BALAWI 3

Kayulo ka Bubobelelo ka kugomania

1 Nu atendile lingo bunee: “Ndi muntu atunda kukasana ku Yehowa kayulo ka bubobelelo, nu atunda kukasana ngombe, aba mulume aba ibuti, nti akasane ku Yehowa ngombe ziteli na kabalibango nunse. 2 Abike kuboko kwage g'itoe lya ngombe za kisansa nu kuzisesa ga mwingilo wa mukolo wa Numba za Hema. Nu basankoga, u bamulume ba kibuti kya Haruni, basandide mikila zazo ku ntungo insania za kasenga ka kayulo. 3 Ku kayulo ka bubobelelo, akasane byindi bibino byili bya kugisibwa ku Yehowa: u manona makukila bya munda mwazo aba meli kubyo, 4 nu mpiku zazo ibili nu manona meli kuzo, nu mo meli bwigi na mutibi, nu manona meli ku kankungwe ka kitugu gamozi na zezo mpiku. 5 Bana ba Haruni babigisie ga kasenga gantata kayulo ka kugisibwa keli ga misali zikugulumina ga kasenga anga kayulo ka kugisibwa, u nsunu nsoga za kutananizia Yehowa.

6 Ndi atunda kukasana kayulo ka bubobelelo ku Yehowa, nti akasane kilimba aba ibuti lya mukoko aba mpene, geteli itondoki aba kabalibango. 7 Ndi akasana kyana kya mukoko aba kya mpene, nti akasane ku Yehowa. 8 Abike kuboko kwage g'itoe, nu kukisesa ga mwingilo wa mukolo wa Numba za Kukulumana. Nu bamulume ba kibuti kya Haruni, u basankoga, basandide mikila zakyo ku ntungo insania za kasenga ka kugisia tuyulo. 9 Ku kayulo kakano ka bubobelelo, akasane byindi bibino kuba kayulo ka kugisibwa ku Yehowa: manona mansania makukila bya munda mwakyo, nu mukila unsania wanona wakyo waseswe ku mutibi, 10 nu mpiku gamozi na manona makuzikukila nu meli bwigi na mutibi, na mamo ma kankungwe ka kitugu, byatikye sankoga gamozi na mpiku. 11 Sankoga abigisie ga kasenga. Bili idia lya kayulo kagisibwa ku Yehowa mu nzila za keiya.

12 Ndi kayulo kage keli mpene, nti azikasane ku Yehowa. 13 Abike kuboko kwage ku itoe lyazo nu kuzisesa ga mwingilo wa mukolo wa Numba za Kukulumana. Nu basankoga, u bamulume ba numba za Haruni, basandide mikila zazo ku ntungo insania za kasenga ka kayulo. 14 Ku kayulo kaakukasana ku Yehowa, akasane byindi bibino bibe kayulo ka kugisibwa ku Yehowa mu nzila za keiya: manona mansania makukila bya munda mwazo aba meli kubyo, 15 nu mpiku ibili zazo gamozi na manona mazikukila meli bwigi na mutibi, nu mamo ma kankungwe ka kitugu maakutikya gamozi na mpiku. 16 Sankoga abigisie binsania ga kasenga ka kayulo bibe kayulo k'idia ka kugisibwa na keiya, u nsunu nsoga zatananizia Yehowa. Manona mansania meli ma Yehowa.

17 Mulembe wono guli wa milyalya kumuli nu bibuti byeinu bikavwa, buno tamulie manona mansania aba mikila insania.”