6
1 Nu Yehowa akakizizie Musa bunee: 2 “Muntu unsania wagila Yehowa nu kwekela munyage buza mu kitondo kya kumulangila kimozi kyage aba kya kumwambya nu kumunyaga aba kumwengelela, 3 aba ndi asanga kimozi kyazimina nu kweka buza kukyo, aba ndi alagile munyage buza, ndi akita bwagi mu kitondo kinsania anga bibino bikukita bantu, 4 kungwa akitile bwagi nu eli na katati, nti atunganana kusubya kikyo kyibile aba kyanyagile aba kikyo kyakasilwe kweli kukilanga, aba kikyo kyasangile, 5 aba kintu kinsania kyalagile na buza. Ee, atunganana kukisubya, nu atalike kyindi kimozi kya bitano kya bukunza bwakyo nu kubikasana ku nyene kyo busi bubo bwa kukasana ku Yehowa kisansa kyage kya bwagi. 6 Kisansa kyage, u lusungio lwage ku Yehowa ku bwagi bwage, kyatunganana kuvwa nakyo ku Yehowa nu kukikasa ku sankoga kibe kilimba kya mukoko wa lusumba lwage. Kibe kilimba kiteli na kabalibango nu kya bukunza bwakuka. 7 Sankoga akite nakyo kisansa, nu bubo u bwamukitile sankoga bukulumania lwabusio lwa Yehowa, nu wozo muntu asigililwe bwagi bwakitile mu kitondo kinsania kyamulusizie katati ka bwagi.” Makakizio ma tuyulo twa kugisibwa
8 Yehowa abwide lingo Musa bunee: 9 “Kakizia Haruni nu bana bage bamulume bunee: ‘Mamano meli makakizio ma tuyulo twa kugisibwa: Kayulo ka kugisibwa kasigale kindi kinsania ga misali zikugia ga kasenga ka kayulo ka nsubi, aaba nu nindunindu. Keiya ka kasenga takazime kindi kinsania. 10 Mu nindunindu sankoga avwale itekele lyage lya kitani nu nsulu zage za kitani, nu atikye lwito lwa kayulo ka kugisibwa ga kasenga ka kugisia tuyulo, nu kulubika gansi ku ntungo za kasenga. 11 Nu eikungule nsulu zage nu kuvwala engo nsulu, nu eeke lwito lulo lwabikile gansi ku kiziki kisanana kili ku isula ly'ido. 12 Keiya keli ga kasenga ka kugisia tuyulo kabangage kankanka, takazime. Nindunindu na nindunindu sankoga alongeke misali ga ko, nu agisie muko kisansa kya nindunindu kya kugisibwa nu manona ma kayulo ka bubobelelo. 13 Keiya ka kasenga ka kugisia tuyulo kaguluminage, takazime nunse.
14 Mamano meli makakizio ma tuyulo twa mbuto aba bunga: bana ba Haruni batukasane ku Yehowa ga kasenga ka kugisia tuyulo lwabusio lwage. 15 Nu sankoga akate bwavwama kukata mu ikasa limozi ku bubo bunga busoga nunse nu makiti masambikwa nabo, gamozi na bulago bunsania buli ga kayulo ka bunga, nu kubigisia binsania anga nkindi za kakengelezio ga kasenga ka kugisia tuyulo buno bibe nsunu nsoga ku Yehowa. 16 Nu bunga bwasigala, butagisibwa, bwabe idia lya Haruni nu bamulume ba kikanga kyage. Babulie geteli mugago mu kiziki kyasililila, u ga mulungu wa mukolo wa Numba za Kukulumana. 17 Tabusambikwe na mugago. Nabakasilebo bwabe nkindi zabo za tuyulo twakasanwa kundi mu keiya. Anga buli kayulo ka bwagi nu kayulo ka katati ka bwagi twasililila nunse, kayulo ka bunga keli kasililila nunse. 18 Bamulume bansania babutilwe mu kikanga kya Haruni babulie. Buli nkindi zabo munkatini mwa tuyulo twakasanwa ku Yehowa mu keiya mu bibuti binsania bikabutwa. Na muntu na muntu witubye kubo abe wasililila.’”
19 Nu Yehowa abwide lingo Musa bunee: 20 “Kakano keli kayulo ka Haruni nu bana bage bamulume kabakasane ku Yehowa mu busi bwabo bwa kubongibwa mwambo: kyindi kimozi ky'ikumi kya luzi a kya bunga busoga nunse kibe kayulo kabo ka bunga anga ka busi na busi ka bango bantu, nu bakasane kyindi kimozi kya bibili kya bubo bunga mu nindunindu, nu kyindi kimozi kya bibili mwigolo. 21 Longeka bunga bubo na makiti mu mpano. Vwa nabo bwasambikwa busoga nu kubukasana ku Yehowa, bwabe kayulo ka bunga ka nsunu nsoga zatananizia Yehowa. 22 Mwana wage wasombwedwe mu kiziki kyage, buno abongibwe kuba sankoga munene, akalongeke nu kukakasana buno kabe kayulo ka Yehowa, nu kagisibwe nunsania. 23 Kayulo na kayulo ka bunga ka sankoga kagisibwe nunsania. Takalibwe aba kakeke.”
Bisansa bya bwagi
24 Nu Yehowa atendile lingo ku Musa bunee: 25 “Bula Haruni nu bana bage bunee: ‘Mamano meli makakizio ma bisansa bya bwagi: Bisansa bya bwagi byaseswe lwabusio lwa Yehowa ga kiziki gakusesagwa kayulo ka kugisibwa. Kili kyasililila nunse. 26 Sankoga wakikasane akilie. Kyalibwe mu kiziki kyasililila ga mulungu wa mukolo wa Numba za Kukulumana. 27 Unsania witubye ku misuna zakyo eisanane, nu ndi matogi masanduka ku nsulu, aba limozi tugu, nti zasugwa ku kiziki kyasililila. 28 Ndi mwayika misuna zezo mu nyungu z'ibumba, nti zabugibwa; tondo ndi mwaziyika mu nyungu za nsubi, nti zasugwa nu kwengibwa na mazi. 29 Bamulume bansania beli basankoga banazilia. Zili zasililila nunse. 30 Tondo kisansa kya bwagi kya kweka mikila zakyo mu Numba za Hema za Kukulumana buno zikukulula muntu mu Kiziki Kyasililila takyalibwe nunse, kyagisibwe nunsania na keiya.’”