Kasenga ka kugisia tuyulo.
27
1 Nu atendile lingo bunee: “Anga kasenga ka tuyulo na mbavu za muti wa musita. Anga ko bulingilingi ku bulazi nu bungulu, bwabe mabusu matano, nu kusakama kwa ko kwabe mabusu masatu. 2 Kita kisusania kya mega kuntata kwako ku tupindapinda tunazi. Mamo mega mabe kibe kimozi na kasenga, nu kukila ko nunsania na nsubi. 3 Kita bintu byako binsania na nsubi, u mpagu nu mbeketi za kutikya lwito, nkanya nu mpepe nu bibungulu bya kweka keiya. 4 Nu wakite kakila ka nsubi nu wakite mpo inazi za nsubi gantata ga kakila ku ntonga zage inazi. 5 Nu bika zo kunsi kwa lubavu lwatimba kasenga ku kuntata kwako, buno kakila kabe munkatini mwa kusakama kwako nu mpo zibase kumbusa kwako. 6 Kita mingolo za muti wa musita nu kuzikukila na nsubi. 7 Mingolo zezo zingizibwe mu mpo zezo inazi ku ndenge ibili za kasenga ndi bakukeeka. 8 Anga kasenga keli bwasi munda na mbavu. Anga buwalolesizibwe ga mwiduko, u buwatungana kukita. Mulungu wa Numba za Hema.
9 Kita mulungu wa Numba za Hema; ku lulenge lwa kwidume kwakuke mabusu lukama ku bulazi, nu bika kuzo anga kitutu nsulu nsoga za kitani, 10 na mango makumi mabili ma kwanika nsulu nu bikalilo makumi mabili mamo bya nsubi, nu byuma byakutimba mango bya feza nu magobo makitwa na feza gamozi nabyo. 11 Lulenge lwa kwidume lwabe bulazi bwa mabusu lukama, nu kulo kwabe kitutu kya nsulu nsoga za kitani, nu mango makumi mabili ma muti, nu bikalilo byamo bya nsubi makumi mabili, gamozi na byuma bikutimba mango nu magobo ma feza. 12 Ku lulenge lwa kunsi bungulu bwa mulungu bwabe mabusu makumi matano, nu anika kulo kitutu kya nsulu ku mango ikumi mazo ma miti nu bikalilo byamo ikumi bya nsubi. 13 Ku lulenge lwa kukutukaga kisongo kya busi kwabe kitutu kya bulazi bwa mabusu makumi matano. 14 Bulazi bwa kitutu ku lulenge lumozi lwa lwibi lwa kwingila bwabe mabusu ikumi nu matano nu mango masatu ma muti gamozi na bikalilo bisatu byamo, 15 nu kitutu kya lungo lulenge lwa lwibi kyabe nsulu za bulazi bwa mabusu ikumi nu matano, gamozi na mango makyo masatu nu bikalilo byamo bisatu.
16 Lwibi lwa mulungu lwabe nsulu za bulazi bwa mabusu makumi mabili gamozi na mango mazo manazi nu bikalilo byamo binazi. Nsulu za lwibi zikitwe na misinge nsoga za kitani nu z'idangi ly'igulu nu z'idangi lya misamba za mpene nu zakisimana, mulimo wa mwiya menge. 17 Mango mansania ma mulungu unsania, nu ku ntungo insania zago, makitwe na byuma byakutimba bya feza gamozi na magobo ma feza, nu bikalilo byamo byabe nsubi. 18 Bulazi bwa mulungu bwabe mabusu lukama, nu bungulu bwago bwabe mabusu makumi matano, na bitutu bya nsulu za kitani kisoga za kusakama kwa mabusu matano, nu bikalilo binsania bya nsubi. 19 Bintu binsania bya mulimo wa Numba za Hema byabe bya nsubi, ndi bili misumali za numba aba misumali za bitutu, aba ku ungo mulimo unsania.
Makiti ma matala ma kyanikilo.
20 Kakizia baIsraeli buno bavwe na makiti ma zeituni masoga masongoloka nunse, buno matala ma kyanikilo mabangage nunse. 21 Mu Numba za Kukulumana, kumbuga kwa nsulu zili lwabusio lwa Sanduku za Bulongeki, kuko Haruni nu bana bage bamulume batunganana kulongeka matala buno masane lwabusio lwa Yehowa kutukila igolo aaba nu nindunindu. Mulembe wono guli wa milyalya ku baIsraeli ku kibuti na kibuti kyabo.”