Kukasa mponga ku basankoga.
29
1 Nu atendile lingo bunee: “Bubuno u buwakite kubakasa mponga buno bavwame kunkitila ku mulimo wa busankoga: Tola kyana kimozi kya ngombe nu bilimba bibili bya mikoko biteli na kabalibango, 2 nu kampampa katagaga kakitilwe na bugali bwa ngano, nu kampampa kense kasambikwa na makiti, nu kampampa katagaga kakukilwa na makiti. 3 Bika tumpampa tuto tunsania mu luzi lumozi, nu kasa to gamozi na kyana kya ngombe nu bilimba bibili bya mikoko anga kisansa. 4 Kumbusa kwa kukita bubo, vwa na Haruni nu bana bage ku mwingilo, u mwingilo wa Numba za Kukulumana, nu kubogia na mazi. 5 Tola nsulu nu vwalikya Haruni nkanzu nu ikoti lya efodi nu efodi nu nsulu za bukuba. Kanda efodi kweli na mukoma walukwa na menge. 6 Bika nkumbu ku itoe lyage, nu swika kuzo kako kamenyikilo ka olo. 7 Tola mwambo wa kubonga nu kugukubula ku itoe lyage kumubongia go. 8 Vwa na bana bage nu kubavwalikya nkanzu, 9 nu kubika nkumbu kubeli. Bakande mikoma, Haruni nu bana bage. Busankoga buli bwabo na mulembe wa milyalya. Bubo u buwakase mponga Haruni nu bana bage ku busankoga. 10 Vwa ku lwibi lwa Numba za Kukulumana na mulume wa ngombe wasombwedwe. Haruni nu bana bage babike maboko mabo gantata g'itoe lyazo. 11 Sesa kyana kya mulume kya ngombe gago bwigi na lwibi lwa Numba za Kukulumana lwabusio lwa Yehowa. 12 Kata mikila zakyo mu nyungu, nu tila nkindi zazo ga mega ma kasenga ka kisansa na munwe wobe, nu kubula ingo zasigala gansi ku kasenga ka kisansa. 13 Kumbusa tola manona mansania ma munda mwakyo gamozi na kankungwe ka kitugu nu mpiku ibili na manona meli gazo, nu kubigisia ga kasenga. 14 Tondo misuna nu kikoba nu tubi twazo, ubigisie na keiya kumbuga kw'ido. Kili kisansa kya mibi.
15 Tola kilimba kimozi kya mukoko, nu Haruni nu bana bage babike maboko mabo g'itoe lyago, 16 nu sesa kilimba kya mukoko. Sandila mikila zago ku ntungo insania za kasenga. 17 Baga kilimba kya mukoko, nu suga mu mazi byindi bya munda gamozi na magulu makyo, nu kumbusa bibike gamozi n'itoe nu bingo byindi. 18 Gisia kilimba kya mukoko kinsania ga kasenga ka kisansa. U kayulo kakugisibwa ku Yehowa, nsunu za kumutananizia, u kayulo kakugisibwa ku Yehowa.
19 Nu kumbusa tola kingo kilimba kya mukoko, nu Haruni na bana bage babike maboko mabo ku itoe lyakyo. 20 Kisese, nu tola nkindi za mikila zakyo nu kuzibika gantonga kutuzi kwa seidume kwa Haruni nu kwa bana bage, nu ga binkumu byabo bya maboko ma seidume, nu ga mpanda za balume zabo za magulu ma seidume. Kumbusa sandila ingo mikila ku magulu ma kasenga ka kayulo ku ntungo insania. 21 Nu tola nkindi za mikila zili ga kasenga nu nkindi za mwambo wa kubonga, nu zisandile ku Haruni nu nsulu zage nu ku bana bage nu nsulu zabo, nu Haruni engibwe nu nsulu zage nu bana bage nu nsulu zabo.
