Nsulu za basankoga.
28
1 Nu atendile lingo bunee: “Mana Haruni solonzi buno avwe kuguli gamozi na bana bage, Nadabu, Abihu, Eleazari, nu Itamari, nu batikye munkatini mwa baIsraeli buno bankitile mu mulimo wa basankoga. 2 Kitila Haruni solonzi nsulu zasililila zibe ku lutanuno nu busoga bwage. 3 Tenda ku beiya menge bansania banakasile menge mu milimo zezo buno bakitile Haruni nsulu za kumwengia buno ankitile mulimo wa busankoga. 4 Nu nsulu zibakite u zeno: nsulu za ku bukuba, nu efodi, nu nkanzu, nu ikoti, nu nkumbu, nu mukoma. Bakitile solonzi Haruni nu bana bage zeno nsulu zasililila buno bankitile mulimo wa busankoga. 5 Bakite zo na olo nu nsulu z'idangi ly'igulu nu nsulu z'idangi lya misamba za mpene nu nsulu zakisimana nu nsulu za kitani kisoga. Efodi.
6 Bakite efodi na musinge wa olo, nu w'idangi ly'igulu, nu w'idangi lya misamba za mpene, nu wakisimana, nu nsulu za kitani kyalukwa busoga nunse, u mulimo wa mukulumizi. 7 Zibe na bibe bibili byakulumanibwa ku ntonga zazo ibili, nu kukundamanibwa ga bituli. 8 Mukoma wazo wakuzikanda walukwe anga zezo efodi na misinge za olo nu z'idangi ly'igulu nu z'idangi lya misamba za mpene nu zakisimana nu za kitani kyotwa busoga.
9 Watole makozi mabili ma sardoniki aba kibakuli nu kusanza gamo meina ma bana ba Israeli, 10 meina mutuba g'ikozi litangi, nu meina mutuba ma babo basigala g'ikozi lya mabili, anga bubayanga mu kubutwa kwabo. 11 Sanza meina ma bana ba Israeli ga makozi mabili anga bukusanzaga musanzi ga makozi makukengelezia.a Kumbusa kwa kusanza mo, maswike ku biziki byamo na musinge wa olo. 12 Maswike ku nsulu za kukundamania efodi ga bituli anga makozi ma kukengelezia. Haruni eeke ga bituli byage meina mamo anga kakengelezio lwabusio lwa Yehowa. 13 Kita biziki bya kumabika na bukila bukeke bwa olo, 14 nu na miyololo misoga zalukwa na olo nsoga nunse, anga mizigi, nu kuziswika ku mamo makila mabili.
Nsulu za ku bukuba.
15 Kita nsulu za ku bukuba zibe za kwatula milondo. Kita zo mulimo wa mukulumizi, nu kuzikita anga buwakitile efodi, na misinge za olo nu z'idangi ly'igulu nu za misamba za mpene nu zakisimana, nu za kitani kyotwa busoga. 16 Kita zo bulingilingi, bungulu bwa makasa mabili b nu bulazi bwa makasa mabili, nu gonda zo munkatini mwazo. 17 Kumbusa bika milindi inazi za makozi ma bukunza bukali ku nsulu zezo. Mu mulindi mutangi mwabe akiki zakisimana nu yakuti zaluluka nu baharamani. 18 Mu mulindi w'ibili mwabe zumaridi nu yakuti z'idangi ly'igulu nu idama. 19 Mu mulindi w'isatu mwabe hiakintho, nu akiki zakisimana, nu ametisto. 20 Nu mu mulindi w'inazi mwabe zabarajadi, nu shohamu, nu yaspi, makandwe mansania mu makila ma olo mu biziki byamo. 21 Kwabe makozi ikumi nu mabili, limozi ku izina n'izina lya bana ba Israeli lyasanzwa anga bwasanzwa kakengelezio g'ikozi, n'ikozi na lyabe n'izina lya kikanga kimozi kya bikanga bya baIsraeli.
