Nyama zinalibwa nu zitanalibwa
11
1 Yehowa atendile ku Musa nu Haruni bunee: 2 “Tendazi baIsraeli bunee: ‘Munkatini mwa nyama insania zikulama mu kisi munalia zeno: 3 Munalia nyama zabegania byondo, zili na byondo byatika munkatini, nu zikubizula. 4 Tondo tamulie nyama zikubizula nu tazatika byondo, aba nyama zatika byondo nu zitakubizula. Ngamia zikubizula tondo tazatika byondo; muziganze nyama za nsese kumuli. 5 Nu wibari a muziganze za nsese, kubuno zikubizula tondo tazatika byondo. 6 Nu lingo sungula zikubizula tondo tazatika byondo, nu zili nsese kumuli. 7 Nu ngulube zikubegania byondo byatika munkatini, tondo tazikubizula, nu zili nsese kumuli. 8 Tamulie ku misuna zazo, aba tamwitubye ku bitumba byazo; zezo zili mbi kumuli. 9 Ku byena binsania byili mu mazi ma bitatenge nu mazi ma mu nuuzi, munalia bibyo byili na migala nu magamba, 10 nu bibyo binsania bya mu mazi ma bitatenge aba ma nuuzi biteli na migala nu magamba mubisombe. 11 Bubyili muzilo kumuli, tamulie misuna zabyo nu tamwitubye ku bitumba byabyo. 12 Kibumbwa na kibumbwa kya mu mazi kiteli na migala nu magamba kili muzilo kumuli.
13 Munkatini mwa tuzoni tutuno tuli muzilo kumuli nu tamutulie kubuno tuli muzilo kumuli, u ndiu, fulukombe, nu kipungu, 14 nkozi za nkita insania, 15 nu kunguru kwa nkita insania, 16 nu sulukutu wa nkita insania, 17-19 nu nkita insania za tuzoni twasusania sulukutu nu lukozi, nu lusia nu kakutu.
20 Bizimu binsania bikulenga nu bikugelegeta na magulu manazi bili muzilo kumuli. 21 Tondo kuli bimozi bikulenga nu kugelegeta na magulu manazi bimunalia, kubuno bili na mango magulu mabili malazi makwidekela namo ga kisi. 22 Muli na bwangato bwa kulia bibino: nzige nnene, nzige nkeke, iyande, kanselele. 23 Tondo bingo bizimu binsania bili na nsala nu bikugelegeta na magulu manazi, nti mwabigila.
24 Mwikite kuba nsese na nyama zeno nu tuzoni tutuno nu bikugelegeta bibyo. Unsania witubye ku kitumba kyazo nti abe nsese aaba nu mwigolo. 25 Muntu unsania wasongya kitumba kyabyo nti asuge nsulu zage nu abe nsese aaba nu mwigolo. 26 Nyama na nyama zitabegania byondo nunsania aba zitakubizula zili nsese kumuli, nu unsania witubye ku kitumba kyazo eli nsese. 27 Nyama na nyama zikwenda ga magulu mazo manazi, u zezo zili na bibumbu, zili nsese kumuli, nu muntu unsania witubye ku kitumba kyazo nti eli nsese aaba nu mwigolo. 28 Unsania wakata kitumba kyazo nti asuge nsulu zage, nu abe nsese aaba nu mwigolo. Zezo nyama zili muzilo kumuli.
29 Ku nyama zikugelegeta gansi, zeno zili nsese kumuli, u mbibo, mbagu, nu munswanana, 30 nu nkita insania za minswanana, nu mugugu nu kinkenge. 31 Ku bibyo binsania bikugelegeta gansi, bibyo bili nsese kumuli. Unsania witubye kubyo byasila kukua, nti eli nsese aaba nu mwigolo. 32 Lingo kungwa kimozi kya bibyo kyakua nu kukoloka ga kintu kimozi, nti kili nsese, takitondo kya mulimo wakyo, nu ndi kili kya muti aba kya nsulu aba kya kikoba aba ky'ikunino. Kibike mu mazi, nu kili nsese aaba nu mwigolo. 33 Ndi kimozi kya bibyo kyakoloka mu idega aba mu nyungu z'ibumba, nti binsania bili munda mwalyo bili nsese, nu lyabugibwe. 34 Idia linsania linalibwa nu mazi matuka mu idega anga lilyo nu manunizia idia, nti idia lili lya nsese, nu mazi ma kunua mansania matuke mu idega lya lukita lulo nti meli ma nsese. 35 Kintu na kintu kyakolokelagwe na kitumba kyabyo kili nsese, ndi mapika ma nkita insania nti mabugibwe. Bili nsese, nu mwatunganana kubiganza bya nsese. 36 Kanuabalongo aba maziba mu kukundamana mazi, nti masigala masoga, tondo unsania witubye ku kitumba kyabyo eli nsese. 37 Ndi kitumba kyakoloka ga mbuto za kuyika mu isoa, mbuto zili nsoga. 38 Tondo mbuto zanunibwa na mazi nu kitumba kyakolokela zo, nti mbuto zezo zili nsese kumuli.
39 Nu nyama zimunavwama kulia, ndi zakua, unsania witubye ku kitumba kyazo eli nsese aaba nu mwigolo. 40 Unsania walia kyindi kya kitumba kyazo asuge nsulu zage nu abe nsese aaba nu mwigolo; unsania wakata kitumba, akyeke, asuge nsulu zage nu abe nsese aaba nu mwigolo.
41 Kibumbwa na kibumbwa kikugelegeta gansi kili muzilo kumuli; takyalibwe. 42 Tamulie nyama na nyama zikwibuluta gansi, aba zezo zikugelegeta ga magulu manazi aba ga magulu mengi, kumuli zezo zili muzilo. 43 Tamwibike nsese ku kabamba ka nyama zeno. Tamwibigie nazo aba ku kabamba kazo. 44 Nne nili Yehowa, Kalaga weinyu. Mwiyengie nu mube basililila, kubuno nasililila. Tamwibigie na nyama insania zikugelegeta gansi. 45 Nne nili Yehowa wamutikizye mu Misri buno nibe Kalaga weinyu. Ububo mube basililila, kubuno Nne nasililila.