Milembe za Sabato, u Busi bwa Kumunwa.
35
1 Musa akundamanizie musanganano wa baIsraeli bansania, nu abasambalide bunee: “Bitondo bibino bili bibyo byakakizizie Yehowa buno mubikite: 2 Kitazi milimo zeinyu mu bindi mutuba, tondo busi bwa mutubakamo bwabe busi bweinyu bwasililila, u Sabato, busi bwa kumunwa nunse ku Yehowa. Muntu unsania wakita mulimo unsania mu busi bubo nti akue. 3 Tamukongie keiya ku numba zeinyu ku busi bwa Sabato.” Migelo za kukasa nu kobaka Numba za Kukulumana.
4 Musa atendile ku musanganano unsania wa baIsraeli bunee: “Yehowa akakikizizie bunee: 5 ‘Tolazi ku bibyo bimuli nabyo nkaso ku Yehowa. Na muntu na muntu ukutunda kubikasana, akase nkaso za olo, aba feza aba nsubi, 6 nu nsulu z'idangi ly'igulu, nu z'idangi lya misamba za mpene, nu z'idangi lyakisimana nu za kitani kisoga, nu za myoza za mpene, 7 aba bikoba bya bilimba bya mikoko byatilwa idangi lyakisimana, aba bikoba bya mpombolo,a aba mbavu za muti wa musita; 8 aba makiti ma zeituni ku matala, aba miti za nsunu nsoga za kukita bulago bwa kubonga nu za kukita bulago bwa kugisia, 9 aba makozi ma bukunza bunene mamanwa kibakuli aba sardoniki aba mango ma kubika ku efodi nu ku nsulu za bukuba.
10 Muntu na muntu uli na menge wa kumuli avwe kukita binsania byakakizizie Yehowa: 11 Numba za Hema gamozi na nsulu za kubika gazo nu kyuki kyazo, nu bikando byazo nu mbavu nu tuti twazo, nu mango mazo nu bikalilo byamo; 12 sanduku na mingolo zazo nu Kisumbi kya Kyombo kyazo nu nsulu za kuzibisa; 13 meza gamozi na mingolo zamo nu binsania byamo nu tumpampa twamo tukulolesia buno Kalaga eli gago; 14 nu kyanikilo kya kwanikila matala nu matala nu bintu binsania byato nu makiti ma matala; 15 kasenga ka aliga nu mingolo zako nu mwambo wa kubonga nu bulago busoga bwa kugisia; nu nsulu za lwibi lwa kwingila mu Numba za Hema; 16 kasenga ka Kugisia Tuyulo nu bisansa gamozi na makila mako ma nsubi, nu mingolo zako zakukilwa na nsubi, nu binsania byako; kibungulu kya nsubi gamozi na kikalilo kyakyo; 17 nsulu za mulungu nu mango mazo nu bikalilo byamo, nu nsulu za mwingilo wa mulungu, 18 nu misumali za Numba za Hema, nu za mulungu gamozi na mizigi zazo; 19 nsulu zalukwa busoga za kuluka nsulu za kunkitila mu Numba Zasililila, u nsulu zavwale Haruni sankoga nu bana bage nkungu zibankitilage mu Numba za Kukulumana ku mulimo wa busankoga.”’
20 Kumbusa kwa kutenda bubo, musanganano unsania wasigile Musa nu bendile kwabo, 21 nu bansania beitabizizie, na muntu na muntu na wakengede mu mutima wage, bavule na nkaso ku Yehowa ku kumukitila mu mulimo wa kobaka Numba za Kukulumana, nu mulimo wakitwe mu zezo Numba, nu mulimo wa kuluka nsulu zasililila za busankoga. 22 Bansania batundile mu mitima zabo, ndi wamulume aba mukikulu, bavule na malebo ma olo, u mikotola nu tukomu twa minwe nu tukomu twa matuzi nu mango malebo ma nkita ningi. Bansania bamakasile anga nkaso ku Yehowa. 23 Muntu na muntu wabezaga na misinge zili z'idangi ly'igulu aba zili z'idangi lya misamba za mpene aba zili zakisimana, aba nsulu za kitani kisoga, aba myoza za mpene, aba bikoba bya bilimba bya mikoko byatilwa idangi lyakisimana aba bikoba bya mpombolo bavule nabyo. 24 Muntu na muntu watundile kukasa nkaso za feza aba nsubi bavule nazo nu kuzikasa ku Yehowa, nu bansania babezaga na mbavu za musita za mulimo unsania bavule nazo. 25 Mukikulu na mukikulu na wabezaga na menge ma kwota musinge avule na misinge z'idangi ly'igulu aba misinge z'idangi lya misamba za mpene aba misinge zakisimana aba za kitani kisoga nunse zootile na maboko mage. 26 Nu bakikulu bansania batundile na mitima zabo nu bamenyine kwota myoza, botile misinge za myoza za mpene. 27 Bangati bavule na makozi mamanwa kibakuli aba sardoniki aba nu mango makozi ma malebo makubikwa ku efodi nu nsulu za bukuba. 28 Lingo bavule na miti za nsunu nsoga, nu makiti ma zeituni ma matala, nu mwambo wa kubonga, nu bulago bwakugisia bwa nsunu nsoga. 29 BaIsraeli bansania, bamulume nu bakikulu batundile mu mutima bavule na nkaso za kukasa Yehowa ku mulimo unsania wakakizizie Yehowa ku kanua ka Musa buno ukitwe.
Bakulumizi, u Bezaleli nu Aholiabu.
30 Nu Musa abwide baIsraeli bunee: “Menyazi buno Yehowa atekwide Bezaleli mwana wa Uri mu izina lyage, nu Uri abezaga mwana wa Huri wa kikanga kya Yuda. 31 Amwizazie na Muuza wa Kalaga nu na menge nu bumenyinino nu kumenya kukita mulimo unsania w'itumbi, 32 nu eli mutumbi w'itumbi linsania na olo nu feza nu nsubi, 33 amenya kusesa makozi nu kumabika mu makila, kwata nu kumalimbania mu biziki byamo, kwata nu kubaza mbavu nu kukita milimo insania za menge. 34 Nu Yehowa amukasile bumenyinino bwa kwigisia bango, nu lingo abukasile ku Aholiabu mwana wa Ahisamaki, wa kikanga kya Dani. 35 Abeiyazizie na menge ma kukita milimo insania za balongeki nu batumbi nu bakuluka na misinge z'idangi ly'igulu nu z'idangi lya misamba za mpene nu zakisimana nu za kitani kisoga nu bakuluka nsulu na misinge. Beli na menge ma kulongeka nu kukita mulimo unsania na bumenyinino nunse.”