Basankoga balinga mulimo
9
1 Ku kindi kya kinana, Musa amanine Haruni nu bana bage bamulume, nu bakulu ba baIsraeli. 2 Abwide Haruni bunee: “Tola kyana kya mulume kya ngombe kibe kisansa kyobe kya bwagi, nu kilimba kya mukoko kibe kayulo ka kugisibwa, nu zezo ibili geteli kabalibango, nu kubikasana ku Yehowa. 3 Kumbusa bula baIsraeli bunee: ‘Tolazi kilimba kya mpene kibe kisansa kyeinyu kya bwagi, nu kyana kya ngombe nu kyana kya mukoko, bibyo bibili bya mwaka umozi tugu nu geteli kabalibango, bibe tuyulo twa kugisibwa, 4 nu ngombe nu kilimba kya mukoko zibe kayulo ka bubobelelo kuzikasana ku Yehowa gamozi na kayulo ka bunga bwa ngano bwasambikwa na makiti, kubuno Yehowa amoneke kumuli lelo.’” 5 Bavule na nyama nu bunga bwakakizizie Musa ku kiziki lwabusio lwa Numba za Hema, nu musanganano unsania wakundile nu kwemana lwabusio lwa Yehowa. 6 Nu Musa atendile bunee: “Yehowa akakizizie buno mwakite bubuno, nu lutanuno lwa Yehowa lwamoneke kumuli.”
7 Musa abwide Haruni bunee: “Kunda kasenga ka tuyulo nu kasana kisansa kyobe kya bwagi nu kayulo kobe ka kugisibwa nu kita bukuluzi ku kabamba kobe nu ku kabamba ka bantu. Kasana bisansa bya bantu, nu kubakitila bukuluzi, anga bwakakizizie Yehowa.” 8 Ukinsa Haruni avule ku kasenga nu asesile kyana kya ngombe kya kisansa kyage kya bwagi. 9 Bana bage bamulusizie mikila, nu atobile munwe muzo nu kuzitila ga mega ma kasenga mansania, nu kukubula gansi bweta kasenga mikila zasigede. 10 Agisizie manona gamozi na mpiku nu manona ma kankungwe ka kitugu mu keiya ga kasenga, anga bwakakizizie Yehowa. 11 Tondo agisizie misuna nu kikoba ku isula ly'ido.
12 Nu asesile nyama za kayulo ka kugisibwa, nu bana bage bamulusizizie mikila zazo. Azisandide insania ku ntungo insania za kasenga. 13 Bamukasile zo kyindi kyindi gamozi n'itoe, nu abigisizie ga kasenga. 14 Asugile misolo zazo nu bya munda gamozi na magulu mazo, nu abigisizie gantata ga kayulo ka kugisibwa.
15 Kusila avule na kisansa kya bantu. Akatile kilimba kya mpene kya kisansa kya bantu kya bwagi bwabo, nu akisesile kibe kisansa kya bwagi anga bwakitile na kikyo kitangi. 16 Avule na kayulo ka kugisibwa nu akakasenne anga bwakakizizie Yehowa. 17 Avule na kayulo ka bunga nu akatile n'ikasa limozi bwavwamine kukata nu agisizie nkindi zezo ga kasenga gamozi na kayulo ka kugisibwa ka nindunindu.
18 Asesile mulume wa ngombe nu kilimba kya mukoko bibe kayulo ka bubobelelo ka bantu. Bana ba Haruni bamukasile mikila zabyo, nu azisandile ku kasenga ku ndenge insania. 19 Tondo manona mansania ma ngombe nu ma mukoko, mukila wanona nunse, nu mpiku gamozi na manona mansania ma munda mwazo, nu mamo ma kankungwe ka kitugu, 20 nu bamabikile ga makuba, nu Haruni amagisizie ga kasenga. 21 Haruni atengezietengezie makuba nu kilumbu kya ku seidume lwabusio lwa Yehowa bibe kayulo ka kutengibwa anga bwakakizizie Musa.
22 Kusila Haruni alambizie maboko mage ku bantu nu abakasile mponga. Gaasilile kukasana bisansa bya bwagi nu tuyulo twa kugisibwa nu twa bubobelelo, agelile. 23 Musa nu Haruni beingide mu Numba za Kukulumana. Nkungu zibabasile, bakasile bantu mponga, nu lutanuno lwa Yehowa lwamonekile ko ku bantu bansania. 24 Keiya katukile kwabezaga Yehowa nu kagisizie kayulo ka kugisibwa nu byindi bya manona byabezaga ga kasenga, nu nkungu zibabumonine ko, bantu bansania balalukile na kyelele nu bagwede bukukama.