Tuyulo twa bunga bwa ngano aba mbuto.
2
1 Nu atendile lingo bunee: “Nkungu zikukasana muntu unsania kayulo ka mbuto ku Yehowa, kabe ka bunga busoga nunse. Asongolozie makiti gantata gabo, nu abike bulago gantata gabo, 2 nu ende nabo ku basankoga ba kibuti kya Haruni. Sankoga umozi akate ikasa limozi lya bo na makiti gamozi na bulago bunsania nu kumagisia, bunga buli na makiti bwakatile nu bulago, mu keiya keli ga kasenga buno mabe kakengelezio ga kasenga ka kayulo kakugisibwa na keiya, u nsunu nsoga zatananina Yehowa. 3 Nu bubo bunga bwa ngano bwasigala ku kayulo ka Kalaga buli bwa Haruni nu bana bage. Bubo bunga buli kyindi kyasililila nunse kya kayulo ka Yehowa kakaswa kweli na keiya. 4 Nkungu zatunda muntu kukasana ku Kalaga kayulo ka bunga bwa ngano bwokibwa mu mapika, nti bwabe bunga busoga nunse bwasambikwa na makiti geteli mugago, bwokibwa tumpampa tutagaga aba bitumbula bikeke bitagaga nu byabongibwa na makiti. 5 Ndi kayulo kaakukasana kayikwa mu mpano, nti kakitwa na bunga bwa ngano busoga nunse bwasambikwa na makiti geteli mugago. 6 Bungulabo nu songolozia makiti ga ko nu keli kayulo ka bunga. 7 Ndi kayulo ka bunga kayikwa mu nyungu, kakitwe na bunga bwa ngano busoga nunse gamozi na makiti. 8 Mukase Yehowa kayulo kakitwa na bibyo byakaswe ku sankoga nu akalusie ku kasenga ka kayulo, 9 nu atikye ko nkindi za kukengelezia nu kuzigisia mu keiya ga kasenga zibe kayulo ka keiya, u nsunu zatananina Yehowa. 10 Bunga bwa ngano bwasigala bwa kayulo buli bwa Haruni nu bamulume ba kibuti kyage, u bana bage. Kili kyindi kyasililila nunse kya tuyulo twakaswa ku Yehowa mu nzila za keiya.
11 Kayulo ka bunga kamukakasana ku Yehowa takagagibwe, kubuno tamwagisie mugago aba buuki mu kayulo kansania kakaswa ku Yehowa mu nzila za keiya. 12 Nkaso za matubulo matangi mamukukasana ku Yehowa tamalusibwe ku kasenga buno magisibwe kuba nsunu nsoga zatananizie Yehowa. 13 Tuyulo tweinyu tunsania twa bunga bwa ngano tulungwe na munkange. Tamuzige kayulo kamozi ka bunga kwida munkange w'idagano lya Kalaga weinyu. Gamozi na tuyulo tunsania bikazi munkange.
14 Ndi muntu akasana ku Yehowa kayulo ka matubulo matangi, nti akasana mbuto nto zokibwa ga keiya. 15 Songolozia makiti nu bika bulago gantata gazo. Zili kayulo ka mbuto. 16 Sankoga agisie nkindi za kakengelezio za mbuto zasuswidwe, gamozi na makiti nu bulago bunsania buno zibe kayulo kakaswa ku Yehowa mu nzila za keiya.”