Mbavu nto za makozi.
34
1 Yehowa abwide Musa bunee: “Baza mbavu ibili za makozi anga zezo za kulinga, nu nasanze gazo moki manasanzile ku mbavu ntangi, ziwatile. 2 Mu nindunindu ube kayikayika nu bakama Mwiduko Sinai. Idolesie kundi ga ntonga za mwiduko. 3 Ntuvwe na muntu wampa, nu muntu unsania ntamonekeko ga mwiduko unsania, nu mikoko aba mpene aba ngombe tazilie bwigi na mwiduko wono.” 4 Ukinsa Musa abazile mbavu ibili za makozi anga zezo ntangi. Nu Musa ayukile lukesikesi, nu abakamine Mwiduko Sinai anga bwamukakizizie Yehowa. Ekile zezo mbavu ibili za makozi ku maboko mage. 5 Yehowa agelile mu kimpa, nu emanine nage nu asambalide Musa izina lya Yehowa. 6 Atingile lwabusio lwa Musa, nu amusambalide bunee: “Yehowa, Kalaga Yehowa, wiyala kyombo nu mwiya mponga, ta musasia kongoa, mwiya kyombo nu bulili, 7 ukutundaga tununu twa bantu, nu kusigilila bantu bubi nu lunano nu bwagi, tondo ntasiga mwiya katati geteli lusungio lwage. Akwikya lusungio ku bana nu bayukulu ba mwiya bwagi, nu akusungia bana ku kabamba ka bwagi bwa beisibo ku kibuti kya bisatu nu kya binazi.”
8 Musa asasizie kukoma mazu gansi nu akumbaminne Yehowa. 9 Atendile bunee: “Ee Mukota, ndi wankasile lebelebe mponga zobe, nti wende n'iswe. Tusigilile bwagi bweitu nu mibi zeitu, aba tuli beiya mitima mibibu, nu kutubika buno tube bwiyani bwobe.”
10 Nu Yehowa amwakwide bunee: “Nkulaga idagano lyane kuguli. Lwabusio lwa bantu bobe bansania, nakite miganogano zitekitagwa mu kilongo kimozi kya kisi kinsania. Bantu bobe bansania buukwikalaga munkatini mwabo, bamone ku mulimo wa Yehowa gunakukitile. 11 Anzazi bunkumukakizia lelo nu nkeimbia baAmori, baKanana, baHiti, baPerizi, baHivi, nu baYebusi. 12 Mwidange buno tamukite malagano na bantu ba kisi kimukwenda mukyo, tamabe itega kumuli. 13 Sambulazi tusenga twabo twa kayulo, bungulazi mango mabo ma tulaga twabo, nu sesazisesazi mango ma kalaga kabo Ashera. 14 Tamukumbamine kango kalaga, kubuno Yehowa, Kalaga weinyu eli na lugi, ee, izina lyage lili Lugi.
15 Tamukite mugomio gamozi na bantu ba kisi, kubuno nkungu zibakasa tuyulo ku tulaga twabo nu kukita butazi mu meina mato, nti bakamumana kubukita nu kulia tuyulo twabo. 16 Nu mwasombole bakinga babo bamozi babe bakazi beinyu aba ba basikila beinyu, nu babo bakinga bakite butazi na tulaga twabo, nti basondelezie bana beinyu kukita bubo.
17 Tamukite tulaga twa kunyengula aba tamutukumbamine.
18 Kitazi Kisagulo kya Kampampa Katagaga. Anga bunamukakizizie mulie kampampa katagaga bindi mutubakamo mu mwezi wa Abibu, u mwezi wozo u mwatukile mu Misri.
19 Nkula insania zili mulume zili zane, aba nkula za basikila aba nkula za mulume wa ngombe aba kilimba kya mukoko. 20 Nkula za mpunda zakululwe na kyana kya mukoko, tondo ndi tamwazikunza na bukuluzi bwa kyana kya mukoko, nti wabela ikosi lyazo. Kululazi nkula za basikila beinyu.
Ta wampa ubasa lwabusio lwane geteli kena ku maboko mage.
21 Kitazi milimo zeinyu mu bindi mutuba, tondo busi bwa mutubakamo nti mumunwa aba nu nkungu za kulima aba nu nkungu za matubulo.
22 Mulange Kisagulo kya Mazinga na nkula za matubulo ma ngano, nu Kisagulo kya Matubulo ku kugalukya kwa mwaka. 23 Mambizi masatu mwaka na mwaka bamulume beinyu bansania bamonekeko lwabusio lwa Yehowa, Mwiya Bwangato Bunsania, Kalaga wa baIsraeli. 24 Nkapumbia bilongo bya bantu lwabusio lweinyu nu kwitizia myaga zeinyu, tondo takwabe bantu banatunda kukata kisi kyeinyu mu nkungu zikwenda bamulume kumoneka ko lwabusio lwa Yehowa, Kalaga weinyu, mambizi masatu mwaka na mwaka.
25 Tamukasane mikila za tuyulo aba bisansa na tumpampa twakitilwe na mugago, nu tamusige nkindi za kisansa kya Kisagulo ky'Isuluko aaba nu ku nindunindu.
26 Vwazi ku Yehowa, Kalaga weinyu, na nkula za matubulo mwaka na mwaka. Tamuyike kyana kya mukoko aba kya mpene mu mabele ma nina.”
27 Nu Yehowa abwide Musa bunee: “Sanza bitondo bibino, kubuno ku bwisulilwa bwabyo nkumulaga idagano lyane, n'uwe nu na baIsraeli.” 28 Musa abezaga gago gamozi na Yehowa bindi makumi manazi musi nu kindi, nu ntalide idia aba kunua mazi mubyo. Asanzile ga mbavu za makozi moki m'idagano, u makakizio ikumi.
29 Musa agelile Mwiduko Sinai na mbavu ibili za makozi za Bulongeki mu maboko mage, nu ntamenyine buno kilungi kyage kyasanine kubuno atendile na Yehowa. 30 Nkungu zamonine Haruni nu baIsraeli bansania buno kilungi kya Musa kyasana, bakule boba kumukunda. 31 Tondo Musa abamanine. Ububo Haruni na bangati bansania ba mwino basubizie kweli, nu atendile nabo. 32 Kumbusa baIsraeli bansania bamukundile, nu abakasile makakizio mansania mamutendile Yehowa ga Mwiduko Sinai. 33 Gasilile Musa kutenda nabo, abikile nsulu anga kitambala lwabusio lwa kilungi kyage. 34 Tondo nkungu zingide Musa ku Yehowa kutendana nage, atikizye nsulu ku kilungi kyage, nu gaatukile mu Numba za Kukulumana, atendile bantu binsania byakakizizibwe, 35 nu bantu bamonine buno kilungi kyage kyasanine, nu abikile lingo nsulu zezo ku kilungi kyage aaba nu nkungu za kusubania nu kutendana na Yehowa.