Kyana kya ngombe kya olo.
32
1 Nkungu zamonine bantu buno Musa eizizia ntagela ku mwiduko, bakundamanine Haruni nu bamubwide bunee: “Zanzuka, utukitile tulaga twatusondelezie, kubuno tatwizi kitondo kikizi kyabasile ku wozo Musa watutikizye mu Misri.” 2 Haruni abakwide bunee: “Tikyazi tukomu twa olo tuli ku matuzi ma bakikulu beinyu nu basikila nu bakinga beinyu, nu vwazi nato kundi.” 3 Ububo bantu bansania batikizye tukomu twa olo twabezaga ku matuzi mabo, nu bavule nato ku Haruni. 4 Atukatile ku maboko mabo nu akitile nkisi nato. Anyengwide olo mu muzonga nu kuzitula ku lukita lwa kyana kya ngombe. Bantu batendile bunee: “Ee Israeli, tutuno tuli tulaga tweinyu twamutikizye mu Misri.”
5 Gaazimonineko, Haruni angile kasenga ka kayulo lwabusio lwazo. Nu abasambalide bunee: “Lubi bwabe busi bunene bwa Yehowa.” 6 Gakede busi lukesikesi bayukile nu bagisizie tuyulo twa kugisia nu tuyulo twa bubobelelo. Kumbusa kwa kukita bubo, beikede kulia nu kunua, nu bazanzukile kumina.
7 Yehowa abwide Musa bunee: “Gela, wende! Kubuno bantu bobe bawatikizye mu Misri babigia mitima zabo. 8 Bagalukile lubilo kusiga binabakakizizie nu beikitide nkisi za kyana kya ngombe. Bazikumbaminne nu kuzikitila tuyulo, nu batendenne bunee: ‘Ee Israeli, tutuno tuli tulaga tweinyu twamutikizye mu Misri.’ 9 Namonine buno bantu babano beli beiya mitima mibibu. 10 Nsige kano kaluma buno bongoa bwane bube bukali kubeli nu nibazikye. Nu kumbusa nti nakukite kuba kilongo kinene.”
11 Musa asegile ku Yehowa. Amubwide bunee: “Ee Yehowa, kubuni ukongelwa bantu bobe bawatikizye mu Misri na bwangato bunene nu magala ma kuboko kwobe? 12 Ndi ukutunda baMisri batende bunee: ‘Kasi abatikizye kubuno atundile kubakitila bubi, kubeita ku mwiduko nu kubazikya nunsania mu kisi?’ Galuka mu bongoa bwobe, nu siga kuzikya kukuno, nu ntwite bantu bobe. 13 Kengela Abrahamu nu Isaka nu Israeli bawalumbide uwenyene bunee: ‘Nitizie ibuta lyeinyu anga nkeninkeni za kwigulu, nu nkakasa ku kibuti kyeinyu kisi kikino kinsania kinabalagile, nu kikaba bwiyani bwabo ku milyalya.”’ 14 Nu Yehowa eiyanizie nu ntazikizye bantu bage anga bwatendile.
15 Musa agalukile nu agelile mwiduko na zezo mbavu ibili za Bulongeki mu maboko mage. Mbavu zasanzwa ku ndenge ibili zazo, ku lulenge na lulenge. 16 Mbavu zezo zabezaga mulimo wa Kalaga, nu masanzo mabezaga ma Kalaga.
17 Gongule Yosua ku kazege ka kulaluka kwa bantu, atendile ku Musa bunee: “Muli kazege ka bita mu ido.”
18 Musa akwide bunee: “Nsikungwa ku idilo lya babo bakukinda mu bita, aba talili lya babo bakindwa, tondo nkungwa ku kwimba kwa bantu.”
19 Gavule Musa nu kukunda ido, kitangalabesi amonine ku nkisi za kyana kya ngombe nu ku kumina bantu. Ongilwe nunse, nu eisile zezo mbavu zabezaga mu maboko mage gansi, nu zatikile kunsi kwa mwiduko. 20 Atolile kikyo kyana kya ngombe kibakitile nu akigisizie mu keiya. Kumbusa akigogile anga mukungu, nu agusaside ga mazi, nu anusizie baIsraeli mazi mamo. 21 Musa abuzizie Haruni bunee: “Bantu babano bakukitide kikizi buno wabasondelezizie kukita bwagi bubo bunene?”
22 Haruni amwakwide bunee: “Mukota wane, ntunongelwe. Wizi bantu babano buno, beli basasia kukita bubi. 23 Bantendile bunee: ‘Tukitile tulaga twa kutusondelezia, kubuno tatwizi buni bwabasile ku wozo Musa watutikizye mu Misri.’ 24 Ububo nabakwide bunee: ‘Muntu na muntu uli na olo azitikye’ nu bankasile zo nu nazisile mu keiya, nu mwatukile muko kyana kikino kya ngombe!”
25 Musa amonine buno bantu balubikenne, nu buno Haruni abasigile mu kalubikania, nu beililikwe na basombi babo. 26 Ukinsa emanine ku isula lya mwino kutenda bunee: “Unsania uli ku lulenge lwa Yehowa avwe kundi.” Nu bansania ba kikanga kya baLawi bamukundamanine.
27 Ababwide bunee: “Bubuno u bukutenda Yehowa wa baIsraeli bunee: ‘Muntu na muntu akande mwene wage wa nganda ku kibunda kyage, nu atinge kuko nu kuko mu mwino unsania, kwita mubuto wage nu munyage nu mwida wage.”’ 28 Nu baLawi bakitile bubo bwatendile Musa, nu busi bubo bakule bwigi tununu tusatu twa bantu. 29 Nu Musa ababwide lingo bunee: “Lelo mwiyengie ku mulimo wa Yehowa kubuno mwayukide mibuto zeinyu nu bana beinyu, nu lelo Yehowa amukasile mponga.”
30 Gakede busi Musa atendile ku bantu bansania bunee: “Mwagile mibi minene, nu kano kaluma nkubakama ku Yehowa. Embe namukitile bukulumania bwa kumusigilila bwagi bweinyu.”
31 Ububo Musa asubizie ku Yehowa nu kumubula bunee: “Ee, bantu babano bagile bwagi bunene. Beikitide tulaga twa olo. 32 Ndi bwakulungana kano kaluma, basigilile bwagi bwabo, nu ndi tabubo, nti nzimie mu mukanda u wasanzile.”
33 Yehowa akwide Musa bunee: “Wozo wanagide nkamuzimia mu mukanda wane. 34 Tondo uwe, enda usondelezie bantu babano ku kiziki kinakubwide, nu mugenzi wane ende lwabusio lwobe. Gabase busi bwa kusungia, lebelebe nabalige bwagi bwabo.”
35 Yehowa asambizie babo bantu na lusambo lukali kubuno bakumbaminne nkisi za kyana kya ngombe zakitile Haruni.