Kisansa kya bwagi
4
1 Yehowa abwide Musa bunee: 2 “Tenda ku baIsraeli bunee: ‘Ndi muntu akita bwagi geteli kubulongeka mu kitondo kinsania kyakakizizie Yehowa buno takikitwe anga bibino: 3 Ndi sankoga wabongibwa mwambo akita bwagi nu kulusia katati ka kwaga ku bantu, nti akasane ku Yehowa kisansa ku kabamba ka bwagi bwakitile. Kisansa kyage kya bwagi kibe kyana kya mulume kya ngombe kiteli na kabalibango. 4 Avwe nakyo ga mwingilo wa mukolo wa Numba lwabusio lwa Yehowa, nu abike kuboko kwage g'itoe lyakyo nu kukisesa lwabusio lwa Yehowa. 5 Nu sankoga wabongibwa mwambo atole nkindi za mikila zakyo nu kuzeeka mu Numba za Kukulumana, 6 nu na munwe wage, azisandile lwabusio lwa Yehowa mambizi mutubakamo lwabusio lwa nsulu zikubisa Kiziki Kyasililila Nunse. 7 Nu wozo sankoga abike mikila ga mega ma kasenga ka bulago bwa nsunu nsoga keli lwabusio lwa Yehowa mu Numba za Kukulumana, nu ingo mikila za kyana kya ngombe zasigala, nti azikubule gansi bweta kasenga ka kugisia bisansa keli bwigi na mwingilo wa mukolo wa Numba za Kukulumana. 8 Atikye manona mansania makyo, mamo makukila bya munda mwakyo, u manona mansania meli munda mwakyo, 9 nu mpiku ibili zakyo gamozi na manona mazo, nu mamo ma kankungwe ka kitugu, 10 anga bwakutikya manona ma ngombe za kayulo ka bubobelelo, nu amagisie gamozi na mpiku ga kasenga ka tuyulo twa kugisibwa. 11 Tondo kikoba kya ngombe nu misuna zazo insania gamozi n'itoe lyazo nu magulu mazo nu bya munda mwazo, nu tubi twazo, 12 u binsania byazo byasigala, tugu manona nu mpiku zazo, bingo binsania abyeke ku isula lya mwino ku kiziki kyasililila, u kiziki kya kwisa lwito, nu agisie ngombe gago, mu keiya ka misali ku kiziki kya lwito. 13 Ndi musanganano unsania wa baIsraeli waga mu kinsania kyakakizizie Yehowa buno takikitwe, nubo bakikitile tabakumenya buno bagile, nti beli na katati ka bwagi. 14 Nkungu zikumenywa bwagi bubakitile, nti musanganano unsania watole mulume wa ngombe kuba kisansa kyabo kya bwagi, nu bazilusie ku Yehowa lwabusio lwa Numba za Kukulumana. 15 Bakulu ba musanganano babike maboko mabo g'itoe lya ngombe lwabusio lwa Yehowa, nu ngombe zaseswe lwabusio lwa Yehowa. 16 Sankoga wabongibwa mwambo ende mu Numba za Kukulumana na nkindi za mikila za ngombe, 17 nu asandide zo mambizi mutubakamo lwabusio lwa Yehowa nu lwabusio lwa nsulu zikubisa Sanduku, 18 nu abike nkindi nkeke za mikila ziili nazo ga mega manazi ma kasenga ka bulago keli lwabusio lwa Yehowa mu Numba za Kukulumana. Nu asubye ku kasenga ka kugisibwa tuyulo nu gago akubule gansi mikila insania zasigala za ngombe, azikubule gansi bweta kasenga ka tuyulo twa kugisibwa keli bwigi na mwingilo wa mukolo wa Numba za Kukulumana. 19 Atikye manona mansania nu kumagisia ga kasenga, 20 nu akite na zeno ngombe lebelebe anga bwakitile na ngombe za kisansa kya bwagi. Bubo u bwakitike sankoga bukuluzi nu basigililwe bwagi. 21 Kumbusa eeke ngombe ku isula lya mwino nu kuzigisia anga bwagisizie ngombe ntangi. Zeno ngombe zili kisansa kya bwagi bwakita musanganano unsania.
22 Ndi mwangati aga geteli kukilongeka mu kitondo kinsania kya bibyo byakakizizie Yehowa, Kalaga wage, buno tabikitwe, nti eli na katati ka bwagi. 23 Kungwa amenya buno akitile bwagi, nti avwe na kisansa kyage, u kyana kya mpene, kilimba kyasililila. 24 Abike kuboko kwage g'itoe lyakyo nu kukisesa ku kiziki kya kusesa kisansa kya kugisibwa lwabusio lwa Yehowa. Kili kisansa kya bwagi. 25 Nu na munwe wage sankoga abike nkindi za mikila zakyo ga mega ma kasenga ka tuyulo twa kugisibwa, nu akubule mikila insania zasigala, kuzikubula gansi bweta kasenga ka kugisibwa. 26 Nu agisie ga kasenga kako manona mansania makyo, anga bwagisizie manona ma kayulo ka bubobelelo. Bubo u bwamukitile sankoga bukuluzi ku kabamba ka bwagi bwakitile, nu muntu nti asigililwe bo.
27 Ndi muntu unsania wa mu musanganano aga geteli kubulongeka nu akita kitondo kimozi kya bibyo byakakizizie Yehowa buno tabikitwe, nti eli na katati ka bwagi. 28 Kungwa abumenya aba kumenyesibwa buno agile, nti alusie kisansa kyage, u ibuti lya mpene liteli na kabalibango kuba kisansa kya bwagi bwakitile. 29 Abike kuboko kwage g'itoe lyalyo nu kulisesa ku kiziki kyakusesa kisansa kya kugisibwa. 30 Nu sankoga, na munwe wage, abike nkindi za mikila zalyo ga mega ma kasenga ka kugisibwa, nu kukubula mikila zasigala gansi bweta kasenga kako. 31 Nu atikye manona malyo anga bwatikizye manona ma kisansa kya bubobelelo, nu amagisie ga kasenga mabe nsunu nsoga zikutananizia Yehowa. Bubo u bwamukitile sankoga bukuluzi, nu muntu asigililwe bwagi. 32 Ndi avwa na kyana kya mukoko kili kisansa kyage kya bwagi, nti avwe na kyana kya mukoko kili ibuti kiteli na kabalibango. 33 Abike kuboko kwage g'itoe lyakyo nu kukisesa ku kiziki kya kusesa kisansa kya kugisibwa buno kibe kisansa kya bwagi. 34 Nu sankoga atole nkindi za mikila za kisansa kya bwagi, nu na munwe wage azibike ga mega ma kasenga ka bisansa, nu ingo mikila insania azikubule gansi bweta kasenga. 35 Atikye manona mansania, anga bwatikizye manona ma mukoko wa kisansa kya bubobelelo, nu sankoga amagisie ga kasenga gantata bisansa bikugia ku Yehowa mu nzila za keiya. Bubo u bwamukitile sankoga bukuluzi ku kabamba ka bwagi bwakitile, nu muntu nti asigililwe bo.’”