Beiya menge balinga mulimo.
36
1 Ububo Bezaleli nu Aholiabu nu bango bansania bakasilwe na Yehowa menge nu bumenyinino bwa kukita milimo z'itumbi, buno bakite mulimo unsania wa kobaka Numba za Kizila nu kukita milimo insania bulingilingi na lukita lwakakizizie Yehowa. 2 Musa amanine Bezaleli nu Aholiabu nu muntu na muntu wakasilwe na Yehowa menge nu bumenyinino bwa milimo nu watundile kugukita, buno bavwe kukita milimo. 3 BaIsraeli bavule ku Musa na nkaso zibavule nazo kobaka Numba Zasililila, nu azikasile ku bakiti buno bobake Numba, nu kukita binsania byazo. Bantu bavwaga nindunindu na nindunindu kukasa nkaso zabo za lutundo. 4 Ukinsa bakiti beiya menge bansania bakitile milimo za Numba basigile milimo zabo, 5 nu babwide Musa bunee: “Bantu bavule na bintu byingi nunse kutinga bitukwiyanina kuzindilizia mulimo wakakizizie Yehowa.”
6 Nu Musa akakizizie mulembe wono bunee: “Wamulume unsania aba mukikulu unsania ntavwe lingo na lukaso lwa kukita mulimo wa Numba za Kukulumana.” Nu bantu bagusambede mu mwino unsania. Ububo bantu bamenkile mulimo wa kuvwa na bingo bintu, 7 kubuno bintu bibabezaga nabyo byakukile ku milimo insania.
Numba za Hema.
8 Beiya menge ba bakiti bansania ba baIsraeli bakitile Numba za Hema na nsulu ikumi za kukukila zalukilwe na misinge za kitani kisoga, nu misinge z'idangi ly'igulu, nu misinge z'idangi lya misamba za mpene, nu misinge zakisimana, nu zili na makerubi zalukilwe muzo mulimo wa mwiya menge. 9 Nsulu insania zabezaga bulingilingi ku bungulu bwa mabusu manazi nu bulazi bwa mabusu makumi mabili nu kinana. 10 Bakulumanizie itano gamozi buno zibe nsulu emozi tugu, nu ingo itano gamozi. 11 Nu bakitile mpo za misinge z'idangi ly'igulu ku ntungo za kukulumania itano n'itano, ku nsulu itano zakulumanibwa nu ku ingo itano zakulumanibwa. 12 Bakitile mpo makumi matano ku zeno nsulu itano nu ku zezo nsulu itano, nu mpo na mpo zabezaga kulolana na mpo z'ingo nsulu. 13 Bakitile pengele za olo makumi matano, nu nazo bakulumanizie nsulu itano n'ingo itano, buno Numba zibe emozi geteli mpapa gasamba nsulu za kukukila.
14 Bakitile nsulu zalukwa na myoza za mpene kukukila gantata ga nsulu ga Numba za Hema. Bakitile nsulu ikumi nu emozi za myoza za mpene za kukukila numba. 15 Nsulu zezo za myoza zabezaga bulingilingi ku bunene, u bulazi bwa mabusu makumi masatu nu bungulu bwa mabusu manazi. 16 Nu bakulumanizie itano gamozi buno zibe emozi, nu ingo mutuba kuba emozi. 17 Kumbusa bakitile mpo makumi matano ku ntungo za nsulu nzinda za kibe kitangi, nu mpo makumi matano ku ntungo za nsulu nzinda za kingo kibe. 18 Nu bakitile pengele makumi matano za nsubi buno bakulumanie bibe bibili gamozi nu Numba zibe emozi tugu. 19 Kumbusa bakitile kyuki kya gantata ga nsulu za myoza za mpene na bikoba bya bilimba bya mikoko byatilwa idangi lyakisimana, nu gantata gabyo kyuki kya bikoba bya mpombolo. a
20 Bakitile mbavu za muti wa musita za kwemana mu Numba. 21 Bulazi bwa lubavu lumozi bwabezaga mabusu ikumi, nu bungulu bwa lubavu na lubavu bwabezaga ibusu limozi nu kyindi. 22 Bazikitile na magulu mabili mabezaga bulingilingi. Bakitile bubo ku mbavu insania za Numba. 23 Bakitile mbavu makumi mabili za kitutu kya ku lulenge lwa kwidume lwa Numba 24 nu bakitile bikalilo bya feza makumi manazi makwikala kunsi kwa mbavu, bikalilo bibili kunsi kwa lubavu lumozi, kikalilo kimozi ku kugulu kumozi, ku magulu mansania. 25 Nu ku lungo lulenge lwa Numba, ku kitutu kya ku lulenge lwa kwikazi, bakitile mbavu makumi mabili 26 nu bikalilo makumi manazi, bibili ku lubavu na lubavu. 27 Bakitile mbavu mutuba za lulenge lwa ku kwendaga kisongo kya busi, u lulenge lwa kumbusa kwa Numba. 28 Bakitile mbavu ibili za tupindapinda twa lulenge lwa kumbusa kwa Numba. 29 Ku tuto tupindapinda twa Numba lubavu na lubavu lwakitilwe lebelebe na mbavu ibili kutukila kunsi aaba nu kuntata kwazo, nu lubavu na lubavu lwa kapindapinda lwakulumanizibwe na mpo emozi. Lubavu na lubavu lwabezaga bumozi. 30 Ububo ku kitutu kya kumbusa kwabezaga mbavu kinana nu bikalilo ikumi nu mutuba, bibili ku lubavu na lubavu.
31 Lingo bakitile tuti twa musita tutano twakubika ku mbavu za lulenge lumozi lwa Numba, 32 nu tungo tutano twa mbavu za lungo lulenge, nu tungo tutano twa lulenge lwa kumbusa kwa ku kwendaga kisongo kya busi. 33 Bakitile iyango munkatini mwa mbavu buno litinge kunsania ku Numba munkatini mwa lubavu na lubavu. 34 Bakukide mbavu insania na olo, nu bakitile mpo za olo za kukata tuti. Lingo bakukide tuti na olo.
35 Bakitile nsulu za lwibi na misinge z'idangi ly'igulu nu misinge z'idangi lya misamba za mpene nu misinge zakisimana nu misinge za kitani kisoga, na makerubi malukilwe mu nsulu na muluki wa menge, u mulimo wa muluki. 36 Bakitile mango manazi ma muti wa musita makwanikila ku nsulu, nu bamakukide na olo nu bakitile magobo ma olo ma kubika gamo, nu banyengwide bikalilo binazi bya feza mu kumemania. 37 Ku mwingilo wa Numba bakitile lwibi na nsulu zibakitile na misinge z'idangi ly'igulu nu misinge z'idangi lya misamba za mpene nu misinge zakisimana nu misinge za kitani kisoga, u mulimo wa muluki wa menge. 38 Nu bakitile mango matano gamozi na magobo mamo. Bamakukide na olo nu magobo nu bakitile bikalilo bitano bya nsubi byakumeimika mubyo.