Haruni nu bana bage babongibwa mwambo
8
1 Yehowa abwide Musa bunee: 2 “Vwa na Haruni nu bana bage gamozi nage, nu nsulu zabo nu mwambo wa kubonga, nu mulume wa ngombe wa kisansa kya bwagi, nu bilimba bibili bya mikoko, nu luzi luli na tumpampa tutagaga, 3 nu kundamania bantu bansania ba musanganano ku mwingilo wa mukolo wa Numba za Kukulumana.” 4 Musa akitile anga bwakakizizie Yehowa, nu musanganano wakundamenne ga mwingilo wa mukolo wa Numba za Kukulumana. 5 Musa abwide musanganano bunee: “Yehowa akakizizie buno tukite kitondo kikino.” 6 Musa alusizie Haruni nu bana bage nu abogezie na mazi. 7 Kusila avwalikizie Haruni zezo nkanzu nu kumukandila mukoma wazo. Amuvwalikizie ikoti nu efodi. Amutendekile efodi na mukoma wazo walukilwe na menge, buno efodi zakandwa lebelebe. 8 Kusila amubikile nsulu za bukuba, nu abikile muzo Urimu nu Tumimu. 9 Kusila abikile nkumbu ku itoe lya Haruni nu abikile lupepe lwa olo, u kalolesio ka bwangato kasililila, ga nkumbu ku ntungo za lwabusio anga bwakakizizie Yehowa ku Musa.
10 Kumbusa Musa atolile mwambo wa kubonga, abongezie mwambo ku Numba za Hema nu ku binsania byabezaga muzo, buno abyengie. 11 Asandide mwambo mambizi mutubakamo ga kasenga ka tuyulo kubongia mwambo gako nu ga binsania byako, nu ga kibungulu kya koga nu kikalilo kyakyo. 12 Akubwide mwambo wa kubonga g'itoe lya Haruni nu amubongezie mwambo kumubika ku mulimo wage. 13 Kusila Musa alusizie bana ba Haruni, nu abavwalikizie nkanzu nu kubakanda mikoma nu kubabika nkumbu zabo, anga bwakakizizie Yehowa ku Musa.
14 Kusila alusizie mulume wa ngombe wa kisansa kya bwagi, nu Haruni nu bana bage babikile maboko mabo g'itoe lyazo. 15 Musa azisesile, nu atolile nkindi za mikila zazo nu na munwe wage azitilile ga mega mansania ma kasenga ka kayulo buno engie kasenga. Akubwide ingo mikila insania gansi bweta kasenga. Bubo u bwakengezie, kukita bukuluzi ku kabamba ka ko. 16 Musa atikizye manona mansania ma munda mwazo, u manona ma bya munda, nu ma kankungwe ka kitugu, nu mpiku gamozi na manona mazo, nu amagisizie ga kasenga. 17 Tondo mulume wa ngombe nu kikoba kyazo nu misuna nu tubi twazo azigisizie ku isula lya mwino, anga bwakakizizie Yehowa ku Musa.
18 Kusila alusizie kilimba kya mukoko kya kayulo ka kugisibwa, nu Haruni nu bana bage babikile maboko mabo g'itoe lyakyo. 19 Nu Musa asesile kilimba kya mukoko nu asandide mikila zakyo ku ntungo insania za kasenga ka tuyulo. 20 Akibagile byindi byindi, nu kugisia itoe nu byindi byakyo na manona. 21 Asugile bya munda byakyo nu magulu na mazi, agisizie kilimba kya mukoko kinsania ga kasenga ka tuyulo kibe kayulo ka kugisibwa ku Yehowa anga bwakakizizie Yehowa ku Musa.
22 Alusizie kingo kilimba kya mukoko, u mukoko wa kubabika ku mulimo wasililila. Haruni nu bana bage babikile maboko mabo g'itoe lyakyo. 23 Musa akisesile, nu abikile nkindi za mikila zakyo ku ntonga za kutuzi kwa seidume kwa Haruni, nu ku munwe wage wa kinkumu wa seidume, nu ku mpanda za mulume za kugulu kwage kwa seidume. 24 Musa akundizie bana ba Haruni nu abikile nkindi za mikila ga ntonga za matuzi mabo ma ku seidume, nu ku binkumu byabo bya minwe bya ku seidume, nu ku mpanda za mulume za ku seidume. Kusila asandide ingo mikila insania ku ntungo insania za kasenga ka tuyulo twa kugisibwa. 25 Atolile manona nu mukila wanona nu manona mansania ma bya munda, u mamo ma kankungwe ka kitugu, nu mpiku gamozi na manona mazo, nu kilumbu kya ku seidume. 26 Nu ku luzi lwa tumpampa tutagaga lwabezaga lwabusio lwa Yehowa atolile kampampa kamozi, nu kango kamozi kasambikwa na makiti, nu kamozi kakeke keli anga mukuki, nu atubikile ga manona nu kilumbu kya ku seidume. 27 Abibikile binsania ku maboko ma Haruni nu bana bage, nu babitengezietengezie lwabusio lwa Yehowa, buno bibe kayulo ka kutengibwa. 28 Lingo Musa abitikizye ku maboko mabo nu abigisizie binsania gantata kayulo ka kugisibwa, anga kayulo kabo ka kubabika mu mulimo wa Kalaga, u kayulo ka nsunu nsoga nu kakugisibwa ku Yehowa mu nzila za keiya. 29 Nu atolile bukuba bwa kilimba kya mukoko kya kayulo kakubabika ku mulimo wasililila, u kibu kya Musa, nu abutengezietengezie lwabusio lwa Yehowa anga kayulo ka kutengibwa, anga bwamukakizizie Yehowa.
30 Kusila Musa atolile nkindi za mwambo wa kubonga nu nkindi za mikila zabezaga ga kasenga nu azisandide ku Haruni nu nsulu zage, nu ku bamulume ba kikanga kyage nu nsulu zabo. Bubo u bwengezie Musa Haruni nu bana bage nu nsulu zabo.
31 Kusila Musa abwide Haruni nu bana bage bunee: “Yikazi misuna zeno bwigi na mwingilo wa mukolo nu gago mwazilie gamozi na tumpampa tuli mu luzi luli na nkaso za kubika ku mulimo wasililila, anga bunakakizizie bunee: ‘Haruni nu bana bage bazilie.’ 32 Kusila kwa kulia, gisiazi byasigala ku misuna nu ku tumpampa. 33 Tamutuke ga mwingilo wa Numba za Hema bindi mutubakamo, aaba nu bindi bya kumubika ku mulimo byasila, kubuno kumwengia ku mulimo wa Kalaga kwakitwe mu bindi mutubakamo. 34 Yehowa akakizizie bibyo bitwakitile lelo kumukitila bukuluzi. 35 Mwatunganana kusigala bwigi na mwingilo wa Numba za Hema bindi mutubakamo, musi nu kindi, nu kukita binsania byakakizizie Yehowa buno tamwakue, kubuno bubo u bunakakizizibwe.” 36 Ukinsa Haruni nu bamulume ba kikanga kyage bakitile binsania byakakizizie Yehowa mu kanua ka Musa.