Kasenga ka kugisia aliga.
30
1 Nu atendile lingo bunee: “Anga kasenga ka kugisia aliga na muti wa musita. 2 Kasenga kabe bulingilingi, bulazi bwako bwabe ibusu limozi nu bungulu bwabe ibusu limozi, nu kusakama kwako kwabe mabusu mabili. Kita mega mako makandwa gako. 3 Kakukilwe na olo nsoga, gantata nu gambuga nu ku ntungo nu mega mako. Wakatimbikanie na mwimbo wa olo. 4 Kita mpo ibili za olo nu kuzibika kunsi kwa mwimbo wa olo ku ntungo ibili zikulolana kubika muzo mingolo za kweka kasenga. 5 Kita mingolo ibili za musita nu kuzikukila na olo. 6 Bika kako kasenga lwabusio lwa nsulu zili lwabusio lwa Sanduku za Bulongeki, u lwabusio lwa Kisumbi kya Kyombo kili gantata Bulongeki gago ganakulumane nobe. 7 Haruni agisie bulago bwa nsunu ga kasenga, nindunindu na nindunindu, mu nkungu za kulongeka matala. 8 Lingo agisie bulago ga kasenga igolo n'igolo, mu nkungu za kugulumizia matala, buno bulago bukagiaga kankanka lwabusio lwa Yehowa mu bibuti byeinu binsania. 9 Tamugisie bungo bulago aba aliga aba kayulo ka kugisia aba kayulo ka bugali ga kasenga kako, nu tamukubule kayulo ka kunua gako. 10 Limbizi limozi na mwaka na mwaka Haruni akite bukulumania ku mega mamo ma kasenga. Bukulumania bubuno bwa mwaka na mwaka bwakitwe na mikila za kisansa kya bwagi kya kukulumania, nu bwakitwe mu bibuti byeinu binsania. Buli bwasililila nunse ku Yehowa.” Kisansa ky'Ikulumanino.
11 Lingo Yehowa abwide Musa bunee: 12 “Nkungu ziwaganze baIsraeli, babo bakuganzwa munkatini mwabo, na muntu na muntu alige ku Yehowa bukuluzi bwa kalamo kage mu nkungu zaganzwe, buno nsambo nkali tazibase kubeli gokubaganza. 13 Na muntu na muntu mu nkungu zakuganzwa nu kutinga ku lungo lulenge nti alige kyindi kimozi kya bibili kya shekeli, ku lukita lwa shekeli a za Kiziki Kyasililila. Shekeli emozi zili gera makumi mabili. Kino kyindi kimozi kya bibili kya shekeli kili lukaso ku Yehowa. 14 Ganza babo bamulume beli na myaka makumi mabili nu kutinga, nu gabatinge mu kuganzwa nti na we na watunganana kukasa lulo lukaso ku Yehowa. 15 Mugumi ntatikye kutinga, nu muzambi nteide kutikya kikyo kyindi kimozi kya bibili kya shekeli, gamwakase lukaso ku Yehowa, buno bube bukuluzi bwa kalamo keinyu. 16 Kata bikulo bibyo ku baIsraeli nu kubibika ku mulimo wa Numba za Kukulumana. Bikaba kakengelezio ku Yehowa ku kabamba ka baIsraeli kukulula tulamo twabo.”
Kibungulu kya nsubi.
17 Yehowa abwide lingo Musa bunee: 18 “Wakite kibungulu kya nsubi, gamozi na kikalilo kyakyo ku nsubi, nu wakibike gasamba Numba za Kukulumana nu Kasenga ka kayulo, nu bika mazi mukyo. 19 Na mazi mamo Haruni nu bana bage boge ku maboko mabo nu ku magulu mabo. 20 Kungwa beingila mu Numba za Kukulumana nti boge tanga na mazi buno banavwa kukua. Lingo, kungwa bakunde kasenga ka kisansa kunkitila, kukasana ku Yehowa kayulo ka kugisia aba kisansa kya kugisia na keiya, 21 nti boge tanga ku maboko nu ku magulu buno banavwa kukua. Kwabe ikakizio lya milyalya ku Haruni nu ku bana bage ku bibuti byabo binsania.”
Mwambo wa kubonga.
22 Yehowa abwide Musa bunee: 23 “Itolele bulago bwa nsunu, u manemane mabisi ma shekeli nkama itano, nu mudalasini guli wa nsunu nsoga wa shekeli nkama ibili nu makumi matano, u kyindi kimozi kya bibili kya buzitu bwa manemane, nu kane ka nsunu nsoga, shekeli nkama ibili nu makumi matano, 24 nu kida, shekeli nkama itano,b kumalindika n'idindiko lya shekeli za Kiziki Kyasililila mu Numba za Kukulumana, nu kuzisambika na hini emozi c za makiti ma zeituni. 25 Kita na bibino binsania mwambo wasililila wa kubonga, masambiko ma nsunu nsoga, u mulimo wa mwiya menge wa kukita bulago. Wabe mwambo wasililila wa kubonga. 26 Kumbusa kwa kubukita, bongia namo Numba za Kukulumana, nu Sanduku za Bulongeki, 27 nu meza gamozi na bintu byamo, nu Kyanikilo kya Matala nu bintu byakyo, nu kasenga ka bulago na bintu byako, 28 nu kasenga ka bisansa bya kugisia nu bintu byako, nu kibungulu na kikalilo kyakyo. 29 Engia bibyo binsania nu kubibika ku mulimo wabyo buno bibe byasililila nunse, nu kinsania kikwitubya kubyo kyabe kyasililila.
30 Bongia Haruni nu bana bage, kubengia buno bankitile ku mulimo wa busankoga. 31 Kakizia baIsraeli bunee: ‘Wono guli mwambo wane wa kubonga mu bibuti byeinu. 32 Tagukubulwe ku mubili wa muntu, nu tamukite ungo anga wono na miti zili mumo. Guli wasililila, nu mwatunganana kukengela buno guli wasililila. 33 Unsania wasambika mwambo anga wono, aba unsania wagubongia muntu uteli sankoga nti alekanukibwa ku mibuto zage.”’
Bulago bwa nsunu nsoga.
34 Yehowa abwide lingo ku Musa bunee: “Tola nkita za aliga, u bulago bwa manukato nu natafi nu kelbena, gamozi na kasuku kasoga, bibyo binsania bya kilindiko kimozi, 35 nu kita nabyo bulago bwasambikwa na mwiya menge ma kukita bulago. Bwasambikwa na munkange nu bibyo bibe bisoga nunse, nu bwabe bwasililila. 36 Wabungule nkindi zabo nunse, nu kuzibika lwabusio lwa Sanduku za Bulongeki zili mu Numba za Kukulumana, gago u ganakundamane nobe. Bulago bubo bwabe bwasililila nunse kumuli. 37 Tamukite bungo bulago anga bubuno na bibyo bili mubo, tondo mukengele buno bubuno buli bwasililila nunse ku Yehowa. 38 Muntu unsania wakite bulago anga bubuno buno abogeboge na nsunu nsoga zabo, nti alekanukibwa ku mibuto zage.”