Numba za Hema zasililila.
26
1 Nu atendile lingo bunee: “Lingo kita numba za hema na nsulu ikumi za kitani nsoga zalukwa busoga, nu luka muzo makerubi na misinge z'idangi ly'igulu nu lya misamba za mpene nu lyakisimana, mulimo wa mukulumizi. 2 Nsulu insania zibe bumozi ku bulazi bwa mabusu makumi mabili nu kinana, nu bungulu bwa mabusu manazi. 3 Kulumania nsulu itano gamozi, nu ingo itano gamozi. 4 Kita mpo ku ntungo nzinda za nsulu nzinda, kutukila ku mwimbo wozo mu kiziki kya kukulumanibwa, nu kita bubo ku nsulu nzinda z'ingo itano zakulumanibwa gamozi. 5 Kita mpo makumi matano ku ntungo nzinda za nsulu imozi, nu mpo makumi matano ku ntungo z'ingo nsulu, nu mpo zilolane. 6 Kita pengele makumi matano ma olo, nu kukulumania nsulu na zezo pengele, nu numba za hema zibe emozi. 7 Luka nsulu za myoza za mpene kuba kyuki kya Numba za Hema; luka nsulu ikumi nu emozi. 8 Bulazi bwa nsulu za myoza bwabe mabusu makumi masatu, nu bungulu bwazo bwabe mabusu manazi, nu zezo nsulu ikumi nu emozi zagelame. 9 Wakulumanie nsulu itano gamozi, n'ingo mutuba gamozi, nu kugonda zezo za mutuba munkatini mwazo ku ntungo za lwabusio lwa Numba za Hema. 10 Waluke mpo makumi matano ku ntungo za kuzinda kwa nsulu nzinda za kibombo kimozi, nu mpo makumi matano ku ntungo nzinda za kingo kibombo kya nsulu kuzikulumania. 11 Kita lingo pengele makumi matano za nsubi kukulumania bibyo bibombo bibili buno bibe kimozi tugu. 12 Nu ku kitondo kya kyindi kyatinga Numba za Hema, nti kyazembele kumbusa kwa Numba za Hema. 13 Nsulu zeno za myoza zatinga engo nsulu ku bulazi anga mabusu mabili, nu zazembele bulazi bw'ibusu limozi ku lulenge na lulenge lwa Numba, ga mbavu za Numba za Hema.
14 Nu wakite kyuki kya Numba za Hema na bikoba bya bilimba bya mikoko byatilwa idangi lyakisimana, nu kingo kyuki na bikoba bya mpombolo a kubika gantata ga bingo.
15 Nu wakite mbavu za muti wa Musita buno zimane ku Numba za Hema. 16 Bulazi bwa lubavu lumozi bwabe mabusu ikumi, nu bungulu bwalo bwabe ibusu limozi nu kyindi. 17 Kunsi kwa lubavu na lubavu kita anga magulu mabili. Kita mbavu insania za Numba za Hema mu lukita lulo. 18 Kita mbavu makumi mabili ku lulenge lwa kwidume lwa Numba za Hema. 19 Kita bikalilo makumi manazi bya feza byende gansi kunsi kwa mbavu, kimozi ku kugulu kwa lubavu, u bibili ku lubavu lumozi, ku kugulu na kugulu kikalilo kyako. 20 Ku lungo lulenge lwa Numba za Hema, u lulenge lwa kwikazi, kita mbavu makumi mabili na magulu mazo, 21 nu bikalilo makumi manazi bya feza byazo, bibili ku lubavu na lubavu, bya kubika gansi kunsi kwazo. 22 Ku ntungo za kumbusa za Numba za Hema, u ntungo za kunsi, kita mbavu mutuba, 23 nu kita mbavu ibili za tupindapinda twa numba tuli kumbusa kwazo. 24 Ku tupindapinda tuto mbavu zatunganana kukulumanibwa kulinga gansi aaba nu ku kuzinda kwazo, ku lukita lwa kapindapinda, nu kukandwa gansi nu ku kiziki kya munkatini nu ku ntonga zazo. Kita mbavu za kapindapinda ibili. 25 Ububo ntungo za kumbusa zabe na mbavu kinana nu bikalilo ikumi nu mutuba, bibili bibili ku mbavu insania.
26 Nu wakite tuti twa muti wa musita: tutano ku mbavu za ntungo emozi za numba, 27 nu tutano twa ntungo z'ibili za numba, nu tutano twa ntungo za kumbusa. 28 Mutondo wa munkatini watunganana kubasa kutukila kuzinda aaba nu ku kungo kuzinda kwa numba. 29 Kukila mbavu insania na olo, nu kita mpo za olo kukata tuti twazo, nu lingo kukila tuti na olo. 30 Obaka lebelebe Numba za Hema anga kisusania kiwalolesizibwe ga mwiduko.
31 Nu waluke nsulu na misinge z'idangi ly'igulu nu misinge z'idangi lya misamba za mpene nu zakisimana nu za kitani kyotwa busoga, nu luka ga nsulu zezo bisusania bya makerubi, u mulimo wa mukulumizi. 32 Anika zo ku magobo ma olo meli ku mango ma muti wa musita makukilwe na olo nu memana ga bibikilo bya feza. 33 Anika zeno nsulu kunsi kwa pengele za nsulu za gantata, nu ingizia Sanduku z'Idagano kumbusa kwa nsulu zeno. Zeno nsulu zilekanukye Kiziki Kyasililila na Kiziki Kyasililila Nunse. 34 Wabike Kisumbi kya Kyombo ga Sanduku za Bulongeki mu Kiziki Kyasililila Nunse. 35 Wabike meza kumbuga kwa nsulu ku lulenge lwa kwikazi ku busio buli butangi, nu kyanikilo kulolana na meza ku lulenge lwa kwidume kwa busio bubo.
36 Waluke engo nsulu na misinge z'idangi ly'igulu nu z'idangi lya misamba za mpene nu zakisimana, nu za kitani kyotwa busoga, u mulimo wa muluki musoga, lwibi lwa kwingila mu Numba. 37 Wakite magobo matano ma olo makwanika nsulu zeno za lwibi, nu kita mango matano ma muti wa musita nu kumakukila na olo, nu kita bikalilo bitano byamo na nsubi.”