Bisansa bya katati ka bwagi
7
1 Nu atendile lingo bunee: “Mamano meli makakizio ma bisansa bya katati ka bwagi, u bisansa byasililila nunse: 2 Kisansa kya katati ka bwagi kyaseswe mu kiziki kya kusesa kayulo ka kugisibwa, nu mikila zasandilwe ku ntungo insania za kasenga ka tuyulo twa kugisibwa. 3 Manona mansania makyo, u mukila wanona wa nyama, nu manona makukila bya munda mwazo, 4 nu mpiku ibili gamozi na manona meli kuzo nu bwigi na mitibi zazo, nu manona ma kankungwe ka kitugu, manona mamo mansania matikibwe gamozi na mpiku. 5 Sankoga amagisie mansania ga kasenga ka tuyulo, mabe kisansa kyakasanwa ku Yehowa mu nzila za keiya. 6 Wamulume na wamulume wa kikanga kya sankoga analia misuna zakyo, tondo zalibwe mu kiziki kyasililila tugu, kubuno kili kisansa kyasililila nunse. 7 Kuli ikakizio limozi ku kisansa kya bwagi nu ku kisansa kya katati ka bwagi. Lili bunee: bibyo bisansa bili bya sankoga ukukita bukuluzi nabyo. 8 Sankoga ukukasila ungo muntu kisansa kya kugisibwa eidangile kikoba kya kikyo kisansa. 9 Kayulo ka bugali kokibwa mu mapika aba kuyikwa mu mpano, nti kabe ka sankoga ukukakasana, 10 nu kayulo na kayulo ka bunga, ndi bwasambikwa na makiti aba ndi bwakama, nti buli bwa bana bamulume ba Haruni, muntu na muntu bumozi.
Kayulo ka bubobelelo
11 Mamano meli makakizio ma tuyulo twa bubobelelo twakasane muntu ku Yehowa: 12 Kungwa akakasana kubuno akutunda kuganuna Yehowa, nti akasane kayulo ka kuganuna gamozi na tumpampa tutagaga tondo na makiti masambikwa na bunga, aba tumpampa twakitwa geteli mugago tondo na makiti mabalanganibwa gantata gato, aba tumpampa tukeke twa bunga bwasambikwa busoga na makiti tanga, nu kumbusa na mazi makeke. 13 Gamozi na kayulo kage ka mponga nu ka kuganuna, akasane kayulo ka tumpampa tutagaga. 14 Avwe na kampampa kamozi ka lukita na lukita buno kabe lukaso, u kayulo kakasanwa ku Yehowa. Keli ka sankoga wasandila mikila za kayulo ka bubobelelo. 15 Misuna za kayulo ka bubobelelo zalibwe ku busi bubo bwa kukakasana, ntasige milanga mikeke zazo aaba nu nindunindu.
16 Tondo kungwa kayulo ka bubobelelo keli ku kabamba k'idumbilo lyalumbide, aba ku kabamba ka mutima wage, nti kayulo kage kalibwe busi bubo bwa kukakasana, nu milanga za ko nti lubi zinalibwa, 17 tondo ndele nti milanga za misuna zagisibwe. 18 Ndi misuna mikeke insania zalibwa busi bw'isatu kumbusa kwa kusesa kayulo, nti kayulo takeitabizibwe aba tazaganzwe kayulo ka wozo wavule nako, kubuno kabede lusombo, nu muntu wazilia eeke katati ka bwagi.
19 Misuna insania zitubya ku kinsania kiteli kyasililila tazilibwe, tondo zigisibwe mu keiya. Ku kitondo kya zingo misuna ziteitubya ku nsese, muntu na muntu uli wasililila analia kuzo. 20 Tondo muntu uli na nsese, ndi alia misuna mikeke za kayulo ka bubobelelo keli ka Yehowa, nti muntu wozo alekanukibwe bulazi na bantu bage. 21 Muntu unsania witubya ku kinsania kili nsese, aba nsese za muntu, aba nyama ziteli nsoga, aba nsese za lusombo lunsania, nu alia misuna insania za kayulo ka bubobelelo keli ka Yehowa, nti wozo muntu alekanukibwe bulazi na bantu bage.”
Ikakizio lya kutalia manona nu mikila
22 Yehowa abwide lingo Musa bunee: 23 “Tenda ku baIsraeli bunee: ‘Tamulie manona ma ngombe aba ma mukoko aba ma mpene. 24 Muli na bwangato bwa kukita ungo mulimo unsania na manona ma nyama zasangwa zakule kalazi aba ma nyama zatwa n'ingo nyama, tondo tamumalie aba kakeke, 25 kubuno muntu unsania walia manona ma nyama zakasanwa ku Yehowa kuba kayulo ka kugisibwa mu nzila za keiya, nti wozo muntu alekanukibwe bulazi na bantu bage. 26 Kunsania kumukeikalaga tamulie mikila za tuzoni tunsania aba za nyama insania. 27 Muntu unsania walia mikila, wozo muntu alekanukibwe bulazi na bantu bage.’”
Bibu bya Basankoga
28 Yehowa atendile lingo ku Musa bunee: 29 “Tenda ku baIsraeli bunee: ‘Muntu unsania wakasana kayulo ka bubobelelo alusizie Yehowa nkindi zako zibe kayulo kage ku Yehowa. 30 Na maboko mage wenyene alusie kayulo kage ka kukasanwa ku Yehowa mu nzila za keiya. Avwe na manona mansania gamozi na bukuba mu maboko mage, nu atengietengie bukuba lwabusio lwa Yehowa, bwabe kayulo ka kutengibwatengibwa. 31 Sankoga agisie manona ga kasenga ka bisansa, tondo bukuba bwatengibwa buli bwa Haruni nu bamulume ba kikanga kyage. 32 Mwakase sankoga lutungi lwidume lwa tuyulo twa bubobelelo, lwabe kweli. 33 Munkatini mwa bamulume ba kikanga kya Haruni, wozo wasandide mikila nu kugisia manona ma kayulo ka bubobelelo abe na lutungi lwidume anga kibu kyage. 34 Ku tuyulo twa bubobelelo tukukasana baIsraeli ku Yehowa nasombwede buno bukuba bwatengibwa nu lutungi lwidume byakaswe ku basankoga, u Haruni nu bamulume ba kikanga kyage, nu bibe bibu byabo byakaswa na baIsraeli.’”
35 Bibino bili nkindi za tuyulo twakasanwa ku Yehowa mu nzila za keiya zakasilwe ku Haruni nu bana bage bamulume, busi bubo bubabikilwe ku mulimo wa busankoga kukitila Yehowa mugo. 36 Busi bubabongezibwe mwambo Yehowa akakizizie buno baIsraeli babakase bibu bibyo bibili anga bibu byabo, nu ikakizio lilino lili kubeli aaba nu ku milyalya.
37 Mamano meli makakizio ma kayulo ka kugisibwa, ma kayulo ka mbuto nu bunga, nu ma kisansa kya bwagi, ma kisansa kya katati ka bwagi, ma kayulo ka kubika muntu ku mulimo wasililila, nu ma kayulo ka bubobelelo. 38 Yehowa akakizizie Musa makakizio mansania ga Mwiduko Sinai ku busi bwakakizizie baIsraeli buno bakasane nkaso zabo ku Yehowa mu Kalula ka Sinai.