Sanduku za Bulongeki.
37
1 Bezaleli akitile sanduku za muti wa musita. Bulazi bwazo bwabezaga mabusu mabili nu kyindi, nu bungulu bwazo bwabezaga ibusu limozi nu kyindi; nu kusakama kwazo kwabezaga ibusu limozi nu kyindi; 2 azikukide na olo munda nu kumbuga, nu akitile mwimbo kuzitimba. 3 Anyengwide mpo inazi za olo nu azikandile ku magulu mazo manazi, na mpo ibili ku ntungo emozi nu bingo byabilingana bibili ku engo ntungo. 4 Kumbusa akitile mingolo ibili za muti wa musita nu azikukide na olo. 5 Nu azibikile mu mpo za ntungo buno banavwama kuzeeka. 6 Akitile kyuki kyazo, u Kisumbi kya Kyombo, na olo nsoga nunse. Bulazi bwakyo bwabezaga mabusu mabili nu kyindi, nu bungulu bwakyo bwabezaga ibusu limozi nu kyindi. 7 Akitile makerubi mabili ma olo; amatulile buno mabe ku ntungo na ntungo za kisumbi kya olo. 8 Akitile kerubi kamozi ku ntungo emozi za kisumbi, nu kango kerubi ku engo ntungo, nu mabezaga makitwa na kyindi kimozi kya olo gamozi na Kisumbi kya Kyombo. 9 Makerubi malambizie byupi byamo kwigulu, kukukila Kisumbi kya Kyombo nabyo, malolenne nu malolaga ku kisumbi.
Meza ma Tumpampa.
10 Akitile meza ma muti wa musita. Bulazi bwamo bwabezaga mabusu mabili, nu bungulu bwamo bwabezaga ibusu limozi, nu kusakama kwamo kwabezaga ibusu nu kyindi. 11 Amakukide na olo nsoga, nu akitile mwimbo wakumatimba. 12 Lingo akitile anga lubavu lwa olo lwa bungulu bw'ikasa limozi lwakutimba ntungo inazi za meza, nu akitile mwimbo wa olo ga lulo lubavu lwa olo. 13 Anyengwide mpo inazi za olo kuzibika ku meza, nu azikandile ku tunkundunkundu twa meza gago geli magulu mamo manazi. 14 Mpo zakandilwe bwigi na lubavu lulo lwa olo buno zakate mingolo za kweka meza. 15 Akitile mingolo za kweka meza na muti wa musita nu kuzikukila na olo. 16 Nu akitile bintu bya meza na olo, u mpepe nu mizugo nu bibungulu nu makopo ma kutaga ma tuyulo twa kunua.
Kyanikilo kya Matala.
17 Akitile kyanikilo kya olo nsoga nunse. Atulile kikalilo kyakyo nu mukomakoma wakyo nu makopo makyo masusania maluba nu kulinga kwa kwasa kwa maluba, nu binsania byakyo byakitilwe na kyindi kimozi kya olo. 18 Kwabezaga ntabi mutuba ku kyanikilo, ntabi isatu ku ntungo emozi nu engo ntabi isatu ku engo ntungo. 19 Lutabi na lutabi lwabezaga na bituma byasusania maluba ma muti wa mulozi na kulinga kwa kwasa kwa maluba nu maluba masanuka, nu mabezaga bumozi ku ntabi mutuba za kyanikilo. 20 Mu mukomakoma wa kyanikilo mwabezaga makopo manazi mabumbilwe anga maluba ma muti wa mulozi gamozi na kulinga kwa kwasa kwa maluba nu maluba masanuka. 21 Iduba limozi lyabezaga kunsi kwa ntabi ibili gazatukile ku mukomakoma, nu lingo iduba lyabezaga kunsi kw'ingo ntabi ibili gazatukile ku mukomakoma, nu anga bubo ku ntabi mutuba. 22 Maluba mamo nu ntabi zabezaga insania kibe kimozi na mukomakoma wa kyanikilo, kubuno kyanikilo nu maluba nu ntabi zatulilwe nunsania na olo nsoga.
23 Akitile matala mutubakamo, nu tulaso twa kukalakasa ntambi zamo nu mpepe zamo na olo nsoga. 24 Akitile kyanikilo nu binsania byakyo na talanta emozi a za olo nsoga nunse.
Kasenga ka kugisia aliga za nsunu nsoga.
25 Angile kasenga ka kugisia aliga na muti wa musita. Kabezaga bulingilingi, bulazi bwabezaga bumozi na bungulu. Bulazi bwako bwabezaga ibusu limozi, nu bungulu bwako bwabezaga ibusu limozi, nu kusakama kwako kwabezaga mabusu mabili. Mega mako mabezaga kyindi kimozi nako. 26 Akakukide na olo nsoga gantata nu ku ntungo inazi zako nu mega mako, nu akitile mwimbo wa olo ku ntungo insania. 27 Akitile mpo inazi za olo kunsi kwa mwimbo, ibili ku ntungo emozi, nu ingo ibili ku engo ntungo zabezaga bulazi buno byakate mingolo za kweka kako kasenga. 28 Akitile mingolo ibili milazi za kukeeka na muti wa musita, nu azikukide na olo.
29 Lingo akitile mwambo wa kizila wa kubonga nu bulago busoga nunse bwa nsunu nsoga, u mulimo wa wozo ukukita bulago busoga na menge makali.