.
17 Mukite Kisumbi kya Kyombo na olo nsoga nunse; bulazi bwakyo bwabe mabusu mabili nu kyindi, nu bungulu bwakyo bwabe ibusu limozi nu kyindi. 18 Watule makerubi mabili na olo. Matulwe ku ntonga za bulazi bwa Kisumbi kya Kyombo, nu matulwe na olo bumozi na kyuki. c 19 Tula kerubi umozi ku ntonga emozi, nu engo kerubi ku engo ntonga, nu matulwa na kyindi kimozi kya olo gamozi na kisumbi. 20 Makerubi malambye byupi byamo kwigulu kukukila Kisumbi kya Kyombo, nu malolane nu kulola ku kisumbi kya sanduku. 21 Bika kisumbi ga sanduku, nu bika bulongeki bunakukase muzo. 22 Nu gago, ga Kisumbi kya Kyombo gasamba makerubi mabili, nakulumane nobe nu kukukasa makakizio mane mansania ma kutenda ku baIsraeli.
Meza ma Tumpampa twa kalolesyo.
23 Wakite meza na mbavu za musita; bulazi bwamo bwabe mabusu mabili, nu bungulu bwamo bwabe ibusu limozi, nu kusakama kwamo kwabe ibusu limozi nu kyindi. 24 Wamakukile na olo nsoga nunse, nu wakite mwimbo wa olo wakuzitimbikania ntonga insania. 25 Lingo wakite ku ndenge inazi za meza mbavu za olo za bungulu bw'ikasa limozi, nu kukita kibumbwa kya olo kuzo. 26 Kita mpo inazi za olo nu zibike ku tunkundunkundu tunazi twa meza ku magulu manazi mamo. 27 Bika mpo bwigi na kuntata kwa magulu, nu zibe gago kukata mingolo za kweka meza. 28 Kita mingolo za muti wa musita nu kuzikukila na olo, nu beeke meza nazo. 29 Nu kita mpepe nu mizugo nu makopo nu bibungulu nu bituma byamo na olo nsoga nunse, nu bibungulu nu bituma byamo bili ku mulimo wa kukubula tuyulo. 30 Bika ga meza bindi binsania lwabusio lwane tumpampa twa kumukengelezia buno nili gago.
Kyanikilo kya Kasuku.
31 Wakite kyanikilo na olo nsoga nunse, kikengwe na nondo ku kyindi kimozi, kikalilo kyakyo nu iyango lyakyo, bibungulu byakyo nu nsamba nu maluba makyo makitwe na kyindi kimozi kya olo. 32 Ntabi mutuba zatuke ku ntungo z'iyango lyakyo, isatu ku ntungo emozi, nu ingo isatu ku ntungo z'ibili. 33 Bibungulu bisatu byasusania maluba ma muti wamanwa lozi, bili na maluba nu nsamba byakitwe ku lutabi lutangi, nu bibungulu bisatu bya lukita lulo ku lutabi lw'ibili, nu anga bubo ku ntabi mutuba zatuka ku iyango lya kyanikilo. 34 Nu ku iyango lya kyanikilo lyenyene kitazi bibungulu binazi bili anga iduba gamozi na nsamba nu maluba. 35 Lusamba lwabe kunsi kwa ntabi ibili zatuka ku iyango, nu lungo lusamba lwabe kunsi kw'ingo ntabi ibili, nu lungo lusamba lwabe kunsi kwa ntabi ibili, u nsamba isatu ku ntabi mutuba. 36 Ntabi nu nsamba nu iyango zakyo bikengwe binsania ku kyindi kimozi kya olo nsoga nunse.
37 Wakite matala makyo mutubakamo nu kumabika gakyo buno masanie kyengi lwabusio lwakyo. 38 Tulaso twa kukalakasa ntambi nu mpepe za kutitulilwa ga lwito bikitwe na olo nsoga nunse. 39 Wakite kyanikilo nu binsania byakyo na talanta emozi d za olo nsoga nunse. 40 Lola busoga buno wabikite lebelebe ku kisusania kinakulolesizie ga mwiduko.”