Kwaga nu lukuo lwa Nadabu nu Abihu
10
1 Nadabu nu Abihu, bana ba Haruni, batolile bibungulu byabo bya kugisia bulago, nu babikile keiya mubyo, nu bulago ga keiya, tondo babikile kango keiya katakakizizie Yehowa kukasana ku Kalaga. 2 Nu keiya katukile ku Yehowa kabagisizie, nu bakule lwabusio lwa Yehowa. 3 Ububo Musa abwide Haruni bunee: “Kikino kili kitondo kyatendile Yehowa gaatendile bunee: ‘Ku babo bakunkunda, nidolesie buno nasililila nunse, nu ku bantu bansania naganunwe.’” Nu Haruni eikede kibibi. 4 Musa amanine Misaeli nu Elizafani, bana ba Uzieli, isi mwana muto wa Haruni, nu ababwide bunee: “Vwazi gano. Mweke mibuto zeinyu ku isula ly'ido, kubatikya lwabusio lwa Numba Zasililila.” 5 Ububo bavule nu bekile bitumba bibyo mu nsulu zabo ku isula ly'ido, anga bwatendile Musa.
6 Kusila Musa abwide Haruni nu bana bage Eleazari nu Itamari bunee: “Tamusige nzwili zeinyu bwasi, aba tamwate nsulu zeinyu. Ndi mwabukita nti mwakue, nu nti Yehowa ongelwe musanganano unsania wa baIsraeli. Tondo mibuto zeinyu, u baIsraeli bansania, balilile babo bagisizie Yehowa mu keiya. 7 Inyuwe, tamutuke ga mwingilo wa Numba za Hema, munavwa kukua, kubuno mwambo wa kubonga wa Yehowa uli kumuli.” Ububo bakitile anga bwatendile Musa.
8 Kusila Yehowa abwide Haruni bunee: 9 “Kungwa mwingila mu Numba za Kukulumana, ntunue maku ma mizabibu aba mamo makali, uwe aba bana bobe. Ndi mwamanua nti mwakue. Ikakizio lilino libe lya milyalya mu bibuti byeinyu. 10 Mwatunganana kusongolola bwebwe gasamba bitondo byasililila nu bibyo bitasililila, nu bwebwe gasamba bintu bya nsese nu bintu bisoga, 11 nu mwatunganana kwigisia baIsraeli makakizio mansania makakizizie Yehowa mu kanua ka Musa.”
12 Musa abwide Haruni nu bana bage basigede, u Eleazari nu Itamari bunee: “Tolazi kayulo ka bunga bwasigala ku bisansa byakasenwe ku Yehowa mu keiya, nu mwabulie bwayikwa geteli mugago ku ntungo za kasenga ka kayulo, kubuno buli bwasililila nunse. 13 Mwabulie mu kiziki kyasililila kubuno buli kibu kyobe nu kya bana bobe kya tuyulo twakasenwe ku Yehowa mu nzila za keiya. Bubo u bunakakizizibwe. 14 Tondo uwe nu basikila bobe nu bakinga bobe munalia bukuba bwatengibwatengibwa lwabusio lwa Yehowa nu kilumbu kyakasenwe ku Yehowa. Mwabilie mu kiziki kyasililila. Byindi bibyo byakasilwe kumuli bibe bibu byeinu bya tuyulo twa bubobelelo twa baIsraeli. 15 Kilumbu kyakasilwe nu bukuba bwatengibwa byakaswe gamozi na byindi bya manona bya tuyulo twa kugisibwa nu kutengibwatengibwa lwabusio lwa Yehowa, bibe kayulo ka kutengibwa. Byindi bibyo bibili byili bibu byobe nu bya bana bobe kankanka, anga bwakakizizie Yehowa.”
16 Musa alondile nunse mpene za kisansa kya bwagi, nu amonine buno zagisizibwe. Ongedwe Eleazari nu Itamari, bana bamulume ba Haruni basigede, nu ababuzizie bunee: 17 “Kubuni tamwalide kisansa kya bwagi ga mulungu wa mukolo wa Numba Zasililila? Kili kyasililila nunse, nu kyakasilwe kumuli buno mwatikye bwagi bwa musanganano mu kubakitila bukuluzi na Yehowa. 18 Kubuno mikila zakyo tazekilwe mu Numba mu Kiziki Kyasililila, mwatunganenne kulia mpene zezo ga mulungu wa mukolo wa Numba Zasililila, anga bunakakizizibwe.”