22 Ku kikino kilimba kya mukoko tikya manona nu mukila wanona nu manona ma munda gamozi na kankungwe ka kitugu nu mpiku ibili na manona mazo nu kilumbu kyago kya seidume, kubuno kili kilimba kya mukoko kya kisansa kya mponga, 23 nu ku luzi luli na tumpampa nu luli lwabusio lwa Yehowa, tola kampampa kamozi nu kango kense kamozi nu kampampa kakukidwe na makiti. 24 Bika bibyo binsania ku maboko ma Haruni nu ma bana bage, nu babitengie lwabusio lwa Yehowa buno bibe kayulo ka kutengibwa kweli. 25 Kumbusa kwa kubitengia bitikye ku maboko mabo nu kubigisia ga kasenga ka kisansa gamozi na kisansa kya kugisibwa buno bibe nsunu nsoga, kisansa kyakitilwa Yehowa na keiya. 26 Tola bukuba bwa kilimba kya mukoko kili kya kukasa mponga ku Haruni ku mulimo wa busankoga, nu kumbusa kwa kubutengia lwabusio lwa Yehowa buno bwabe kayulo ka kutengibwa, nu kumbusa kwa kubutengia nti buli bwobe.
27 Wengie byindi bibyo byili bya Haruni nu bana bage, u bukuba bwatengibwa nu kilumbu kyakasilwe. 28 Byindi bibyo bibili byili bya Haruni nu bana bage ku tuyulo twa baIsraeli. Ku tuyulo twabo aba bisansa byabo bakase kankanka byindi bibyo ku Yehowa gabakubizanzula.
29 Nsulu zasililila za Haruni zikaba ku bana bage kumbusa kwage buno babongibwe mwambo nu kukaswa mponga ku mulimo wa busankoga muzo. 30 Nu mwana ukamuyanga ku mulimo wa sankoga munene nu kwingila mu Numba za Kukulumana nu kunkitila mu Kiziki Kyasililila atunganana kuzivwala bindi mutubakamo.
31 Tola misuna za kilimba kya mukoko kyakukasa mponga ku mulimo wa busankoga nu kuziyika mu kiziki kyasililila. 32 Haruni nu bana bage balie ga mwingilo wa Numba za Kukulumana misuna za mulume wa mukoko gamozi na tumpampa tuli mu luzi. 33 Balie bisansa bibyo bya bukulumania ku buno beli bengibwa nu kukaswa mponga. Tondo mugeni ntalie kubyo, kubuno byasililila. 34 Nu ndi kuli byasigala ku nindunindu, aba bya misuna za kilimba kya mukoko aba bya kampampa, binse nti byagisibwe na keiya; tababilie kubuno byasililila nunse.
35 Kitila Haruni nu bana bage binsania binakukakizizie, nu kita bibyo bitondo bindi mutubakamo kubakasa mponga ku mulimo wa busankoga. 36 Na busi na busi sesa kyana kya mulume kya ngombe kibe kisansa kya bwagi kubakulumania. Engia kasenga ka kisansa kya bukulumania nu kukabongia mwambo buno kenge. 37 Busi na busi ku bindi mutubakamo kita bukulumania ku kabamba kako nu kukengia. Kumbusa kwa kukita bubo nti kasenga kabe kasililila nunse, nu kinsania kikabikwa gako nti kyasililile nunse.
38 Busi na busi kasana ga kasenga ka kisansa byana bibili bya mikoko bya mwaka umozi, 39 ku milyalya kasana kimozi nindunindu, nu kingo mwigolo. 40 Kasana nindunindu kyana kya mukoko gamozi na kyanzi kya bugali busoga bwa ngano bwasambikwa na lwata a lwa makiti ma zeituni nu lwata lwa maku u kayulo ka kunua. 41 Mwigolo sesa kingo kyana kya mukoko nu kasa kisansa kya bugali bwasambikwa na makiti nu kya maku bumozi lebelebe na bibyo bya nindunindu, kisansa kya nsunu nsoga nunse kya kugisibwa ku Yehowa.
42 Mu bibuti byeinu bikuvwa bisansa bibyo bikasanwe kankanka na busi na busi ga kasenga ka kisansa keli bwigi na mwingilo wa Numba za Kukulumana na Yehowa. Gago nti nakulumane nobe nu kutendana nobe. 43 Nu lingo gago nakulumane na baIsraeli, nu kiziki kyengibwe na lutanuno lwane. 44 Bubo u bunengie Numba za Kukulumana nu kasenga ka bisansa nu nengie Haruni nu bana bage buno bankitile ku mulimo wa busankoga. 45 Nu nikalage munkatini mwa baIsraeli nu kuba Kalaga wabo. 46 Nu bo bamenye buno nili Yehowa, Kalaga wabo wabatikizye mu Misri buno nikale munkatini mwabo. Nne nili Yehowa, Kalaga wabo.”