Bakulumizi: Bezaleli nu Aholiabu.
31
1 Lingo Yehowa abwide Musa bunee: 2 “Lola, nasombwede Bezaleli, mwana wa Uri, muyukulu wa Huri, wa kikanga kya Yuda. 3 Namwizazizie na Muuza wa Kalaga nu menge nu bumenyinino bwa nkita insania za mulimo musoga, 4 buno akite lukita na lukita lwa bibumbwa bisoga bya olo nu feza nu nsubi, 5 kusesa nu kwata makozi, nu kumabika mu makila, nu kulanda mbavu nu kuzikulumizia nunse, nu kukita bibumbwa bya nkita insania. 6 Lingo nasombwede Aholiabu, mwana wa Ahisamaki wa kikanga kya Dani kumukasia. Lingo nakasile ku bakulumizi bansania menge ma kukita binsania binakukakizizie, 7 u Numba za hema za Kukulumana, Sanduku za Bulongeki na kyuki kyazo u Kisumbi kya Kyombo, nu bingo bintu binsania bya numba, 8 u Meza ma Tumpampa na binsania byamo, nu Kyanikilo kya olo nsoga nu binsania byakyo, Kasenga ka Bulago busoga, 9 Kasenga ka Bisansa bya Kugisia nu binsania byako nu Kibungulu na kikalilo kyakyo, 10 nu lingo nsulu zalukwa busoga, u zezo za Haruni sankoga nu za bana bage gabankitile ku mulimo wa busankoga, 11 nu bulago bwa kubonga nu mwambo wa nsunu nsoga bwa Kiziki kya Kizila. Bakite lebelebe binsania anga bunakukakizizie.” Sabato u Busi bwa Kumunwa.
12 Nu Yehowa abwide Musa bunee: 13 “Kakizia baIsraeli bunee: ‘Lebelebe langazi Sabato zane, kubuno buli kakengelezio ganisamba n'inyuwe mu bibuti byeinu ku milyalya buno mumenye Nne nili Yehowa ukumusililizia. 14 Langazi Sabato kubuno buli busi bwasililila kumuli. Muntu unsania ukubusomba nti eitwe. Unsania ukukita mulimo ku busi bubo atunganana kulekanukibwa na bantu bage. 15 Mulimo gukitwe mu bindi mutuba, tondo busi bwa mutubakamo buli Sabato za kumunwa nunse, buli bwasililila ku Yehowa. Muntu unsania wakita mulimo ku busi bwa Sabato atunganana kukua. 16 BaIsraeli batunganana kulanga busi bwa Sabato, kubukengela nunse mu bibuti byabo binsania. Buli idagano lya milyalya. 17 Busi bwa Sabato bwabe kakengelezio ganisamba na baIsraeli ku milyalya, kubuno mu bindi mutuba Yehowa akitile meigulu nu kisi nu asilile mulimo wage unsania, nu ku busi bwa mutubakamo Kalaga omwinwe.”’
18 Gaasilile kutenda na Musa ga Mwiduko Sinai, Yehowa amukasile mbavu ibili za makozi ma Bulongeki masanzilwe na munwe wa Kalaga.