5
1 Nu atendile lingo bunee: “Ndi muntu unsania akita bwagi kubuno amonine ku kitondo aba ungule moki m'ungo muntu, nu amanwa kumulongekela, ndi ntakulolesia kitondo kikyo lebelebe ku ngatu, nti eli na katati ka bwagi. 2 Ndi muntu unsania eitubya ku kintu kili nsese, anga bitumba bya nyama za mu lubanda ziteli nsoga, aba kituganwa kiteli kisoga, aba kikugelegeta gansi kiteli kisoga, aba ntakumenya buno eitubizia kukyo, nti ntasililila nu eli na katati ka bwagi. 3 Aba ndi eitubya ku nsese insania za bantu, ku kinsania kya kukita muntu buno ntaswaga, aba nu ntamenya buno eitubizie ku nsese zezo, nkungu zakukimenya nti eli na katati ka bwagi.
4 Aba ndi muntu unsania alumbila lubilo idumbilo na milomo zage, aba idumbilo lisoga aba libi, mu kitondo na kitondo kyalumbila bantu, aba ntakulisongolola buno alilumbide, kungwa alisongolola nti eli na katati ka bwagi.
5 Kungwa muntu unsania eli na katati ka bwagi mu nzila zeno, nti eigonge bwagi bwakitile, 6 nu ku lusungio lwa bwagi bwakitile, nti alusie ku Yehowa ibuti lya mukoko aba ibuti lya mpene libe kisansa kya bwagi, nu sankoga amukitile bukulumania ku kabamba ka bwagi bwakitile. 7 Ndi nteli na kyana kya mukoko, nti avwe na bilinga bibili aba byana bibili bya nkulimba ku Yehowa, kimozi kili kisansa kya bwagi, nu kingo kili kisansa kya kugisibwa. 8 Avwe nabyo ku sankoga, waakasane tanga kikyo kili kisansa kya bwagi. Akyotole itoe ku ikosi lyakyo, tondo ntalisese nunsania. 9 Asandide nkindi za mikila za kisansa kya bwagi ku kasenga ka kugisia bisansa, nu ingo mikila insania zatukibwe gansi bwigi na kasenga kako. Zili kisansa kya bwagi. 10 Kumbusa sankoga atole kango kazoni nu kukakasana kuba kisansa kya kugisibwa anga buli mulembe wa bisansa bya kugisibwa, nu sankoga amukitile bukulumania ku kabamba ka bwagi bwakitile, nu we nti asigililwe bwagi.
11 Tondo ndi nteli na bilinga bibili aba byana bibili bya nkulimba, nu ntavwama kubikunza kubuno eli muzambi nunse, nti avwe na kisansa kyage kya bwagi kili kyindi kimozi ky'ikumi kya luzi a lwa bunga busoga. Ntabike makiti kubo aba bulago, kubuno buli kisansa kya bwagi. 12 Abulusie ku sankoga. Atikye ikasa limozi kubo kuba kakengelezio nu kubugisia ga kasenga anga buli tuyulo twa kugisia na keiya ku Yehowa. Buli kayulo ka bwagi. 13 Bubo u bwamukitile bukulumania ku kabamba ka bwagi bunsania bwakitile, nu we asigililwe bo. Bunga bwasigala bwabe bwa sankoga, bumozi anga bubo bwasigala mu kayulo ka bunga.”
Kisansa kya katati ka bwagi
14 Yehowa abwide lingo Musa bunee: 15 “Kungwa muntu unsania aga, nu akita bwagi geteli kubulongeka tanga, mu kitondo kya bitondo byasililila bya Yehowa, nti ku lusungio lwage avwe ku Yehowa na kilimba kya mukoko kiteli na kabalibango nu kya bukunza bwakuka ku kilindiko b kya feza kili mu Numba Zasililila. Kilimba kikyo kili kisansa kya katati ka bwagi. 16 Muntu alige bukunza bwa kikyo kyakitile mu bitondo byasililila, nu atalike kyindi kimozi kya bitano kya bukunza bwakyo nu abikase binsania ku sankoga, waamukitile bukulumania na kilimba kya mukoko, kili kisansa kya katati ka bwagi, nu wozo muntu asigililwe bo.
17 Ndi muntu aga gaakukita kitondo kyakakizizie Yehowa buno takikitwe ku makakizio mansania ma Kalaga, aba nu ntakukimenya, nti eli na katati nu eeke bubi bwage. 18 Nu we alusie ku sankoga kilimba kya mukoko kiteli na kabalibango nunse nu kya bukunza busoga. Bubo bwamukitile sankoga bukulumania ku kabamba ka bwagi bwakitile geteli kubulongeka tanga, nu asigililwe bo. 19 Kili kisansa kya katati ka bwagi, kubuno eli na katati ka bwagi bwakitide Yehowa.”