Kalaga abakakizia kutuka ku Mwiduko.
33
1 Yehowa abwide Musa bunee: “Tukazi gano, uwe nu bantu bawatikizye mu Misri, nu mwende ku kisi kinalumbide Abrahamu nu Isaka nu Yakobo. Nabatendile bunee: ‘Nakase ibuta lyeinyu kisi kikino.’ 2 Nkusinga mugenzi lwabusio lweinyu kupumbia baKanana, nu baAmori, nu baHiti, nu baPerizi, nu baHivi, nu baYebusi mukyo. 3 Endazi ku kisi kikyo kiyala na mabele nu buuki, tondo nsikenda gamozi n'inyuwe kubuno inyuwe muli na mitima mibibu nu ninamuzikya mu nzila.” 4 Nkungu zungule bantu musagu wono mubi, balilile nu ta wampa wavwalile malebo mage. 5 Kubuno Yehowa abwide Musa bunee: “Tenda ku baIsraeli bunee: ‘Muli banani nu beya mitima mibibu. Ndi nkwenda gamozi n'inyuwe, nti ninavwa kumwita kitangalabesi. Kano kazanga tikyazi malebo meinyu aaba nu nasombola buni bunamukitile.”’ 6 Ububo baIsraeli batikizye malebo mabo mansania kuko ku Mwiduko Sinai.
7 Musa obakaga numba za hema ku isula lya mwino, ee, bulazi n'ido, nu azimanine Numba za Kukulumana. Gatundile muntu unsania kusega ku Yehowa aba kumubuzia lubuzio endile ku Numba za Kukulumana zabezaga ku isula ly'ido lyabo. 8 Kungwa Musa es'enda ku Numba za Kukulumana, bantu bazanzukile nu na muntu na muntu emenne ga mwingilo wa numba zage, nu kulola ku Musa aaba nu eingide mu Numba za Kukulumana. 9 Nkungu zingilaga Musa mu Numba, iyango lya kimpa lyagelile nu kwizizia ga mwingilo gatendaga Yehowa na Musa. 10 Bantu bansania gabamonaga ku iyango lya kimpa lyemana ga mwingilo wa Numba, bemanine nu kukumbamina, na muntu na muntu ga mwingilo wa numba zage. 11 Yehowa atendaga na Musa meiso ku meiso, anga bukutenda muntu na mwida wage. Kumbusa kwa kutendana na Kalaga, Musa asubagia ku ido, tondo mukiti wage Yosua, musikila wa Nuni, ntatukaga mu Numba.
Musa nu lutanuno lwa Yehowa.
12 Musa atendile ku Yehowa bunee: “Lola, wambulaga bunee: ‘Sondelezia bantu babano,’ tondo ntwandolesizie nazi u wasinge na nne. Lingo, wambula bunee: ‘Nakumenya ku izina lyobe, nu nakukasile mponga.’ 13 Ndi buligo buno wankasile mponga, nakusega kano kaluma buno wandolesie nzila zobe buno nikumenye nu nizizie kumonaga mponga zobe. Kengela buno kilongo kikino kili bantu bobe.”
14 Yehowa amwakwide bunee: “Nnenyene nkwenda nobe nu nakukase kyumuno.”
15 Nu Musa amubwide bunee: “Ndi ntukwenda uwenyene n'iswe, nti ntutusinge kutuka gano. 16 Ndi ntukwenda n'iswe, buni bunamenya bango bantu buno nakutananizia, nne nu bantu bobe? Nu ndi ntuli n'iswe kikizi kikutulekanukya na bango bantu beli ga kisi?”
17 Nu Yehowa amubwide bunee: “Nakite bubuno buwasegile, kubuno wantananizia nu nakumenya ku izina lyobe.”
18 Musa amusegile bunee: “Ndi bwakulungana, ndolesie lutanuno lwobe.”
19 Nu Yehowa amwakwide bunee: “Natingie busoga bwane bunsania lwabusio lwobe, nu nasambale izina lyane, u Yehowa, kuguli. Nakase mponga zane ku wozo u nakase mponga zane, nu nakwile wozo kyombo u nakwile kyombo. 20 Tondo ntunavwama kumona ku meiso mane, kubuno takuli muntu unavwama kummonako meiso ku meiso nu kulama.”
21 Yehowa amubwide lingo bunee: “Lola, kuli kiziki bwigi na Nne, wemane gantata ga lwanda. 22 Nkungu zatinga lutanuno lwane, nakubise mu itengu ly'ikozi nu nakukukile n'ikasa lyane aaba nu nasila kutinga. 23 Ganasile kutinga nti natikye ikasa lyane nu unamona ku mugongo wane, tondo meiso mane tamamoneke ko.”