22 Bika ku nsulu za bukuba miyololo ibili anga misinge u mulimo wa mukulumizi lebelebe. Waluke zo na olo nsoga nunse. 23 Lingo kita mpo ibili za olo nu swika zo ku tunkundunkundu tubili twa nsulu za bukuba, 24 nu swika miyololo ibili za olo ku mpo ibili zili ku tunkundunkundu twa nsulu za bukuba, 25 nu tungo tuzinda twa myambalo tuswikwe ku makila ma olo makandwa ku bibe bya matuli bya nsulu za bukuba, kumakanda ku ntungo za lwabusio. 26 Kita lingo ingo mpo ibili nu kuzibika kuzinda kwa nsulu za bukuba tondo kunsi kwazo ku ntungo za efodi. 27 Kita ingo mpo ibili za olo nu kuziswika kunsi kwa byindi bya matuli ku ntungo za lwabusio lwa efodi, bwigi na kiziki kya kukulumania nu gantata ga mukoma wa efodi. 28 Mpo za nsulu za bukuba zakandwe na muzigi w'idangi ly'igulu ku mpo za efodi, kuziswika ku mukoma buno nsulu za bukuba tazilekanuke na efodi.
29 Kungwa Haruni eingila Kiziki Kisanana, nti eeka meina ma bana ba Israeli ku mutima wage mu Nsulu za Bukuba za kwatula milondo anga kakengelezio ka milyalya ku Yehowa. 30 Bika munda mwa nsulu za bukuba makozi makumanwa Urimu nu Tumimu, buno mabe ga mutima wa Haruni, mambizi mansania maakwingila lwabusio lwa Yehowa. Anga bubo Haruni eekage kankanka ku mutima wage lwabusio lwa Yehowa, makozi makumenya kusombola nu lutundo lwa Yehowa.
Engo nsulu za basankoga.
31 Lingo, kita ikoti lya efodi na nsulu z'idangi ly'igulu nunsania, 32 na mwimbo w'itoe munkatini mwazo, buno ikoti talyatike. 33 Kunsi kwa nsulu z'ikoti lya efodi kita biguma byamanwa komamanga na mizigi z'idangi ly'igulu nu z'idangi lya misamba za mpene nu zakisimana, ku mupimbo unsania, nu kita byo na ngebengebe za olo gasamba kiguma na kiguma. 34 Ku mupimbo unsania w'ikoti lya efodi kwabe kiguma nu ngebengebe, kutimba mupindo unsania. 35 Haruni azivwale buno ankitile nu iyuki lyazo lyungubwe kulyo geingile mu Kiziki kya Kyasililila lwabusio lwa Yehowa aaba nu gaabase, nu ntakue.
36 Kita kamenyikilo ka olo nsoga nunse, nu sanza gako na masanzo masoga bunee: KWASILILILA KU YEHOWA. Masanzo mabe anga mamo ma kakengelezio, u masanzo masoga nunse. 37 Swika kuko muzigi w'idangi ly'igulu kukakanda ku nkumbu ku ntungo za lwabusio lwazo. 38 Nu kamenyikilo kako kabe ku malanga ma Haruni, nu eeke bwagi bukukita baIsraeli gabakukasana bisansa byabo binsania byasililila; kabe bindi binsania ga malanga ma Haruni buno bisansa bitabizibwe na Yehowa.
39 Kita lingo ikoti na nsulu nsoga za kitani, nu kita nkumbu na nsulu nsoga za kitani. Mukoma w'ikoti lilino wakitwe na mulandi c musoga. 40 Kitila bana ba Haruni makoti ma lukita luluno, nu nkumbu zabo, nu mikoma kubakasa lutanuno nu busoga. 41 Kumbusa kwa kuvwalikya Haruni nu bana bage na zeno nsulu, babongie na makiti nu kubakasa mponga. Babike ku mulimo buno bankitile anga basankoga.
42 Bakitile nsulu za munda, anga matekele kukukila mundulu wabo, matukila mu kibunda nu kubasa mu bilumbu, nu zakitwe na kitani tugu. 43 Haruni nu bana bage batunganana kuzivwala nkungu za kwingila mu Numba za Kukulumana na Nne nu nkungu za kukunda kasenga kane ka tuyulo gabankitile, banavwa kweka bwagi nu kukua.
Zeno zili milembe ku Haruni nu ibuta lyage aaba nu ku milyalya.”